އިންގިލާބަކީ ބަޔަކުމީހުން ވެގެން، އޮތްގޮތް ނޫން އެހެން ގޮތަކަށް ބަދަލު ކޮށްލުމެވެ. ފުރިހަމަ ބޮޑު ބަދަލެއް ގެނައުމެވެ. ވަރަށް ގިނަ ގޮތްގޮތަށް އިންގިލާބު ގެނެވެއެވެ. ދުނިޔެ ވަނީ، ތަފާތު އިންގިލާބުތައް ތަޖުތިބާ ކޮށްފައެވެ. އެކި ވައްތަރަށެވެ. އެކި ސިފަސިފައަށެވެ. އެބީދައިން ރާއްޖެވެސް ދެކެމުން މިދަނީ، އިންގިލާބެއްގެ ވިއްސާރަ ދުނިތަކެވެ. މިކުލަވަރު ތަކަކީ އިންގިލާބެއްގެ ފެށުންކަން ކަށަވަރެވެ. މިއީ ގައުމު ދެކޭނެ ހަމަހިމޭން އިންގިލާބެއް ކަން ޔަގީނެވެ. ކަށަވަރެވެ. ދިވެހިން ދެކެމުންމިދާ އިންގިލަބަކީ، ލޭ އޮހޮރުވުމެއް ނެތް މީރުވަހުން ފުރިގެންވާ، ތަހުޒީބީ އިންގިލާބަކަށް ވާން ޖެހޭނެއެވެ. ދިވެހި ދަރިންގެ ކުޅަދާނަކަން ފެނިގެންދާނީ އޭރުންނެވެ. އެއްވެސް ބަޔަކު ބިންމަތީގައި ފަސާދައަށް މަގުފަހިކޮށްގެން ނުވާނެއެވެ. އަދި ބިންމަތީގައި ފަސާދަ ކޮށްގެން ނުވާނެއެވެ. ﷲ ޢަމުރު ކުރައްވަނީ ބިންމަތީގައި ފަސާދަ ނުކުރުމަށެވެ. ސުލްހަ ވުމަށެވެ. އެއްބަޔަކު އަނެއްބަޔަކާ އަބަދުވެސް ސަލާންކުރުމަށެވެ. ސަލާމަތްތެރި ކަމުގައި ތިބުމަށެވެ.
ﷲ ތަޢާލާ އިންސާނުން އެންމެ މާތް ސިފައިގައި ހައްދަވައި ބުއްދިދެއްވައި މަޚްލޫޤުތަކުންގެ ތެރެއިން އެންމެ ޝަރަފުވެރި ކުރެއްވުމުގެ، އަޖައިބުތަކުގެ ތެރެއިން އެއް އަޖައިބަކީ، އިންސަނުން ފިތުނަ ފަސާދައާއި ބަރަހަނާ (NUDISM) ކަމާއި ހުރި ދުރުހެލި ކަމެވެ. ފަސާދައާއި ބަރަހަނާ ކަމަކީ އިންސާނާއަށް މަނާކުރެވިފައިވާ ދެކަމެވެ. އެހެން ވުމުން އަބަދުވެސް ޝައިޠާނާ ގަދައަޅައި މަސައްކަތް ކުރަމުން ގެންދާނީ އިންސާނުން ގައިގައިވާ ހުސްޠާހިރު ވަންތަކަމުން އެއްކިބާކޮށް މަކަރުވެރިކަމާއި ނަޖިހުން ތަތްތެޅިފައިވާ ފިތުނަ ފަސާދައާއި ބަރަހަނާ ކަމުގެ ތެރެއަށް ވައްދައި ޣަރަގުކޮށްލުމަށެވެ. އާދަމުގެފާނާއި އެކަލޭގެފާނުގެ އަނބިކަނބަލުން ހައްވާއާއި އިންސާނީ ދަރިފަސްކޮޅަށް އަދާވާތްތެރިއެއްގެ ގޮތުގައި ޝައިޠާނާ ވިއެވެ. ލަޢުނަތްލެއްވުނު މި އިބްލީސް ވަނީ، ސުވަރުގޭގައި، އަދާމުގެފާނަށް ﷲގެ ބަސްފުޅު އެއްގޮތަކަށް ވެސް ނޭހުމަށް ވަސްވާސް ލައިދީފައެވެ. އަދި އާދަމުގެފާނުގެ ދެކަނބަލުން ސުވަރުގޭން ބޭރަށް ނެރެލުމަށްޓަކައި ރޭވި މަކަރުވެރިކަމުގައި ޝައިޠާނާއަށް ވަނީ، މިހެން ބުނެގެން ނޫނީ ހައްލާނުލެވި ފައެވެ. އިބިލީހުގެ މަކަރުވެރި ވަސްވާހުގައި އެބޭފުޅުން ޖެހިވަޑައިގެންފައި ވަނީ، އިބިލީސް މިފާޑަށް މަސައްކަތް ކުރުމުންނެވެ. [އޭ އާދަމުގެފާނެވެ! ކަލޭގެފާނު އެގަހުން ފަރީއްކުޅުއްވައިފިނަމަ، އަބަދަށް ދެމިހުންނާނޭ ޝަޖަރަތުލްޚުލްދަކާއި ފަނާވެގެން ނުދާނޭ މުލްކެއް (ވެރިކަމެއް) ކަލޭގެފާނަށް ތިމަން ދައްކަންހެއްޔެވެ؟] (ސޫރާ ޠާހާ 120)
ރައްޔިތުންގެ ބޮޑު މަޖިލީހުގައި، ގާނޫނުތައް ހަދާ ފަރަތް ކަމުގައިވާ ރައްޔިތުންގެ މަޖިލީސް އެކުލެވިގެންވާ ގޮތުގެ ބަހުސް ހިނގަމުންދާތާ ގިނަ ދުވަސްތަކެއް ވެއްޖެއެވެ. ބޮޑު މަޖިލީހުގެ ރިޔާސަތުން ގެންގުޅުއްވާ ދިގުދެންމުމުގެ ޕޮލިސީގެ ދަށުން، ގޮތެއް ނުނިމި ދިގުލަނީ އެވެ. އެޅޭނެ ފިޔަވަޅެއް ނެތެވެ. އެޖެންޑާ ކުރެވޭ ކޮންމެ ބަހުސެއްގެ ހާލަކީވެސް މިއެވެ. އެންމެ ފަހުން މި މައުޟޫއަށް ހޫނު ގަދަ ބަހުސެއް ކުރެވުނީ، ބޮޑު މަޖިލީހުގެ 6 ނޮވެމްބަރ 2006 ދުވަހު އޮތް 120 ވަނަ ޖަލްސާގައެވެ. އަދިވެސް މިމައުޟޫ ނިންމާލެވޭނެ ދުވަހެއް ނޭގެއެވެ.
އާދެ، މިމައުޟޫގައި އެންމެ އުސް އަލިކަމެއްގެ ގޮތުގައި އުޅެނީ، އަންހެން ބޭފުޅުންނަށް ޚާއްޞަ ކުރެވޭ ގޮނޑިތަކެއް ކަނޑައެޅޭ ކޯޓާއެއްގެ ގޮތުގައި ހަމަޖައްސާފައި ބެހެއްޓުމުގެ ޚިޔާލެވެ. އަސާސީގައި މިގޮތަށް ލިޔުމަށެވެ. މިވިސްނުން އުފަންވެގެން މިއުޅެނީ އަންހެނުންނާއި ފިރިހެނުން ހަމަހަމަ ކުރުމުގެ ނަމުގައި އޮޅުވާލައިގެން ނެރެގެން އުޅޭ ބޮޑު ބަހަނާ އެއްގެ ދަށުންނެވެ. ދިވެހިންގެ ތެރޭގައި އެއްވެސް އިރެއްގައި އަންހެނަކަށް ވާތީވެއޭ ކިޔާފައި އެއްވެސް ކަހަލަ ހައްގެއް ލިބުމުގައި ތަފާތު ކުރެވިފައެއް ނުވެއެވެ. މި ވިސްނުމަކީ ވަރަށް ގަދީމީ ވިސްނުމެކެވެ. މިހާރަކަށް އައިސް އުފަންވެގެން އުޅޭ ޚިޔާލެއް ނޫނެވެ.
(މިއީ އަޅުގަނޑު ބޮޑުމަޖިލީހުގެ 116 ވަނަ ޖަލަސާ ނިންމާފާއައިސް ކުރެވުނު އިހްސާސް ތަކުގެ މައްޗަށް ލިޔެފައިވާ މަޒުމޫނެކެވެ.)
ރައްޔިތުންގެ ޚާއްޞަ މަޖިލީހުގެ 1 އޮކްޓޯބަރ 2006މ، (އާދީއްތަ) ދުވަހު އޮތް 114 ވަނަ ޖަލްސާ އާއި 8 އޮކްޓޯބަރ 2006މ، (އާދީއްތަ) ދުވަހު އޮތް 115 ވަނަ ޖަލްސާއާއި 9 އޮކްޓޯބަރ 2006މ، (ހޯމަދުވަހު) އޮތް 116 ވަނަ ޖަލްސާއައި މިތިން ޖަލްސާއަކީ، އެއް ގޮތަށް ވުރެ ގިނަ ގޮތް ގޮތުން ފާހަގަކުރެވޭ ވަރަށްމުހިންމު، ސިޔާސީ ބައްދަލުވުން ތަކެކެވެ. އަދި ދިވެހި ތާރީޚަށްޓަކައި އެޖަލްސާތަކާބެހޭ ތެދު ހަގީގަތް ހާމަކޮށް ލިޔެ، އަންނަން އޮތް ޖީލުތަކަށް ތާރީޚީ ފަތްފުށް ތަކުގައި ރައްކާކޮށް ތާއަބަދަށް، ފޮރުވާފައި ބަހައްޓަން ޖެހޭފަދަ، ތާރީޚީ ހާދިސާތަކެއް އެބައްދަލުވުން ތަކުގައި ހިނގާ ގޮސްފައި ވެއެވެ. އެޖަލްސާތައް ވަނީ، ދާންޖެހޭ ހަގިގީމަގުން ކައްސާލާފައެވެ. އަދި ދާންޖެހޭ ސީދާމަގު ވަނީ، ރިޔާސަތުން އޮޅުވާލާފައެވެ. މިކަން ވަރަށް ކާރި މުސްތަގްބަލެއްގައި ފަހުން ފެނި، ސާބިތު ވާނެއެވެ.
އެޝަޚްސިއްޔަތެއްގެ މަގްބޫލުކަން އެޝަޚްސިއްޔަތަކާ މެދު ޢަމަލުކުރެވުނު ނުބައި ނުލަފާ ކަންތައްތަކެއްގެ ސަބަބުން ފަނޑުވެގެން ދިޔަ ޝަޚްސިއްޔަތަކީ، އެއްދުވަސް ވަރެއްގައި ދިވެހި ރާއްޖެ އުފެއްދި އެންމެ މާތް ދަރިޔާގެ ލަގަބު ދެވެމުން ދިޔަ މިހާރުވެސް އެބޭފުޅަކު ދުނިޔޭގައި (ރާއްޖޭން ބޭރުގައި) ހުންނެވި ރައީސް އިބްރާހިމް ނާސިރެވެ. ގަސްތުގައި ދިވެހި ރާއްޖެދުށް، މިބަޠަލުގެ މާޒީން ސަފްހާތަކެއް ވަނީ، ނަގާލާފައެވެ. އެ ސަފްހާތަކަށް ވަނީ، ފަނޑުކަމެއް ގެނެސްފަ އެވެ.
ފަހެ، އެއީތޯއެވެ. ނިޝާން ޣާޒީގެ ޢިއްޒަތްތެރި ވެރިޔާއެވެ. (ޚިދުމަތްތެރި ދިވެހި ދަރިންނަށް ދިވެހިދަރިންދޭ އެންމެ މަތީ ދަރަޖައިގެ ރަން މެޑަލް) ދިވެހި ޣާޒީންނަށް ދިވެހިން ކިޔައި އުޅުނު ރަންނަބަނޑޭރި ކިލެގެ ކަމުގެ ކޮލިލެވުނު ޢިއްޒަތްރެރި ވެރިއާއެވެ. ދިވެހި ދައުލަތުގެ ވެރިކަން ކުރެއްވި، ރައީސް އިބްރާހީމް ނާޞިރެވެ.
ވެހި ރާއްޖެއަށް އެންމެ ފުރަތަމަ ފަހަރަށް، އިނގިރޭސި ގަވަރުނަރެއް ޒިޔާރަތް ކުރީ ޝަމްސުއްދީނު ރަދުންގެ ރަސްކަމުގައި، ސަރަންދީބުގައި ބަހައްޓަވާފައި ހުންނެވި ދިވެހި ސަފީރު މެދުވެރިކޮށް ހިންގުނު ކަންތައްގަނޑެއްގެ ދަށުންނެވެ. ބާރުގަދަ ފަރާތްތަކުގެ އިސްތިޢުމާރުގެ ދަށުގައި ތިބުމަށްފަހު، މިނިވަންވި ދައުލަތުގެ ރައްޔިތުންގެ ހިތްތަކުގައި އަދިއަދާ ހަމައަށް ވެސް، އުފެދެމުންދާ ވަރުގަދަ ލޯތްބާއި ކުލުނު ހިނގަ ހިނގާ އޮވެއެވެ. އިސްތިޢުމާރު ކުރި ފަރާތްތަކުން ވެސް އިސްތިޢުމާރުގައި ތިބި ބައެއްދެކެ ލޯބި ވާނެއެވެ. ކުލުނު އޮންނާނެ އެވެ. އެދުމެއް އޮންނާނެއެވެ. ބައެއް މީހުން ކިޔަވާ ވިދާޅުވާ ރަށް ދެކެ އުފެދޭ ވަރުގަދަ ލޯތްބާއި ދާދި އެއްގޮތަށެވެ. މިސްރުން ކިޔަވާ މީހަކު މިސްރު ދެކެ ލޯބި ވާނެއެވެ. އެތާގެ އާދަކާދައަށް މަރުޙަބާ ކިޔާނެއެވެ. ސަޢުދިޔާއިން ކިޔަވާ މީހުން ސަޢުދި އަރަބިއްޔާ ދެކެ ލޯބިވާނެއެވެ. އެމެރިކާ އިންނާއި އެމެރިކަން ޔުނިވަރސިޓީ ތަކުން، ކިޔަވާ މީހުން އެމެރިކާ އާއެކު ގުޅުން ބާއްވާނެއެވެ. އިނގިރޭސި ވިލާތުން ކިޔަވާ މީހުން އިނގިރޭސި ވިލާތް ދެކެ ލޯބިވާނެއެވެ. ކުލުނު އޮންނާނެ އެވެ. މީގެ އިތުރުން، އެދައުލަތް ތަކުން ވެސް އެތަންތަނުން ކިޔަވާ ނިމިގެން ތިބޭ މޮޅު ދަރިވަރުން ފާހަގަކޮށް ގުޅުން ބާއްވާ ބަދަހި ކުރާނެއެވެ. އިސްކަމެއް ދޭނެއެވެ.
ދިވެހި ރައްޔިތުންގެ ތެރެއިން ހިތްވަރުގަދަ ބަޔަކު އިސްނަގައިގެން ކުރިއަށް ގެންދިޔަ ޖިހާދުގެ ސަބަބުން ދިވެހި ރާއްޖޭގައި ދިވެހިންނަށް، ސިޔާސީ ޕާޓީތައް އުފެއްދުމުގެ ހުއްދަ ނެރުމަށް ވެރިކަން ކުރާ ފަރާތަށް މަޖުބޫރު ވެއްޖެއެވެ. މިއީ އިސްލާހީ ހަރަކާތުގެ މުގައްދަސް ޖިހާދެކެވެ. ފަހެ މިކަމަކީ، ރައީސް މައުމޫނު، ކޮށްދޭ ހިތުން ކޮށްދެއްވި ކަމެއް ނޫނެވެ. ސިޔާސީ ޕާޓީތައް އުފައްދައި ހަރަކަތްތެރިވާން ފެށި ފެށުމަށް މިހާރު، އަހަރަކަށް ވުރެ ގިނަ ދުވަސް ވެއްޖެއެވެ. މިހާތަނަށް ދިވެހި އުދަރެހުން ދިރިގެން ނިކުތް ޕާޓީތައް ހުރީ، ދިގު ރާސްތާއެއްގެ ރަތް ބައްތިއެއްގެ ކުރިމަތީގައި ބުރެކި ޖެހި ހުއްޓިފައެވެ. ސީދާ ތެދުމަގުން ކުރިއަށް ދިއުމަށް ރަތް ކުލައިގެ އިންޒާރަކުން ހުރަސް އަޅާ ހުއްޓުވާލާފައެވެ. ދިގު ކިއޫއެއްގައި ދުއްވައިގަތުމަށް ތައްޔާރުވެގެން ތިބި ޕާޓީތައް ބައިވަރެވެ. މަގުފަހި ނުވެގެން އަވަސް ކުރުމުގެ ގޮތުން ބަރުގޮނު އެޅުމާއި އެބައަކަށް ކުރެވުނުހާ ކަމެއް ދަނީ ކުރަމުންނެވެ. އެހެނަސް ރަތްއަލީގެ އިންޒާރާއެކު މަގު ބަންދުކޮށްފައި ވަނީ، ރައީސް މައުމޫނުގެ އަމިއްލަ އެދުންތަކެއްގެ ބޭނުމުގައެވެ.
އޭ! އަހަރެމެންގެ ލޯބިވާ ދިވެހި ގައުމާއެވެ! ކައުބަތުއްﷲ ގެފުޅު ކުރިމަތީގައި ތަކުރާރުކޮށް، އެތައް ފަހަރަކު ކޮޅަށް ހުރެ، އަހަރެން މިހުރީ ކަލާއަށްޓަކައި ގުރުބާން ވުމަށް ހިތުގެ އަޑިން ހުވާ ކޮށްގެންނެވެ. ކަލާގެ ފުރިހަމަ ކަމާއި އިންސާފަކީ، ދިވެހި އުއްމަތުގެ ކާމިޔާބުކަން ޔަގީނެވެ. ޝައްކެތް ނެތެވެ! އެންމެހައި މީސްތަކުން އެއްވެ، ރޫޙާނީ ގޮތުން ގަބޫލުކުރާ ދީނަކާއި ވަކި ގޮތް ތަކެއްގެ މަތިން ހިންގާނެ ވެރިކަމެއް ރާވައި، އެއާގުޅޭ އެހެނިހެން ކަންތައްތައް ކަމުގައިވާ، ބަހާއި ވައްޓަފާޅިއާއި އާދަ ކާދަ ތަކެއް އުފައްދައި، އަމިއްލަ ވެރިކަމެއް ގާއިމުކޮށްގެން އުޅޭތާ އެތަކެއް ސަތޭކަ އަހަރުތަކެއް ވެއްޖެ ކަމުގައި ދަޢުވާކޮށް، އެދަޢުވާ ކަލާ ވަނީ، ވަރަށް ފުރިހަމަ ކަމާއެކު ސާބިތު ކޮށްދީފައެވެ. އަދި މުޅި ދުނިޔެ ވަނީ އެކަން ގަބޫލު ކޮށްފައެވެ. ދެބަސް ނުވެވޭނެ ހެތްކަކީ، ދުނިޔޭގެ ގައުމުތަކުގެ ޖަމާޢަތްތަކުގައި ކަލާވަނީ، ހިމަނާފައެވެ. ހަމަހަމަ މެންބަރަކަށް ހަދާފައެވެ. މިއީ ދުނިޔޭގައި ލިބޭނެ އެންމެ މަތީ ޝަރަފެވެ. ސިޔާދަތެއް ހައްގު ވެގެންވާ ގައުމަކަށް ކަލާވެ، ތަސައްރަފު ފުދުނީއެވެ.
މި މަޒުމޫނަކީ 1994 ނޮވެމްބަރ މަހު 8 ވަނަ ދުވަހު ލިޔެ “އާފަތިސް” ނޫހުގައި ޖަހައި ދިނުމަށް އެދި އެނޫހުގެ އިދާރާއަށް ފޮނުވިފައިވާ މަޒުމޫނުނެކެވެ. އަދި 1994 ޑިސެމްބަރ މަހުގެ 6 ވަނަ ދުވަހު، “ހަވީރު” ނޫހުގައި ޝާއިޢުކޮށް ދިނުމަށް އެދި، އެނޫހުގެ އިދާރާއަށް ސިޓީއާއެކު ފޮނުވިފައިވާ މަޒުމޫނެކެވެ. އެހެނަސް މިދެނޫހުން ވެސް، އެދުވަސްވަރު މިމަޒުމޫނު ވަނީ ޝާއިޢުކޮށް ނުދީފައެވެ. އެއިރު ލިބުނު ޚަބަރެއް ބުނާ ގޮތުގައި މި މަޒުމޫނު އާފަތިސް ނޫހުން ފޮނުވާލީ މިނިސްޓްރީ އޮފް ޑިފެންސަށެވެ. ވީމާ، މިއަދު، މި މަޒުމޫނު ވިދާޅުވަމުން ވަޑައިގަންނަވާއިރު، 1990 ގެ އަހަރުތަކުގެ ތެރޭގައި، ވިސްނުމާއި ޚިޔާލު ބެހެއްޓެވުން އެދެމެވެ. ފަހެ އެއީ، ރާއްޖޭގެ ސިޔާސީ މަސްރަހުގައި ވަރަށް ހަލަބޮލި ދުވަސްވަރެކެވެ. “ބިންބިފީސް” މާލެ ތެރޭގައި އެންމެ ބާރާއެކު ހަރަކާތްތެރި ވަމުން ގެންދިޔަ ދުވަސްވަރެވެ.
ސައްތައިން ސައްތަ އިސްލާމީ އުއްމަތެއް އެކުލެވޭ ދައުލަތެއް ކަމުގައިވާ “އައްދައުލަތުލް މަޙަަލްދީބިއްޔާ” ގެ ޤާނޫނުއަސާސީގައި “ޢަދުލު އިންސާފުގެ ބާބު” ލިޔުމަށް ކުރެވޭ ބަހުސް ބޮޑުމަޖިލީހުގެ ތަޅުމަށް، އެޖެންޑާ ކޮށްފައި ވަނީ “ޝަރުޢީ ނިޒާމާއިބެހޭ ބަހުސް ކުރުން” މިގޮތަށެވެ. ދިވެހި ދައުލަތަކީ، ސައްތައިން ސައްތަ އިސްލާމީ އުއްމަތެއްގެ ދައުލަތަކަށްވެފައި، އިސްލާމަކު ނޫންމީހަކު، ދިވެހި ދައުލަތުގެ އަމުރުވެރިކަމާއި ސިޔާދަތުގެ ދަށަށް ގާނޫނީ ގޮތުން ނުގެނެވޭކަމަށް ވާނަމަ، ފަހެ، ދިވެހި ދައުލަތަކީ، އިސްލާމީ ދިވެހި ދައުލަތެކެވެ. ޝައްކެއް ވަސްވާހެއް ނެތެވެ. ޤާނޫނުއަސާސީގައި މިގޮތަށް ނުލިޔަންވީ އެއްވެސް ސަބަބެއް ނެތެވެ. އެހެނަސް، ހުޅަނގުގެ ހަންފެތުރުމުގެ ޖާދޫގައި މަދުބަޔަކުޖެހި އާޝޯޚްވެ، ޣަރަގުވެފައި ތިބިލެއް ފުންކަމުން، އަދި ގަންނަ ބިރެއްގެ ބޮޑުކަމާ ހެދި ނުކެރެނީއެވެ.
ރިޔާސީ ނިޒާމެއްގައި ވެރިމީހާއާއި ސަރުކާރު، ބަލަހައްޓައި މަސްއޫލުކުރުވާ، ޒިއްމާދާރު ފަރާތަކީ އެންމެހާ ރައްޔިތުންނެވެ. ރިޔާސީ ނިޒާމެއްގައި، ހުރިހާ ބާރެއް އޮންނާނީ ރައްޔިތުންގެ އަތުގައެވެ. ފަސާދަ ވެފައިވާ ވަރުގަދަ ސައުދާ ގަރުންނާއި ނުލަފާ ޑްރަގްލޯޑުންގެ އަތުން ބާރުތައް އޮންނާނީ، މުޅި ރައްޔިތުންނަށް ހިއްސާވާ ގޮތަށް ބެހިފައެވެ. އެމީހުންގެ މައްޗަށް ސަރުކާރުގެ ތަންފީޒީ އަމުރުތައް ހިންގަން ފަސޭހަވާނެއެވެ. ޕާލަމެންޓުގައި ތިބޭމަދު ބައެއްގެ ނުފޫޒާއިބާރު މުޅިގައުމުގެ މައްޗަށް ހިންގޭނެގޮތެއް ނުވާނެއެވެ. ހުރިހާ ރައްޔިތުންގެ ބަހެއްނެތި ކަންކަން ނުނިން މޭނެއެވެ. ވެރިމީހާ ހޮވުމުގައި އެންމެންގެ ހިއްސާ ހަމަހަމައަށް އެއްވަރަށް ބެހިގެންދާނެ އެވެ. ވެރިމީހާ އާއި ސަރުކާރަކީ، އަބަދުވެސް ރައްޔިތުން ހަވާލު ކުރާކަމެއް އުޖޫރައެއް ދީގެން ވަކި މުއްދަތަކަށް، ޒިންމާދާރު ކުރުވާ ބައެކެވެ. އެންމެ ފުރިހަމަ ގޮތުގައި، މަސްއޫލިއްޔަތު އުފުލަންޖެހޭ ގޮތަށެވެ. މުޅީ ރައްޔިތުންނާއި ހުރިހާ ޕާޓީތަކެއްގެ ފާރަވެރިކަމުގެ ދަށުންނެވެ. އެންމެންގެ ބަލަދު އަރާ ގޮތަށެވެ. މަސްއޫލިއްޔަތާއި ޒިންމާ އުފުލުމާއެކު، ހުރިހާ ކަމަކަށް އަޅާލަން ޖެހޭގޮތަށެވެ. އެންމެ ފުރިހަމަގޮތުގައި ޖަވާބުދާރީ ވާންޖެހޭ ގޮތަށެވެ. މަޖިލީހުން ސުވާލު ކުރެވޭ ގޮތަށެވެ. ވާރުތަވާ ދަރިއަކު ބަލަހައްޓާހެން އަދަބުދީ، މަގަށް އެޅުވުމުގެ ހުރިހާ އިޚްތިޔާރެއް ރައްޔިތުން ނަށް އޮންނާނެ އެވެ.
ދުވަހުންދުވަހަށް ދިވެހި ސިޔާސީޖައްވަށް އަންނަމުންދާ ބަދަލާމެދު، ވިސްނާފިކުރުކުރުމަކީ، ކޮންމެ ދިވެހި ސިޔާސީ މުފައްކިރަކަށް ވާޖިބެކެވެ. ގައުމަށް ހެޔޮއެދޭނަމަ، ކުރަންޖެހޭނެ ކަމެކެވެ. ތިންވަނަ ދުނިޔޭގެ، އެތެރެވަރީގެ ގައުމުތަކުގައި މާދަމާވާނެ ގޮތެއް، ލަފާކޮށް ނިންމާކަށް އެކަކަށްވެސް ނޭގޭނެއެވެ. އެއީ ނުވާނެކަމެކެވެ. ރައީސް މައުމޫނު، ދިވެހި ރައްޔިތުންގެ ހަޒާނާއިން، ރައްޔިތުންގެ ހުއްދައެއްނެތި، އެތައް މިލިޔަން ރުފިޔާއެއް އިނގިރޭސި ކުންފުންޏެއް ކަމުގައިވާ ހިލްއެންޑް ނޯލްޓަނަށް ވަނީ، ހަރަދުކޮށްފައެވެ. ހަމަވީކަމެއް ހަރާމުން ހަރާމެވެ. މާދަމާ ކުރުމަށްޓަކައި ހޯއްދެވި އެއްވެސް ކަމެއް ދިމައެއް ނުވިއެވެ. ދެކޮޅެއް ނުޖެހެއެވެ. ދިޔައީ ފުއްވަޅުން ނެވެ. ފަނުފުލުންނެވެ. ފައިދާނެގީ އެކަމާ އުޅުނު ނިއުމޯލްޑިވްސްއޭ ކިއުނު ބައިގަނޑެކެވެ. އިސްކޮށް ހުންނެވީ ޑޮކްޓަރ އަހްމަދު ޝާހީދާއި ޑޮކްޓަރ ހަސަން ސައީދެވެ. ރައީސް މައުމޫނަށް ލިބެނީލަނޑެވެ. އެންމެންވެސް ދެނީ، ކެއްސެވެ
ﷲ އުޑުތަކާއި ބިން ޙައްޤުގޮތުގައި އުފެއްދެވިއެވެ. ހަމަކަށަވަރުން، އެއީ އެންމެހާ މުއުމިނުންނަށް އެކަލާނގެ ވޮޑިގެންވާކަމަށް ހުރި ދަލީލުތަކެކެވެ. ފަހެ ﷲ ވަޙީކުރައްވަނީ މިފަދައިންނެވެ.
“ކަލޭގެފާނަށް ބާއްވާލެއްވުނު ޤުރުއާން ކިޔަވާވިދާޅުވާށެވެ. އަދި ނަމާދު ޤާއިމު ކުރާށެވެ. ހަމަކަށަވަރުން ނަމާދު، ފާޙިޝްކަންތަކާއި މުންކަރާތްތައް ނަހީކުރެއެވެ. ﷲ ހަނދާންކުރުމަކީ، ބޮޑުވެގެންވާ ކަމެކެވެ. ތިޔަބައިމީހުން ކުރާކަންތައްތައް ﷲ ދެނެވޮޑިގެން ވެއެވެ.”
އާދެ! މިއީ، މުޙަންމަދު ގެފާނަށާއި މުޅިއިސްލާމީ އުންމަތަށް ﷲ ކުރައްވާފައި އޮތް ވަރުގަދަ އަމުރުފުޅެކެވެ. ޙާކިމުންނާއި މަޙްކޫމުންނަށް ތަބާވާންޖެހޭ އަމުރުފުޅެކެވެ. ކޮންމެހުކުރު ދުވަހަކު ހުކުރުނަމާދުގެ ޚުޠުބާ ނިންމާލަނީ، މިމަތިވެރި އަމުރުފުޅު މުޅި ދުނިޔެއަށް ހަދާންކޮށް ދެމުންނެވެ.
22 ޖޫން2006މ، ވީ ބުރާސްފަތިދުވަހު އޮތް، ރައްޔިތުންގެ މަޖިލީހުގެ ޖަލްސާއަކީ، ތާރީޚީ ކަމެކެވެ. ތާރީޚީ ހާދިސާއެއް ހިނގާދިޔަ ޖަލްސާއެކެވެ. ދިވެހި ތާރީޚުގައި ފުރަތަމަ ފަހަރަށް މަޖިލީހުގެ މެންބަރުން އަމިއްލައަށް ލިޔެ ތައްޔާރުކޮށް ފާސްކުރި މަޖިލީހުގެ ގަވާޢިދުގެ ދަށުން، ހުށަހެޅޭ ބިލްތައް ބަހުސްކުރުމަށް ފަހު، ޖެހެނީ، މަޖިލީހުން ބަލައިގަންނާނެ ބިލެއްތޯ ބެލުމަށް ވޯޓަށް އަހާށެވެ. މިބަހުސްގައި ބަހުސް ކުރުމަށް، ފުރަތަމަ ބުރުގައި ފަނަރަ މިނިޓް ދެއްވައެވެ. ދެވަނަ ފަހަރަށް ވާހަކަ ދެއްކެވުމަށް ފަސްމިނިޓް ދެއްވައެވެ. ތިންވަނަ ޗާންސެއް ނޯވެއެވެ. މިގޮތުގެ މަތިން މާލޭގެ ޢިއްޒަތްތެރި މެންބަރު އިބްރާހިމް އިސްމާޢީލް ހުށަހެޅުއްވި އެއްވެ އުޅުމުގެ ބިލަށް މިޖަލްސާގައި ވޯޓަށް އެއްސެވުމުން މަޖިލީހަށް ބަލައި ގަތުމަށް، ފާހެއް ނުވިއެވެ. ހާޒިރުވެ ތިއްބެވި 36 ބޭފުޅުންގެ ތެރެއިން މިބިލް ބަލައިގަނެ މަޖިލީހުން ކުރިއަށް ގެންދިއުމަކީ، ފެންނަކަމެއް ކަމަށް ވޯޓު ދެއްވީ، އެންމެ ބާރަ މެންބަރުންނެވެ. ނުފެންނަކަމަށް ނުވަ ބޭފުޅުންނެވެ. ވަކިފަރާތަކަށް ވޯޓު ނުދެއްވާ އެގާރަ ބޭފުޅުންނެވެ. އަދި ޙާޒިރުވެ ތިއްބަވާ ވޯޓު ދެއްވުމަށް ސިސްޓަމުގެ ބޭނުން ނުހިއްޕަވާ ހަތަރު ބޭފުޅަކު ތިއްބެވިއެވެ.
އާދެ! އަޅުގަނޑުމެންނަށް، މިހާރަކަށްއައިސް އިވެމުންދާ އެންމެ، ކަންފަތަށް އުނދަގޫކުރާ އެއްއަޑަކީ ދިވެހިރާއްޖޭގެ ވެރިކަން ކުރާނޭ ނިޒާމަކާ މެދު، ވަކިގޮތެއް ކަނޑަނޭޅިގެން ކުރެވޭބަހުސްގެ އަޑުފަށްގަނޑެވެ. ބޮޑު މަޖިލީހުގެ ތަޅުމުގައި ކުރެވޭ، ޒުވާބު ތަކުގެ އަޑުފަށް ގަނޑެވެ. ރާއްޖޭގެ ބާރުގަދަ މީޑިއާއިން، ޓީވީ އާއި ރޭޑިޔޯ އިން، އަބަދާއި އަބަދު މިއަޑުފަށްގަނޑު އިއްވުމަކީ، ހާދަ ބޮލަށް އުނދަގޫވާ ކަމެކެވެ. އާދެ! ވެރިކަން ކުރާނެ ނިޒާމެއް ހޯދަނީޔޯލައެވެ.
ފަހެ، ދިވެހިރާއްޖެ ދުށް އާދަޔާ ޚިލާފު ސިޔާސީ މުފައްކިރެއް ކަމުގައިވާ، އަލްއަމީރު މުޙަންމަދު އަމީނު ދޮށިމޭނާ ކިލެގެފާނު، އޭނާގެ މަޝްހޫރު ފޮތް “ދިވެހި ޖުމްހޫރިއްޔާ…… މަރުޙަބާ!” މިފޮތުގެ ފުރަތަމަ ޞަފުޙާގައި މުލީއާގޭ އެޑްރެހުގައި ވަލިއްޔުލް އަމްރުގެ ނަންފުޅުގައި ލިޔުއްވާފައިވާ، ލިޔުއްވުމުގައި ވިދާޅުވެފައި ވަނީ، “ވެރިކަމަށް ކިޔާނޭ ނަމަކާ މެދު، ބަހުސްކުރާނީ މޮޔައިންނެވެ. ރަނގަޅު ވެރިކަމަކީ ހެޔޮގޮތުގެ މަތިން ހިނގަމުންދާ ވެރިކަމެކެވެ.”
އޭ! އަހަރެންގެ ލޯބިވާދިވެހި ޤައުމުގެ، ލޮބުވެތި ރައްޔިތުންނެވެ! ހޭއަރާށެވެ! މިދުވަސްވަރު އަހަރުމެންނައި ދިމާވެފައިވާ ފައްތަރަކީ، ހަމަޖެހޭ ވެރިކަމުގެ ނިޒާމެއްނެތި ޚުދުމުޚްތާރު، އިސްތިބްދާދީ ވެރިޔަކު، ވެރިކަމުގައި، ބަގުޑިބައްދައި ވަކިތައް ހިތްޕާލައިގެން ހުންނަކޮންމެ ޤައުމެއްގައި ދިމާނުވެ، ނުދާނޭ މަރްޙަލާއެކެވެ. މިއީ ޒިންމާދާރު މަޤާމުތައް ދައުރުވާ ގޮތަށް އޮނިގަނޑު ހަމަޖެހިފައި ނޯންނަ ޤައުމުތަކުގައި އަންނާނެ ފައްތަރެކެވެ. މިފައްތަރަކީ، އިންތިޤާލީ ފައްތަރެވެ. ބަދަލުވުމުގެ ދުވަސްވަރެވެ. މިފަދަ އިސްތިބްދާދީ ވެރިންގެ ކިބައިން، ރައްޔިތުންގެ ބާރު އަނބުރާ ރައްޔިތުންނަށް ލިބިގަތުމަށް، ޖިހާދުކުރާނެ ޖަމާޢަތްތައް އަބަދުވެސް އުފެދޭނެއެވެ. އެއްބަޔަކަށް ފަހު، އަނެއް ބަޔަކު ނުކުންނާނެއެވެ. މިހާރުގެ ޒަމާނީ ބަހުރުވައިންނަމަ، އެމީހުންނަކީ ޤާނޫނުގެ ޙުކުމްތައް ތަންފީޒުކޮށް ދެމެހެއްޓުމަށް ޓަކައި ރިފޯމަށް ގޮވާލާމީހުންނެވެ. އިޞްލާޙަށް މަސައްކަތް ކުރުމަށް ފައުޅުގައި ނުކުންނަ ރިފޯމިސްޓުންނެވެ. މުޞްލިޙުންގެ ޖަމާޢަތްތަކެވެ. މުޖާހިދުން ނެވެ. ފުރިހަމަ މަޝްވަރާ އެކުލެވޭ ޑިމޮކްރެސީއަށް ގޮވާލާ ސިޔާސީޕާޓީ ތަކެވެ. އަދި ސިޔާސީ ޖަމާޢަތްތަކެވެ.
ތިމާވެއްޓަކީ، ނާޒުކު އެއްޗެކެވެ. ދިވެހިރާއްޖެއަށް ތިމާވެށީގެ މައްސަލަތައް މަތިވުމާ ގުޅިގެން، ރާއްޖޭގެ ރައީސުލްޖުމްހޫރިއްޔާ އަލްއުސްތާޒު މައުމޫން އަބްދުލްގައްޔޫމަކީ، މުޅިދުނިޔެއަށް ތިމާވެށީގެ ނާޒުކުކަމާއި ވެށީގެ މައްސަލަތައް ސަމާލުކަމަށް ގެންނެވި އެދުރުމީހާ ކަމުގައި މަޝްހޫރުވުމުގެ ބޭނުމުގައި މަސައްކަތްތަކެއް ފެށިގެންދިޔައެވެ. ކޮންމެވެސް މިންވަރަކަށް އާއިލީ ތިމާގެކަމެއްހުރި، ދިވެހި އަންހެނަކައި އިނދެގެންއުޅޭ ބިދޭސީއެއް އެކުލަވާލި ދިރާސާމަސައްކަތެއް ރައީސްމައުމޫނަށް މާކަމުގޮސް ގެންނެވެ. މިބިދޭސީއަކީ، ތަބާޝީރުކާކާގެ ނަމުން މަޝްހޫރު ދިވެހިތާރީޚު ލިޔުންތެރިޔާ، އަލްމަރްޙޫމް އަބްދުލްހަކީމް ހުސައިންމަނިކުގެ އަންހެންބޭފުޅަކާ ކާވެނިބައްލަވައި ގެންއުޅުއްވި ސްވިސް މީހެކެވެ. އެ ދިރާސާރިޕޯޓުގެ އަލީގައި އެތައް މަސައްކަތްތަކެއް ދުނިޔޭގެ ފެންވަރުގައި ފެއްޓެވުމާ ގުޅިގެންނެވެ. މިކަމުގެ ހަދިޔާއެއްގެ ގޮތުގައި މިއަންހެންބޭފުޅާގެ އާއިލާއަށް އޭނާގެބައްޕަގެ ނަމުގައި އދ.ދަނގެތީ ކައިރީގައި އޮންނަ ވަރަށްރީތި ބޮޑުފަޅުރަށެއް، “ތިމާވެއްޓާ، ތިމާގެރަހްމަތްތެރި ރިސޯޓެއް” ހެދުމަށް، ވެދުމެއްގެގޮތުގައި ދެވުނެވެ. ހަދިޔާކުރެވުނެވެ.
“ޤާނޫނުގައި ކަނޑައެޅިގެން މަނާކޮށްފައިނުވާ ކޮންމެކަމެއް ކުރުމުގެ މިނިވަންކަން ކޮންމެ ދިވެހިރައްޔިތަކަށްމެ ލިބިގެންވެއެވެ. އަދި ޤާނޫނަކުން ހުއްދަލިބިގެން މެނުވީ، އެއްވެސް މީހަކު ކުރާއެއްވެސް ކަމަކަށް ހަމައެކަކުވިޔަސް ހުރަސްއަޅައި ހުއްޓުވައިގެން ނުވާނެއެވެ.”
އަޅުގަނޑު މަތީގައި މިލިޔުނީ، ރައްޔިތުންގެ ބޮޑުމަޖިލީހުގައި މިހާތަނަށް އެންމެހޫނު ގަދަކޮށް ބަހުސްކުރެވުނު މާއްދާއެވެ. އެއީ ވަރަށްކުރުކޮށް ވަރަށްޞަރީޙަ ބަހުން، ކިޔާލަން ވަރަށް ދުލަށް ފަސޭހަކޮށް ލިޔެވިފައި އޮތްދެޖުމްލައެވެ. މިއީ އަލަށް އުފައްދާ އަސާސީގެ ބާބެއް ކަމުގައިވާ “އަސާސީޙައްޤުތަކާއި މިނިވަންކަން” މިބާބުގެ ހަތަރުވަނަ މާއްދާއެވެ. ސުބްޙާނަﷲ އެވެ! ޑްރާފްޓިން ކޮމެޓިގެ މިފަދަ ވިސްނުމަށް ހަލާކުހުއްޓެވެ! އާ އަސާސީގައި މިމާއްދާ ހިމެނިގެންދާނީ، ކޮންހިސާބެއްގައި، ކޮންނަމްބަރެއްގެ ދަށުން ކިތަށްވަނަ މާއްދާގެ ގޮތުގައިކަމެއް އަދިއެއްނޭގެއެވެ.
1932 މ، ވަނަ އަހަރު، ޑިސެމްބަރ 22 ވަނަދުވަހު ދިވެހިރާއްޖޭގައި އަލަށް އިޢްލާން ކުރެވުނު ޤާނޫނުއަސާސީ ނިމޭތާގައި އަޅާނޭ ޢިބާރާތަކާ މެދު، ކުރެވުނު ބަހުސް ހަނދުމަފުޅުހުރީ ބޮޑު މަޖިލީސްގެ ކިތައް މެމްބަރުން ބާވައޭ އަޅުގަނޑުގެ ހިތަށްއަރައެވެ. އާދޭހެވެ! އެކިބޭފުޅުންނަށް ފެނިވަޑައި ގަންނަވާ އެކި ޢިބާރާތްތައް މޭޒުމައްޗަށް ހުށަހެޅެމުން ދެއެވެ. އަލްފާޟިލް ޙުސައިން ޙިލްމީދީދީގެ ދައުރު އަތުވެއްޖެއެވެ. (އަލްފާޟިލް ޙުސައިން ޙިލްމީދީދީ އަކީ އަޅުގަނޑު މެންގެ ރާއްޖެއަށް މިހާރު މަޝްހޫރު އަލްފާޟިލް ޢާރިފްޙިލްމީގެ ލޮބުވެތި ކާފާފުޅެވެ. އިނގިރޭސި ތަޢުލީމުގެ އަރާހުންނެވި ބޮޑު ޢިލްމުވެރި އެކެވެ.) އޭނާއަށް ފެނިވޑައިގަތީ ރައިވަރަކުން ނިންމާލު މަށެވެ. ބައެއް މެންބަރުން ދިޔައީ “އައްޑިހައަށް އަރައިގެންނޭ” ދެންނެވުމުން އެއީ މެންބަރުންނަށް ރައްދުކުރެވުނު އިހާނެތި ބަހެއްކަމުގައި ހިމެނޭނެބާއެވެ؟ ޙުސައިން ޙިލްމީދީދީ ހުށަހެޅުއްވި ރައިވަރަކީ:
ލޮބުވެތި ރައްޔިތުންނޭވެ! ބޮޑުމަޖިލީހުގެ ތަޅުމުގައި އިދިކޮޅުލީޑަރުންގެ ގޮތުގައި އެންމެމަތިހަށި ނަންގަވައިގެން ތިއްބެވި ބޭފުޅުންގެ ގުޅިފައިވާ އަޑަކީ، ހުޅަނގުގެ ޤައުމުތަކުގައި އޮންނަޒާތުގެ ލިބެރަލް ޑިމޮކްރަސީއެއް މި ލޮބުވެތި އިސްލާމީ ދިވެހި ރާއްޖޭގައި ޤައިމުކުރަން މަސައްކަތްކުރާ އަޑެވެ. ގޮވާލާ އަޑެވެ. ގާނޫނު އަސާސީން މިޙައްޤުތައް ވީހާ ލިބަރަލްކޮށް ޒަމީރާއި ހިތުގެއެންމެ ފުޅާމިނަށް އެއްވެސް ޙައްދެއްނެތި، ހުޅުވާ ލުމަށެވެ. ޝަރީޢަތެއް ނެތި، ހުރިހާއެއްޗަކީ، އަސާސީއާއި ގާނޫނުތައް ކަމުގައި ހެދުމެވެ. އިސްލާމީ ޝަރީޢަތުގެ ހުކުމެއްގެ ވާހަކަ އެއް ނުދައްކައެވެ. އަބަދުވެސް ދައްކަނީ، އަދި، އިވޭއަޑަކީ، “ރޫލް އޮފްދަ ލޯ” (ގާނޫނުގެ ހުކުމް) ގެ ވާހަކަ އެވެ. މިއީ އިސްލާމީ ޝަރީޢަތް އޮއްބާލާއި ނެތިކޮށް ލުމަށް، ބޭނުންކުރާ އިސްޠިލާޙެކެވެ. އިސްލާމީ ޝަރީޢަތް ވަޅުޖައްސާލުމަށް ގެންގުޅޭ ބަހެކެވެ. މިއިސްޠިލާޙު އެންމެ ފުރަތަމަ ބޭނުންކުރަންފެށީ، ޞަހުޔޫނީ ޔަހޫދީންނެވެ.
