އިލްޔާސްހުސައިން އިބްރާހީމް. (ލިޔުނީ: 2008 ސެޕްޓެމްބަރ 28 ގައި)
މިސުރުޚީއަކީ، ރައްޔިތުން މަޖިލިސްކުރާގޭގައި 1980 އެޕްރީލް 28 ވަނަދުވަހު، ރައްޔިތުންގެ މަޖިލީހުގެ އިއްޒަތްތެރި މެންބަރުންގެ ކުރިފުޅުމަތީގައި، ރައީސް މައުމޫނު 1978 ނޮވެމްބަރ 11 ވީދުވަހު ދިވެހި ޖުމްހޫރިއްޔާގެ ވެރިކަމާހަވާލުވެ ވަޑައިގެންނެވުމަށް ﷲ ގަންދީހުވާ ކުރެއްވިއިރު ގާނޫނާޚިލާފަށް ހަތިޔާރު ގެންގުޅުއްވިކަމަށް އަމިއްލަ ބަހުން އިއުތިރާފުވެ ވަޑައިގެންނެވި އިގުރާރުގެ އެއްޖުމްލައެވެ. އިއުތިރާފުވެ އެއްބަސްވެ އިގުރާރުވެވަޑައި ގެންފައި މިވަނީ، އެއަމަލު ކުރެއްވިތާ ބަރާބަރުދެއަހަރު ފަހުންނެވެ. އަޅުގަނޑު މިމަޒްމޫނުފަށާނީ މިއިއުތިރާފު ވުމުގެ އެއްބަސްވުން އެކުގައި ގެނެސްދީފައެވެ. ފަހެ، މިއީ ރައީސްމައުމޫނުގެ އިމިއްލަބަހުން އޭނާވެފައިވާ ވަރަށްސަރީހަ އެއްބަސް ވުމެކެވެ. ރުޖޫއަނުވެވޭނެ އިއުތިރާފެކެވެ.
“އެރޭމިތަނަށް ހުވާކުރަން އައިއިރު، އަޅުގަނޑުގެ ވަރަށް އެކުވެރި ވަރަށްގާތް ހައެއްކަބޭފުޅުން އަތްޕުޅުގައި ހަތިޔާރުވެސް ހުންނާނެ. އެއީއެއްވެސް ކަމެއްދިމާވެއްޖިއްޔާ ހަމަވަގުތުން އެރޭވެސް އަޅުގަނޑުމެން ގަސްދުކުރީ ރައްޔިތުންއެކަން ނިންމާފައިއޮތްގޮތަށް ކަންތައްގެންދަން. އެއްވެސްމީހެއްގެ ބިރުދެއްކުމަކަށް ބިރުނުގަންނަން. ގާނޫނީގޮތުން ރައްޔިތުން އަޅުގަނޑު ހޮވާފައިވާތީ އަޅުގަނޑު ގަސްދުކޮށްފައިއޮތީ ކޮންމެކަމެއް ދިމާވިއަސް އެކަމުގައި ހުންނަން. އެހެންވީމާ އޭރުގެގޮތުން ބަލާއިރު އެރޭއެކުރެވުނީ ޣައިރުގާނޫނީ ކަމަކަށްވެސް ވެދާނެ. އޭރުއަދި އަޅުގަނޑު ރައީސްކަމާ ހަވާލެއްނުވަން. އެހެންނަމަވެސް އަޅުގަނޑުއަތުގައި ހަތިޔާރުހުރި. އަދި އަޅުގަނޑު މިދެންނެވި މީހުންގެ އަތުގައިވެސް ހަތިޔާރުހުރި”
އާދެ! މިޣައިރުގާނޫނީ ކަންތައް ކުރެއްވިވަގުތާއި އޭގެދެއަހަރުފަހުން މިނުބައި އަމަލަށް އިއުތިރާފުވެ، އިގުރާރުވެ ވަޑައިގެންނެވިއިރު އަޅުގަނޑުހުރީ ކިޔަވާކުއްޖެއްގެ ގޮތުގައި ޕާކިސްތާނުގަ އެވެ. އެހެނަސް މިވާހަކަތަކަކީ، އަޅުގަނޑު ވަރަށް އިހުތިރާމްކުރާ އަޅުގަނޑުގެ އުސްތާޒަކު އަޅުގަނޑަށް އަކުރުން އަކުރަށް ވިދާޅުވެދެއްވި ހަގީގީވާހަކަ ތަކަކަށްވާތީ މިއަދުގެ ސިޔާސީ މަސްރަހަށް މިވާހަކަތައް މަޒުމޫނެއްގެ ސިފައިގައި ގެނެސްދޭ ހިތްވީއެވެ. މިއީ އަޅުގަނޑުގެ އުސްތާޒު ރިވާކުރެއްވި ގޮތެވެ.
ފަހެ، ދެކެދެނެތިބެ ދަންނާށެވެ! ބަޑިއެއް ހިއްޕަވައިގެން ހުންނަވައި ﷲގެ ރަސްކަންފުޅު ގަންދީ އަލްއުސްތާޒު މައުމޫނު އަބްދުލްގައްޔޫމު ދިވެހިރާއްޖޭގެ ރައީސުލް ޖުމްހޫރިއްޔާ ކަމައި ހަވާލުވެ ވަޑައިގެންރޭ، އާދެ! އެބިރުވެރި ފުރަމެންދަމު، އެމަނިކުފާނުގެ އަތްޕުޅުގައި ހަތިޔާރުހުރި ކަމަށާއި އަދި މައުމޫނުގެ ރައްޓެހިބައެއް ބޭފުޅުންގެ އަތުގައިވެސް ހަތިޔާރު ހުރިކަމަށް ވިދާޅުވިވިދާޅުވުން ތަސައްރަފު ފުދޭހެޔޮ ހާލުގައިހުރެ އަޅުގަނޑުވެސް އަޑުއެހީމެވެ. ދަންނަވަންތޯއެވެ. މިއީއެކަމަކު މާފަހުގެރެއެކެވެ. މިވާހަކަ މިދެއްކެވީ، ދިވެހިރާއްޖޭގެ ރައްޔިތުންގެ މަޖިލިސްގައި އަނެއްކާވެސް ތާރީޚީރެއެއްގައެވެ. އާދެ! ނުފޯދޭރުކެއްގެ އެތްހޯއްދެވީ ވެސް އެރެއެވެ. ރައީސްނާސިރުގެ ބޮލުގައިބޮޑު ބަޣާވާތެއްގެ ކުށްއެޅުވީވެސް އެރެއެވެ. އަޅުގަނޑު ޓީވީކާރީގައި އަޑުއަހަންއިނީމެވެ. އަޅުގަނޑު މެންނަކީ، އޭރުރައީސް މައުމޫނުދެކެ ވަރަށްލޯބިވާ، ރައީސްމައުމޫނަށް ވަރަށްތާއީދުކޮށްގެން ތިބިބައެކެވެ. އެކަމަކު ދަންނަވަންތޯއެވެ. މައުމޫނު ބަޑިއެއް ހިއްޕަވައިގެން ހުންނެވިވާހަކަ ވިދާޅުވުމާއެކު، އެތަނުގައިއިން، އަޅުގަނޑުގެ ފުރެންޑެއް ދިޔައީ ސިއްސައި ގެންނެވެ. ފަހެ، އޭނާއަޅުގަނޑު ކާރީބުންޏެވެ. މާތްކަލާކޯއެވެ! އެދެއްކެވީ އަނެއްކާކޮންފަދަ ވާހަކަފުޅެއް ބާވައެވެ! ދަންނަވަންތޯއެވެ. އެވާހަކަފުޅަކުން އަޅުގަނޑުމެން މައުމޫނަށްކުރާ ސަޕޯޓަކަށް އިތުރުއެއްވެސް ބަދަލެއްނާދެއެވެ.
ފަހެ، މިހާދިސާ މިގޮތަށް ހިނގާފައިވަނިކޮށް އަޅުގަނޑުގެ ވަރަށްގާތް ރަހްމަތްތެރިއެއް ކަމުގައިވާ އަލްމަރުހޫމް ސިއްކަގޭ ހުސައިންމަނިކުފާނު ތަންކޮޅެއްފަހުގެ ދުވަހެއްގައި އަޅުގަނޑަށް ކިޔައިދެއްވި ވާހަކައެއް، މިހާރުވެސް އަކުރުން އަކުރަށް އަޅުގަނޑު ހަދާންއެބަހުއްޓެވެ. ހުސައިން މަނިކުފާނަކީ، ހަމައަޅުގަނޑު ފަދައިން ރައީސް މައުމޫނަށް ވަރަށް ސަޕޯޓުކުރައްވާ ބޭފުޅެކެވެ. މައުމޫނަށް ވެރިކަންލިބި ވަޑައިގަތްއިރު، ހުސައިން މަނިކުފާނު ހުންނެވީ ޓްރާންސްޕޯޓު މިނިސްޓްރީގެ ވަކީލެއްގެ މަގާމުގައެވެ. އެހެންކަމުން އެނާއަކީ، އެމިނިސްޓްރީގެ މިނިސްޓަރ މައުމޫނު އަބްދުލް ގައްޔޫމުގެ ވަރަށްބޮޑު ފުރެންޑެކެވެ. ޖިގުރީދޯސްތެކެވެ. އަދި އޭނާގެ ނިމުމާހަމައަށް ވެސް އެގޮތުގައި ދެމިހުންނެވި ވަފާތެރި ބޭފުޅެކެވެ. ފަހެ، ހުސައިން މަނިކުފާނު އަޅުގަނޑުކާރީގައި ވިދާޅުވީކީކޭ ކަމަށްތޯއެވެ. ރައީސް މައުމޫނު މިދެންނެވިރޭ ހަތިޔާރު ހިއްޕަވައިގެން ހުންނެވިކަން އާންމުކުރެއްވި ޖަލްސާއޮތް ދުވަހުނޫން ފަހުދުވަހު، އެކަމުގެ އަސަރު ހުރިލެއްބޮޑުކަމުން، އަޅުގަނޑު ހެންވޭރު މީނާޒަށް ޒިޔާރަތްކޮށްލީމެވެ. އާދެ! އަލްއުސްތާޒު އަބްދުﷲ ހަމީދާއި ސިއްކަގޭ ހުސައިން މަނިކުފާނައި ދެބޭފުޅުންނަކީ، އެބޭފުޅުން މަދްރަސަތުލް މަޖީދިއްޔާގައި އުޅުއްވި ދުވަސްވަރުން ފެށިގެން ވަރަށް ރަހްމަތްތެރި ވަރަށްގާތް ގުޅުންތަކެއް ބެހެއްޓެވި ދެބޭފުޅުންނެވެ. ހުސައިންމަނިކުފާނު ހަމީދައި ބައްދަލު ކުރައްވަން މީނާޒަށް ވަޑައިގެންނެވިއިރު ހަމީދު އިންނެވީ އެގޭފެންޑާގައި ހަމަގިނިކަންޏާއެވެ. ފިކުރުފުޅެއް ކުރައްވާކަހަލަ ގޮތަކަށެވެ. ހުސައިން މަނިކުފާނު ބުނުއްވާގޮތުގައި ކުޑައިރުކޮޅަކު ހަމީދު ހިމޭނުން އިންނެވުމަށްފަހު، ވިދާޅުވީ، “ތުއްތުދޮންބެ އެވާހަކައެއް އެދެއްކެވީ ކީއްވެބާއެވެ.” (ފަހެ، އެވާހަކައިން އެއިޝާރަތް ކުރައްވަނީ ޣައިރުގާނޫނީ ގޮތަކަށް ފިސްތޯލައެއް ހިއްޕަވައިގެން ހުވައި ކުރައްވަން ހުންނެވި ވާހަކައެވެ.) ހުސައިން މަނިކުފާނު ޖަވާބުގައި ދެންނެވިއެވެ. އަޅުގަނޑު ވެސް މިއައީތިޔަވާހަކަ ދައްކާލަން ވެގެންނެވެ. ދެންފަހެ، ހަމީދު ވިދާޅުވިއެވެ. “މަނިކުފާނު ބަލަން ހުންނަވާށެވެ. ކޮންމެވެސް ދުވަހަކުން އެމައްސަލާގައި، ތުއްތުދޮންބެއައި ދައުވާކުރެވޭނެއެވެ.”
އާދެ! މިވާހަކައެއް ދެއްކެވިއިރުވެސް ހުސައިން މަނިކުފާނު ހުންނެވީ ވަރަށްދެރަވެފައެވެ. އެއީމުޅިމާލެއަށް އަޑުއަރާފައި އޮތްގޮތަކީ، މިޣައިރުގާނޫނީ އަމަލެއް ކުރެއްވީ، ނުވަތަ މިފިސްތޯލަ ތަކެއް ރާއްޖެއަށް އެތެރެކުރެއްވީ އަލްމަރުހޫމް ސިއްކަގޭ ހުސައިން މަނިކުފާނު ކަމަށެވެ. ޚުދު ހުސައިން މަނިކުފާނަށްވެސް އޭނާއެކުރެއްވި ބޮޑުފާފަ އިހުސާސް ކުރެއްވޭ ކަހަލައެވެ. އޭނާއެދުވަސްވަރު ހުންނަވަނީ އަބަދުވެސް ހައްލުނުކުރެވޭފަދަ ނަފްސާނީ ވިސްނުމެއްގައެވެ. ފާޑެއްގެ ނަފްސާނީ ބައްޔެއްގެ ތެރޭގައެވެ. އަބަދުވެސް ހުންނަވަނީ، ލޭމައްޗަށް ގޮސްފައެވެ. ފަހެ، އެއްވެސް ފާފަވެރިއަކު ހިތްހަމަ ނުޖެހޭނެފަދައިން އޭނާވެސް ހުންނަނީ، ހިތްހަމަނުޖެހިފައެވެ. ވަރަށް ނުތަނަވަސް ވެފައެވެ. އާދެ! ޖިގުރީދޯސްތު މައުމޫނުގެ އެދުމަށް އަރަބިގައުމަކުން (ލީބިޔާއިން) އެތެރެކޮށްދިން ހައެއްކަފިސްތޯލަ ރާއްޖެއެތެރެ ކުރެއްވީ، ޓްރާންސްޕޯޓް މިނިސްޓްރީގެ މަތީމުވައްޒަފެއްގެ ހައިސިއްޔަތުން، ޑިޕްލޮމެޓިކް ދަބަހެއްގައި ކަމަށްވާތި، މިކުރެވުނީ ގާނޫނީކުށެއްކަން އިހުސާސްވާލެއް ބޮޑުކަމުންނެވެ. ފަހެ، މިއަދުދެން ކޮންއިތުރުފުޅެއް ހައްދަވާކަށް ތޯއެވެ. ތިޔަހުންނެވީ އުރޫޖަށްވުރެ ޒަވާލުގައެވެ. ނިމެންކާރި ވެފައެވެ. އަޖޫޒުވެ ވަޑައިގެންފައެވެ. އާޚިރަތް ދުވަސް ހަދާންކުރަން ޖެހިފައެވެ. އަވަހަށް ކުރެވުނު ބޮޑުކުށަށް ތައުބާވެވަޑައި ގަންނަވާށެވެ. ދިވެހި ރައްޔިތުންގެ ކިބައިން މައާފަށް އެދިވަޑައި ގަންނަވާށެވެ. ރައްޔިތުންނަކީ ދީލަތިބައެކެވެ. އެންމެރީތި ގޮތަކީމިއެވެ. ﷲއީ ރީތިގޮތަށް ލޯބިވެވޮޑިގެންވާ ލޮބުވެތި ﷲއެވެ. ފަހެ، ކުށުންބަރީއަވުމަށް މިހާރުކޮން ވާހަކަތަކެއް ހަދަހަދައިގެން ދައްކާކަށްތޯއެވެ. ގޯސް ނުހައްދަވާށެވެ. އިތުރަށް ބޭޒާރުވެ އަމިއްލައަށް ފަލީހަތްވުމަކީ، އިތުރަށް މުޑުދާރުވުމެވެ. ފަހެ، ﷲ އަޅަމެން އެންމެން ހެޔޮމަގަށް ރުޖޫއަކުރައްވައި އެމަގުން ހިނގުމަށް ހިދާޔަތު ދެއްވާށިއެވެ! އާމީން!