އިލްޔާސްހުސައިންއިބްރާހީމް. (ލިޔުނީ 6އޮކްޓޯބަރ 2008ގައި.)
ޑީއާރުޕީގެބަހުންނަމަ، “ފުރިހަމަ މަރުހަބާއެކެވެ. އެކުވެރިމާހައުލެކެވެ. އުފާވެރިރެއެކެވެ. ރަނިންމޭޓުންގެ ބަހުސްގައި ތަސްމީނު ރަސްކަންކުރެއްވި ރެއެކެވެ. ވިލިމާލޭގައި މައުމޫނު ކުޅަދާނަކަން ދައްކާލަދިން ރެއެކެވެ.” މިޖުމްލަތައް ތަކުރާރުކުރަން އަޅުގަނޑު ލަދުގަނެއެވެ. ބޭނުމެއް ނުވެއެވެ. އެހެނަސް އެމީހުންގެ ސިޔާސީ ވިސްނުމާއި ފެންވަރު ހާމަކޮށްލުމުގެ ގޮތުން ލިޔެލީއެވެ.
ރައީސް މައުމޫނު، 2008 ސެޕްޓެމްބަރ 27 ވަނަދުވަހުރޭ ޓީވީއެމުން އިންތިޒާމު ކޮށްގެންބޭއްވި ރަނިންމޭޓުންގެ ޝޯބެއްލެވީ، އެނާގެ ކަނާތްފަރާތުގައި އަލްމަރުހޫމް ބޮޑުބެއިބްރާހީމް ކަލޭފާނުގެ ދަރިކަލުން އަލްފާޟިލް މުހަންމަދު އިބްރާހީމާއި މޯލްޑިވްސް ސޯޝަލްޑިމޮކްރަޓިކް ޕާޓީގެލީޑަރ އަލްފާޟިލް ރީކޯއިބްރާހީމްމަނިކު (މީހުންމަގު ފުރައްދާއި މީހުންގެ ސިކުޑިތަކާ ކުޅެލުމަށް ވަރަށް މަޝްހޫރު ދެއެދުރުން) ބައިންދައިގެން ވިލިމާލެ ސްކޫލްތެރޭގައި ޑީއާރުޕީ ސަޕޯޓަރުންނާ އެކުގައެވެ. މިފަދަ މަންޒަރުތަކަކީ، ރައީސް މައުމޫނުގެ ޒައާމަތު ރޫޅިފައި އޮތްވަރު ދައްކުވައިދޭ ތަސްވީރުތަކެވެ. ވައްތަރީ ރައީސް މަހަންމަދު އަމީނުގެ ވަންމޭން ޝޯތަކާއެވެ. މުތަގައްދިމްޕާޓީގެ ދުވަސްވަރާއެވެ. ޑީއާރުޕީއަށް ސަޕޯޓްކުރާ ބޭފުޅުން، މިޖަލްސާތެރޭގައި، ބައެއް ރަނިންމޭޓުން ދެއްކެވި ވާހަކަފުޅުތަކަށް މަލާމާތްކޮށް ހަޖޫކިޔާއި ބާރަށްހީހެދުމާ ގުޅިގެން، އެމްޑީޕީ އިއްތިހާދުގެ އެކްޓިވިސްޓަކު ރައީސް މައުމޫނުގެ އިސްތިއުފާއަށް އަޑުހަރުކޮށް ގޮވަންފެށީމާ، ސިފައިންނާއި ފުލުހުންވެގެން އެނާ ސްކޫލްތެރެއިން ނެރެލިއެވެ. އަދި އޭނާއަށް ބިޑިދައްކައި ބިރުގަންނަވާ ހެދިއެވެ. މާފޯރިގަދަވުމުން ބަޔާނެއްނުނަގާ ދޫކޮށްލީއެވެ. ފަހެ، ރަނިންމޭޓުންގެޝޯ ބަލައިނިމިގެން ވާހަކަދައްކަވަން ފެއްޓެވީ ރައީސް މައުމޫނެވެ. ހުންނެވީ އާދަޔާޚިލާފަށް ކޯފާވެފައެވެ. ބައްލަވަމުން ގެންދެވިޝޯއިން ކޮށްފައިވާ އަސަރުތަކުންނެވެ. ޚާއްސަކޮށް އެމްޑީޕީ އިއްތިހާދުގެ ރަނިންމޭޓުގެ ކާމިޔާބު ވާހަކަތަކުންނެވެ. މިވާހަކަފުޅުގެ އަމާޒަކަށް ހެއްދެވީ، އެމްޑީޕީ އިއްތިހާދުގެ ކެނޑިޑޭޓް އަލްފާޟިލް މުހަންމަދު ނަޝީދާއި އޭނާގެ ރަނިންމޭޓް ޑޮކްޓަރ މުހަންމަދު ވަހީދު ހަސަންމަނިކާއި އަދާލަތުޕާޓީގެ ރައީސް އަލްއުސްތާޒު ހުސައިންރަޝީދު އަހްމަދެވެ. ޖުމްލަކޮށް އެމަނިކުފާނުގެ ވާހަކަފުޅަށް ނަޒަރުކުރާއިރު ފެންނަނީ، ރައީސްމައުމޫނުގެ ލޭފޮދު މައްޗަށް ގޮސްފައި ވާތަނެވެ. ހީފުޅު ކުރައްވާގޮތަށް އެއްވެސްކަމެއް ނިމިގެން ނުދާތަނެވެ.
ފަހެ، ރާއްޖޭގެ ދަންނަބޭކަލުންގެ ތެރެއިން 44 ބޭކަލުން ސޮއިކުރައްވައިގެން ނެރުނު ފަތުވާބަޔާން ޗާޕުކޮށްގެން ލުއިފޮތެއްގެ ސިފައިގާބަހާ ހަދައިގެން ވަރަށްމަލާމަތް ކުރެއްވިއެވެ. އަދި 1988 ނޮވެންބަރ 3 ގެހަމަލާއަކީ، އަންނިއާގުޅުންހުރި ހާދިސާއެއްކަމުގައި ވިދާޅުވިއެވެ. އަދި ޑޮކްޓަރ ވަހީދާގުޅިގެން ހަގީގަތާޚިލާފު ދޮގުވާހަކަތަކެއް ދެއްކެވިއެވެ. ވަހީދުގެ ބޮލުގައި 1990 ވަނައަހަރު މާލެތެރޭގައި ރައީސް މައުމޫނުގެ ޅިޔަނެއް އަޑީގައި ހުންނަވައިގެން ބިންބިފޯހުގެ އަތެއްވާގޮތަށް ކުދިބަޔަކު ލައްވާރާވައިގެން ހިންގި އަލިފާނުގެ ހާދިސާތަކާއި އެއަހަރުއޮތް ސާކުސަމިޓް ބޭއްވިތަން، ދަރުބާރުގެ ގޮއްވާލަން މަސައްކަތްކުރިކަމުގެ ތުހުމަތު އެޅުވިބަޔަކާ، ޑޮކްޓަރ ވަހީދުއާގުޅުން ހުރިކަމުގެ ހެކިތަކެއް ސަރުކާރަށް ލިބިފައި ހުރިކަމަށް ވިދާޅުވެ ވަރަށް ކޯފާއިސް ކުރެއްވިއެވެ. ކަމެއްދިމާވާއިރަށް އަދިވެސް ގައުމުދޫކޮށް، ވަހީދު ފިލާނެކަމަށް ވިދާޅުވިއެވެ. އެފަހަރު ފިލައިގެންދިޔައީ އެޑިއުކޭޝަން މިނިސްޓަރުކަން ނުދިނީމާ ކަމަށްވެސް ވިދާޅުވިއެވެ. ފަހެ، މިވާހަކަތައް ގަބޫލުކުރާނީ ކާކުތޯއެވެ. ވިލިމާލޭގެ މިބައްދަލުވުމުން ހާސިލުވި އެއްޗަކީ، ރައީސް މައުމޫނުގެ ފެންވަރުދަށްކަމެވެ. ކުރީގައި އެހުންނަ ޝަޚުޞިއްޔަތު މިހާރު ނެތްކަމެވެ. ގެއްލިއްޖެކަމެވެ. ހާމަކަންބޮޑުކޮށް ހަގީގަތާޚިލާފު ދޮގުވާހަކަތައް ދައްކަވާކަމެވެ.
އަދި ޑީއާރުޕީގެ ޑެޕިއުޓީމީޑިޔާ ކޯޑިނޭޓަރ އަލްފާޟިލް އަލީވަހީދު ވަރަށްގިނަ އިސްޓޭޖުތަކުގައި މިވާހަކަތައް އެބަދައްކަވައެވެ. ބޮޑެތިދޮގުތައް އެބަހާމަކުރަމުން ގެންދެއެވެ. ފަހެ މިދޮގުތައް ރައްޔިތުންނަށް އޮޅުވާލުމަށްޓަކައި ނުހެދިޔަސް، އޭނާއަށް ޑީއާރުޕީގެ ޖިންސުން ލަތީފުންކޮޅެއް ގޮވައިގެން، ހުޅުމާލެއަށް އަޅާބްރިޖްމަތިން ދުއްވާފައި ދެވިދާނެއެވެ. ރައީސް މައުމޫނު ރިޔާސީ ގަނޑުވަރުން ކާރުކޮޅެއް ފޮނުއްވައި ދެއްވަފާނެއެވެ. 3 ނޮވެމްބަރު ހަމަލާއައި، އަންނިއާގުޅުވައި އޭނާގެބޮލުގައި ގިނަޖުވާނުންތަކެއް ގަތުލުކޮށް މަރާލިކަމުގެ ތުހުމަތު އެޅުވޭނެއެއްވެސް ގޮތެއްނޯންނާނެއެވެ. އެއްވެސް ޖާގައެއްނެތެވެ. އެއީ އެމްޑީޕީ އިއްތިހާދުގެ ތާއީދުބޮޑުކަމުން ހަސަދަވެރިވާތީ، ރައްޔިތުންނަށް އޮޅުވާލަންވެގެން ދައްކާދޮގުވާހަކަ ތަކެވެ. ކަޅުގަމީސް ލައިގެންހުރެ އެމްޑިޕީ އިއްތިހާދުގެ މެނިފެސްޓޯނަގާ އެއްލައިލާ، 3 ނޮވެންބަރުގެ ފޮތްކިޔާލުމަށް ބުނެގޮވާލާކަށް ލަދެއްނުގަނެއެވެ. ފަހެ، ވަރަށް އިހްތިރާމާއެކު “މުންދު” އެވިދާޅުވާ، ކުޅުދުއްފުށީގެނަން ދިވެހިޖައްވަށް ވިދުވާލި ޝަހީދު ހުސައިން އާދަމްގެ ލޮބުވެތިބައްޕަ އާދަމްބެއަށް ހިތުގެއަޑިން ދަންނަވާލަމެވެ. އެޒުވާން ދިވެހިބަތޮލު މަރާލީ އަންނިއެއްނޫނެވެ. އަދި އަންނިގެތިމާގެ މީހެއްވެސްނޫނެވެ. ފަހެ އޭނާއަކީ ދިވެހި ގައުމުގެ ދިފާއުގައި ކެރިގެން ފާޅުގައިނުކުމެ އަތުގައިހުރި މަދުވަޒަންކޮޅު ހުސްވުމުން، އިތުރު މެގެޒީނެއް ހޯދައިގެންނުކުމެ، ތަމަޅަބާޣީންނައި ކުރިމަތިލެއްވި ވަރަށްހިއްވަރުގަދަ ހަމައެކަނި ބަތޮލެވެ. އެހެންމީހުން ފަހަތަށް ދެމިގަނެފިލިހެން ޝަހީދުހުސައިން އާދަމަށްވެސް ފަހަތަށްޖެހި ފިލެންއޮތެވެ. އެހެނަސް އެބަތޮލު އެހެންނުހަދައި، ފަހަތަށްނުޖެހި އިތުރުވަޒަން ހޯދައިގެން ކުރިމަތިލެއްވީ، ސިފައިންގެ މައިމަރުކަޒުގެ ދިފާއުގައި ޝަހީދުވާށެވެ. ﷲގެ ހަޒްރަތަށް ތާއަބަދަށް ދިއުމަށެވެ. ފަހެ އެމާތްމަތިވެރި ޝަހީދަކީ، މީހަކުނުކުމެ ބަޑިއެއްޖަހާ މަރާލިމީހެއްނޫނެވެ. ހަނގުރާމަކޮށް ޝަހީދުވެގެންދިޔަ އަގުހުރި ބަތޮލެކެވެ. އެބަތޮލަކީ، ވަރަށްކެރިގެން ދުޝްމަނުންނައި ކުރިމަތިލައި އަމިއްލައަށް ޝަހީދުވި ދިވެހިދަރިއެކެވެ. ދިވެހިން އެބަތޮލަށް އަބަދާއިއަބަދުވެސް އެމަތިވެރި ދަރަޖައަރުވާނެއެވެ. ފަހެ، “މުންދު” އަށް ދަންނަވަމެވެ. މުންދުގެ ގެވާޖިބަކީވެސް، އާދަމްބެއަށް މިމެސެޖުދީ ހައްގުގޮތުގައި ދެމިހުންނެވުމަށް އިތުރުހިތްވަރު ދެއްވުމެވެ. ކަންކަން އޮޅުވާލައިގެން އެއްބަޔަކު އަނެއްބަޔަކާ ޖެއްސުމުގެ ރޯލުތައް ކުޅޭކަށް ނުޖެހެއެވެ. ފަހެ، އަޅުގަނޑު މިއިޝާރާތްކުރީ 2008 އޮކްޓޯބަރ 5 ވީއާދީއްތަ ދުވަހުގެރޭ ހެދިގޮނޑުދޮށުގައި މުންދުއާއި އަލީވަހީދު ދެއްކެވި ނާތަހުޒީބު ވާހަކަތަކަށެވެ. އޮނަރަބްލް ހަސަންސައީދާއި އޮނަރަބްލް އަހްމަދު ޝަހީދާއި އަދިވެސް ބައެއްމީހުންގެ ވާހަކަތައް އަޑުއަހައި އަތްތިލަބަޑިޖަހާއި މަލާމަތްކޮށް ހެދިދާނެއެވެ. އެހެނަސް އެމްޑިޕީ އިއްތިހާދުގެ ކެންޑިޑޭޓާއި ރަނިންމޭޓާގުޅިގެން އެހެންދައްކާނެ އެއްވެސް ވާހަކައެއް ނޯންނާނެކަން ކަށަވަރެވެ.
ފަހެ ދަންނާށެވެ! ޑީއާރުޕީގެ މިވާހަކަތަކަށް އަޅުގަނޑު ދަންނަވަން އޮތްޖަވާބަކީ، ރިޔާސީ އިންތިޚާބުގެ ދުވަސްވަރުގައި މިހާފަހުން ތިޔަވާހަކަތައްގޮވައި ތިޔަނަންގަވަނީ، މަނިކުފާނުގެ ލަދުހަޔާތް ކުޑަކަމުންނެވެ. ގޮތެއްނެތުމުންނެވެ. ވެރިއެއްގެ ގަދަރާއި ފެންވަރުނެތް ކަމުންނެވެ. ފަހެ، ދަންނަވަންތޯއެވެ! ފިސްތޯލައެއް ރާއްޖެއެތެރެ ކޮށްގެން ރާއްޖޭގެވެރިމީހާ މަރާލައި ނައްތާލަން މަސައްކަތް ކުރިކަން ސާބިތުވެފައިވާ ޓީމުތެރޭގައި، ޑީއާރުޕީގެ ރަނިންމޭޓުގެ ބައްޕާފުޅު އަލްފާޟިލް މިނާކުޑޭ ހިމެނޭކަމަށްވެއެވެ. އަމަލީގޮތުން އެކަމުގައި ބައިވެރިވެ ލެއްވީވެސް އެމީހުންކަމަށް ބެލެވުނެވެ. ފަހެ، ދަންނާށެވެ! 1988 ނޮވެމްބަރ ތިނެއްގެ ހާދިސާގައި މަރުވިހުރިހާ ދިވެހިންމެރީ، އަންނިއެއްނޫނެވެ. އަންނިގެ ބޮޑުބޭބެއާއި ތިމާގެމީހުންނެއް ނޫނެވެ. ޑޮކްޓަރ ވަހީދެއްނޫނެވެ. އޭނާގެ ތިމާގެމީހުންނެއް ނޫނެވެ. ބޮޑުސިއްކަ އެއްވެސްނޫނެވެ. ފަހެ، ސަރަންދީބުގެ ތަމަޅައިންނަށް މިހާދިސާ އެހާކާމިޔާބުކޮށް މާލެއަރައި ހިންގުނީ، މަނިކުފާނާއި މަނިކުފާނުގެ ޑިފެންސް މިނިސްޓްރީއާ ހަވާލުވެ ހުންނެވި މަނިކުފާނުގެ ޅިޔަނު އޮނަރަބްލް އިލްޔާސް އިބްރާހީމައި ދެމީހުންގެ އިހުމާލުންނެވެ. އެފަދަކަމެއް ހިންގަން އުޅޭކަމުގެ ސިއްރު މައުލޫމާތު ކުރިންލިބުނީމާވެސް އެއްވެސްކަހަލަ ސަލާމަތީ ވިޔަވަޅެއް އަޅުއްވާފައި ނެތުމުންނެވެ. ފަހެ، ގެއެއް ނުވަތަބިނާއެއް ނުވަތަސަރުކާރެއް ބަލަހައްޓަން ޒިންމާދާރުކޮށް ހަވާލުކޮށްފައި ވަނިކޮށް ބަޔަކުމީހުން އެތަނަށްވަދެ ލޫޓުވާލާއި މީހުންމަރައި އެތަންޚަރާބުކޮށް ސުންނާފަތި ކޮށްލައިފިނަމަ، އެކަމުގެ ޒިންމާއުފުލަންޖެހޭނީ އެކަމުގެ މަސްއޫލިއްޔަތާއި ޒިންމާއާ ހަވާލުވެގެންހުރި މީހާނޫންތޯއެވެ. އިހުމާލުވެއްޖެކަމުގެ ޒިންމާއެޅޭނީ އެކަމާހަވާލުވެހުރި މީހާގެބޮލުގައި ނޫންތޯއެވެ. 3 ނޮވެންބަރުގެ ހާދިސާއާ ގުޅިގެން ހަގީގަތުގައި ރަނގަޅަށް ތަހުގީގުކޮށް ބެލިއްޖެނަމަ، މަނިކުފާނާއި މަނިކުފާނުގެ ޅިޔަނު އިލްޔާސް އިސްތިއުފާ ދެއްވަން ޖެހޭނެއެވެ. ފަހެއެކަމަކީ، ރައްޔިތުންގެ މަޖިލީހުންވަރަށް ތަފުސީލުކޮށް ބަލަންޖެހޭނެ ކަމެކެވެ. ކަންމިހެން އޮތަސް އެއްވެސްލަދެއް ހަޔާތެއްނެތި ގާނޫނުއަސާސީ މުށުތެރެއަށް ލައްވައި ބޭނުންހާ ގޮތަކަށް ތިޔަހުންނެވީ ރާވާލައްވައިގެން ނޫންތޯއެވެ. ފަހެ، އެހަމަލާހިނގިވަގުތު މާލޭތެރެއިން މަރުވި މީހުންމަރުވީ، ސިފައިންގެ މަރުކަޒު ތެރެއިން ގޮތެއްފޮތެއް ނުބަލާ ބުރުއްސަމުން، އޮއްސަމުން ގެންދިޔަވަޒަން ތަކުންނެވެ. އެމްވީ ޕްރޮގްރެސް ލައިޓުގައި ތިބިމައުސޫމް ކުށެއްނެތް ދިވެހިންމަރުވީ، އިންޑިޔާމަނަވަރު ގޯދާވަރީއަށް ގެންގޮސްފައިތިބި ދިވެހިސިފައިން ދުރުމީގައި ތިބެގެން އެންގިގޮތަށް، މަނަވަރުގެ ހަތަރު އިންޗީގެ ބޮޑުބަޑިތައް ޕޮއިންޓަށް، ޓާގެޓަށްތަޅަމުން ގެންދިއުމުންނެވެ. ޕްރޮގްރެސްލައިޓު ތެރޭގައި ތަމަޅައިން ގަސްދުގައި މަރާލިމީހާވެސް މަރާލީ ބައިނަލް އަގްވާމީ ކަނޑުގައިތިބެ ދެފަރާތުން ދެކެވުނު ވާހަކަތަކަށް ދޭންޖެހޭ ފުރިހަމަ ސަމާލުކަންނުދީ ހަމަލާއަށް ތައްޔާރުވެ އިސްނެގުމުންނެވެ. އެމީހުންބުނާގޮތުގައި ސަލާމަތީ އައްސޭރިއަކަށް ދެވުނުހާއަވަހަށް ހުރިހާހޮސްޓެޖުން ފުރިހަމަސަލާމަތާއެކު ދޫކޮށްލެވޭނެއެވެ. އަލްފާޟިލް އިސްމާއީލްނަސީރު މއ.ބޯގަންވިލާގައި މިހާރުވެސް އެއޮންނެވީއެވެ. އައްސަވާ ބައްލަވާށެވެ. އޮނަރަބްލް އަހްމަދު މުޖްތަބާއާއި އޭނާގެ ލޮބުވެތި އަނބިކަނބަލުން ދުނިޔޭގައި އަދިވެސް އެތިއްބެވީއެވެ. ނިކަން އައްސަވާ ބައްލަވާށެވެ. ކުށެއްނެތް މައުސޫމް ދިވެހިންގަޔަށް ބަޑިޖަހާމެރީ އަންނިތޯއެވެ؟ ނުވަތަބޮޑު ސިއްކަތޯއެވެ؟ ނުވަތަ އެކަންހިނގާދިޔައީ ރައީސްމައުމޫނުގެ އިހުމާލުންތޯއެވެ؟ ނުވަތަ ރައީސް މައުމޫނުގެޅިޔަނު އިލްޔާސްގެ އިހުމާލުންތޯއެވެ؟ ފަހެ އެންމެންވެސް ބަދުނާމުކުރާނީ ރައީސްމައުމޫނެވެ. ދެވަނަމީހެއް ނޫނެވެ.
ފަހެ ދަންނާށެވެ! ދަރުބާރުގެ ގޮއްވާލަން އުޅުނޭކިޔައިގެން ތިޔަދައްކަވާ ވާހަކަތަކާއި ތިޔަވިދާޅުވާ ބަޔާންތަކަކީ، އޭރުގައި ބަންދުކުރިމީހުންގެ ތަހުގީގުކުރި ސިފައިން އަމިއްލައަށްލިޔެ ވަގުސޮއިހަދައިގެން ކޮށްގެން ގައުމީ ޓީވީންނާއި ރޭޑިޔޯއިން ދައްކާކިޔާހެދި މުޅިންދޮގު ބަޔާންތަކެކެވެ. އޭރުޖަލުގައިތިބި ރާއްޖޭގެ އިސްލާހަސް ގޮވާލާއި އަމަލީގޮތުން މަސައްކަތްކުރި މީހުންތިބީ، ހަފޫޓުތިންފޫޓު ޓިނުގޮޅީ ތަކެއްގައި ޖަނަވާރުތަކެއްހެން އަތުދެމުލައްދަނޑި އެކުގައިބަނދެ އޮޅުއަޅާފައެވެ. ފެންވަރުވަން ނެރެނީ ކޮންމެހުކުރު ދުވަހެއްގައެވެ. ފަނަރަމިނެޓަށެވެ. ތިބެންޖެހެނީ ހީސިއާއިސީނުދޮވެ ނުތާހިރުކޮށެވެ. މީއަނިޔާތަކުގެ އިތުރުން، މިރުސްދުމުގެ އަޒާބާއި ނިދިޔަނުދިނުމަށް އަކިރިޑަބިޔާ ނިދާގަޑިގަޑިޔަށް ގަހެއްގައި އެލުވައިގެން ބަރާބަރަށް ތަޅުވާނެއެވެ. ޑަބިޔާތަޅުވަނީ ވާފެއްސުމުގެ ނަމުގައެވެ. މިރުސްދުންއަޅަނީ މަދިރިފެއްސުމުގެ ނަމުގައެވެ. މިހާލަތުގައި ތިބޭއިރު ކާންޖެހެނީ ރޭގަނޑުނަމަ ކަޅުއަނދިރީގައި ބުޅާކަހަލަ ޖަނަވާރުން ކާގޮތަށް އަނގަޖަހައި ގެންނެވެ. ރާއްޖޭގައި ރިފޯމަށް މަސައްކަތްކުރި ވަރަށްގިނަމީހުން އެފަހަރު ޖަލަށްލިއެވެ. ފަހެ އެމީހުން، ގެރިކިރު ހުސްކުރިދަޅެއްގައި ގެވެހިބޮމެއްހަދައި ގޮއްވާލީ، ސަރުކާރުގެ އެހީއާއިމަދަދުލިބިގެން އޭރުމާލެ ތެރެއަށް ނުކުމެއުޅުނު ބިންބިފޯހުގެ ނޮހޮރުއްޕާން އިންތިހާއަށް ބޮޑުވެގެން ދިޔައިމައެވެ. ފާޅުގައި މަރުގެ އިންޒާރުދީ ދުއްތުރާތައް ކުރާއިރު ސިފައިން އެކަންތަކާ އަޅާނުލުމުންނެވެ. ދަޅުބޮން ހެދީވެސް އަދި ބޭނުންކުރީކީ ވެސް ދަރުބާރުގެ ގޮއްވާލާކަށް ނޫނެވެ. ދަރުބާރުގޭގެ ވާހަކައަކީ، ސަރުކާރުން އުފައްދައިގެން އުޅުނު، މުޅިންދޮގުވާހަކަ ތަކެކެވެ. ތިޔަވިދާޅުވާހާ ސާބިތުހެކި ހުރިނަމަ ޑޮކްޓަރ ވަހީދު ފުރިޔަދެއްވީ ކީއްވެގެންތޯއެވެ؟ ހަމައެހެންމީހުންނެކޭ އެއްގޮތަށް އަނިޔާކޮށް ކުޑަގޮޅިއަށް ވައްދައި ދައުވާ ކުރެއްވިދާނެ ނޫންތޯއެވެ. ކިތައްރޭ ޑިފެންސަށް، ވަހީދުގެންދަވައި އިރުއަރަންދެން ހައްޔަރުކޮއްގެން ގެންގުޅުނު ތޯއެވެ؟ ފުރަންވެގެން މަތިންދާބޯޓަށް އަރައަރާހުއްޓައި ހުއްޓުވާ ސިފައިންގެއަށް، ޑިފެންސް މިނިސްޓްރީއަށް ގެންދެވިންތޯއެވެ؟
ފަހެ، ދަންނަވަންތޯއެވެ. ވެގެންއުޅޭގޮތަކީ، އަނިޔާވެރިވެ، ޖައްބާރު ވެގެންގޮސް ރައްޔިތުންގެ ލޯތްބާއި ތާއީދުގެއްލި، ސިޔާސީ ގޮތުންނާއި ބާރާއިނުފޫޒުގެ ގޮތުންބަލިވެ، އިންސާނާ ހިސާބަށްވުރެ އެކަހަށި ވާންފެށީމާ، ކޮސްގޮވާއި ހަގީގަތާޚިލާފު ދޮގުވާހަކަތައް ދައްކަން ފެށީއެވެ. ދިވެހިރައްޔިތުން އެކަންދަނެއެވެ. ގަބޫލުކުރެއެވެ. 8 އޮކްޓޯބަރު 2008 (ބުދަ) ގައި އޮންނަރިޔާސީ އިންތިޚާބުގައި ރައްޔިތުންގެ ތާއީދާއި ރުހުންލިބިގެންދާނީ، އިރާދަކުރެއްވިއްޔާ އެމްޑީޕީ އިއްތިހާދަށެވެ. އެކަމާހަސަދަ ވެރިވެ ދެރަވާކަށް ނުޖެހެއެވެ. އަސަރުކުރާކަށް ނުޖެހެއެވެ. ވެރިކަމަކީ އަމިއްލަފުޅު މިލްކެއް ނުވަތަ ވަކިބަޔެއްގެ މިލްކެއްނޫނެވެ. ﷲގެ އިރާދަފުޅުން ރައީސް މައުމޫނަށް ޖެހޭނީ މިއިންތިޚާބުގައި ބަލިވާށެވެ. ދުރަށްޖެހޭށެވެ. ﷲ، އަޅަމެންނަށް ސިޔާސީގޮތުން ތެދުމަގުގައި ސާބިތުކަން ދެއްވާށިއެވެ! އާމީން!