އިލްޔާސްހުސައިން އިބްރާހީމް. (ލިޔުނީ:2008 ސެޕްޓެމްބަރ 26 ގައި)
ދިވެހިރާއްޖޭގެ ވެރިކަމަށް، ކިނބިގަސްދޮށުގޭ އަލްއުސްތާޒު މައުމޫން އަބްދުލްގައްޔޫމް ވަޑައިގަތީ، ނޭންގި ހުންނަވަނިކޮށް ލިބިވަޑައި ގެންނެވި މަތިވެރި ޝަރަފެއްގެ ގޮތަކުންނޫނެވެ. ހިންމަތާއެކު ބުރަމަސައްކަތް ކުރައްވައިގެންނެވެ. މިސްރުގެ އަޒުހަރު ޔުނިވަރސިޓީގައި ކިޔަވަން ހުންނެވި އިރުއްސުރެ ވާހަކަދެކެވި ސައްލާކުރެވި ރޭވުންތަކެއްރޭވި ތައްޔާރުވެގެން ހިންގުނު ކަންތައްތަކެއްގެ ދަށުންނެވެ. ރައީސް ނާސިރަކީ ވިސްނުންތޫނު ބޭފުޅަކަށްވާތީ ދުރާލާރާއްވަ ވާފައިއޮތީ، އުމުރުގެފަހު ދުވަސްވަރު ހިތްހަމަޖެހިގެން އަމިއްލަ ދިރިއުޅުމެއް ރާއްޖެއިން ބޭރުގައި ގައިމުކުރައްވާށެވެ. އޭނާއެކަން ކާމިޔާބު ކުރެއްވިލެއް ކިތަންމެހާވެސް ރީއްޗެވެ. ނަލައެވެ. ފަހެ، މިހިސާބުންއޭނާ ރައްޔިތުންނަށް ކުރެއްވި އަނިޔާތައް ހުއްޓުމުކަށް އައީއެވެ. އާއުދަރެހަކަށް ދިވެހިގައުމު ނުކުތީއެވެ. ފަހެ، މިސްރުގައި ކިޔަވަންތިބި ދުވަސްވަރު ރާއްޖޭގެ ވެރިކަމަށް އެރުމަށް ކުރެވުނު މަސައްކަތްތައް ރާވާހިންގީ އަލްއުސްތާޒު ޒާހިރުހުސައިނާއި އަލްއުސްތާޒު ފަތުހުﷲ ޖަމީލުގެ ކުޅަދާނަ ވިސްނުމުގެ ދަށުންނެވެ. މައުމޫނަކީ، މަޑުމައިތިރި މިޒާޖެއްގެ ވިސްނުން ތަންފީޒު ކުރުމުގައި ހަރުކަށިގޮތެއް ގެންގުޅުއްވާ، ކަންކަމަށް އިސްނަގަންކެރޭ ޒާތުގެ ވެރިޔަކަށްވާތީ، ޒާހިރުހުސައިނާއި ފަތުހުﷲ އަށް، ވަކިން ޚާއްސަކޮށް މިރޭވުމުގެ އަޑީގައި އިސްކޮށް ހުންނެވި ޒާހިރު ހުސައިނަށް މިރޭވުމައިގެން ކުރިޔަށް ދިއުމަށް ވަރަށް ފަސޭހަވިއެވެ. ޒާހިރުހުސައިނުގެ ވިސްނުންފުޅުން، ފަތުހުﷲ ރާއްޖެއަށް ފޮނުއްވައި ރައީސް ނާސިރުގެ އަރިހުގައި ވަރުގަދަ ކުރުވުމަށް ނިންމީ، ފަތުހުﷲއަކީ، މާލޭގެ ޝަރަފުވެރި އާއިލާއެއްގެ އިއްޒަތްތެރި ބޭފުޅަކަށް ވާތީއެވެ. ދެން އޭގެފަހުން މާލެވަޑައިގަތް ބޭފުޅުން ވަޑައިގަތީ ފަތުހުﷲއަށް ފަހުގައެވެ. މައުމޫނާއި ޒާހިރުހުސައިން މާލެ ވަޑައިގަތުމުން އެކަށީގެންވާ މަގާމުތައް ރައީސްނާސިރު ހަމަޖައްސަވައި ދެއްވިއެވެ. މިކަންތައްވެސް ހިނގީޖަމީލު އާއިލާގެ ނުފޫޒާއި ހަމްދަރުދީގެ ދަށުންނެވެ. ރައީސްނާސިރު ވެރިކަން ދޫކޮށްލެއްވުމުގެ ދެއަހަރެއްވަރު ކުރިން މައުމޫނަށް މިނިސްޓަރ ކަން ދެއްވިއެވެ. އޭރު ފަތުހުﷲ ހުންނެވީ ޚާރިޖީވަޒީރު ކަމުގައެވެ. ޒާހިރު ހުސައިނަށް އެޑިއުކޭޝަނުން މަތީމަގާމެއް ރައީސްނާސިރު ހަމަޖއްސަވައި ދެއްވިއެވެ. ފަހެ، މިހުރިހާ ރޭވުންތަކުގައި މައުމޫނުގެ އެންމެ އަރިސްބޭފުޅަކީ ޒާހިރުހުސައިނެވެ. އެއީ އެންމެވާގިވެރިޔާއެވެ. ސިއްރުވެރިޔާއެވެ. އެކަމުގެ އަލިގަދަހެއްކަކީ، ތިރީސްއަހަރު ފަހުން އާދެ! މިއަދު މިދުވަސްވަރު ވެސް މަޑުން ނުހުންނެވިގެން ރައީސްމައުމޫނުގެ ދިފާއުގައި ސިޔާސީމައިދާނަށް ނުކުންނަވައި ތަގުރީރުތައް ދެއްވަމުން ގެންދަވާކަމެވެ. ރައްޔިތުން ބަލައިނުގަތަސް އޭނާއެހުންނެވީ އޭނާގެދާއިމީ އެކުވެރިޔާގެ ދިފާއުގައެވެ. މިބޭފުޅުންނަކީ، ބޭރުފުށުން އިސްލާމްދީން އުގެނިގެން އަޒުހަރު ޔުނިވަރސިޓީން ވަޑައިގެން ތިއްބެވި ޝައިޚުންނަށްވާތީ ރައީސްނާސިރު ނިންމެވީ މިބޭފުޅުންގެ އަތްމައްޗަށް ވެރިކަންދޫކޮށް ލައްވާށެވެ. ޚާއްސަކޮށް އޮނަރަބްލް އިލްޔާސް އިބްރާހީމް މެދުވެރިކޮށް އެންދެރިމާގެއާ ގުޅިފައި ހުރުމުންނެވެ. އެހެނަސް ޒާހިރު ހުސައިނާއި ފަތުހުﷲއަށް މިކަންޔަގީން ނުކުރެވުމާއި މިސްރުގައިތިބެ ރޭވިފައިހުރި ރޭވުންތަކުގެ ދަށުން ލީބިޔާސަރުކާރުގެ އެހީގައި ހައެއްކަ ފިސްތޯލަ، ރާއްޖޭގެ ގާނޫނު އަސާސީއާއި ގާނޫނުތަކާޚިލާފަށް ރާއްޖެއަށް އެތެރެ ކުރެއްވިއެވެ. މިފިސްތޯލަތައް ރާއްޖޭގެ ފަސްގަނޑަށް އެތެރެކުރުމުގެ އަމަލީބައި ތަންފީޒުކޮށްދިނީ އަލްމަރުހޫމް ސިއްކަގޭ ހުސައިން މަނިކުފާނެވެ. އޭނައަކީ މައުމޫނު ހުންނެވި ޓުރާންސްޕޯޓް މިނިސްޓްރީގެ ވަކީލެވެ. މިސަބަބާހުރެ މިބިރުވެރިއަމަލު ތަންފިޒު ކުރުމުގެ ނުރައްކަލާ ޝަޚުޞީގޮތުން ކުރިމަތިލެއްވީ ސިއްކަގޭ މަނިކުފާނެވެ. އެނާގެ ބޮސްވަޒީރަށް ވިއަގުހުރި ގުރުބާނީއެކެވެ. އިރާދަކުރެއްވިއްޔާ ދެން މަޒްމޫނެއްގައި މިކަމުގެ ތަފްސީލު އަޅުގަނޑަށް އެނގިފައިވާ މިންވަރަށް ގެނެސްދޭނަމެވެ.
1978 ނޮވެންބަރ 11 ވަނަދުވަސް ފެށުމާއެކު އަޒުހަރުޓީމުން ރާއްޖޭގެ ވެރިކަމާ ހަވާލު ވުމަށްފަހު އެންމެފުރަތަމަ ކަމަކަށްއެޅުއްވި ފިޔަވަޅަކީ، އެންދެރިމާގޭ އިލްޔާސް ޑިފެންސް މިނިސްޓްރިއަށް ފޮނުއްވައި އޭނަޔާއެބާރު ރަސްމީކޮށް ހަވާލު ކުރެއްވުމެވެ. އަދި ދިވެހިގައުމުގެ އިގްތިސާދާއި މަޢީޝަތު އޭނާގެ މައްޗަށް ދޫކޮށްލެއްވުމެވެ. އަދި ކާމިނީގޭފަރާތުން އެއްބަފާ އަލްއުސްތާޒު އަބްދުﷲ ހަމީދަށް މުޅިރާއްޖެރެތެ ހަވާލުކުރެއްވުމެވެ. ހަމީދު ރާއްޖެތެރޭގައި ރައްޔިތުން ވަކިވަކި ޖަމާއަތްތަކަކަށް ބެހިފައިތިބޭ ގޮތަށް ބޭތިއްބުމަށްޓަކައި އެކިއެކިނާދީތައް ހައްދަވައިގެން އާދޭސްކޮށް ސަލާންޖެހުމުގެ އުސޫލެއް ދަސްކޮށް ދެއްވިއެވެ. ކިތަންމެކުޑަކަމެއް ދިމާވިޔަސް އެމީހުންނަށް ޖެހެނީ ވެރިންގެގާތަށް ސަލާންޖަހާށެވެ. އަދޭސްކުރާށެވެ. އެނޫންގޮތަކަށް ހިޔާވަހިކަމާއި ކާނާއާއިފޭރާން ލިބޭނެގޮތެއް ނޯވެއެވެ. ފަހެ، އިލްޔާސް ގެންދެވީ އެނާގެއާއިލާގެ ނުފޫޒާއިބާރު ވަރުގަދަކޮށް އޭނާގެ ގާތްމީހުންނަށް، ފައިސާހޯދުމުގެ މަގުތައް ތަނަވަސްކޮށްދީ ވަރުގަދަ ކުރަމުންނެވެ. ޒާހިރުހުސައިނާއި ފަތުހުﷲއައި ހަވާލުވީ، އެބޭފުޅުން ތިއްބެވި މިނިސްޓްރީ ތަކާއެވެ. އެންދެރި އާއިލާގެ ވަރުގަދަ ދެބޭފުޅުން ކަމުގައިވާ އޮނަރަބްލް އައްބާސް އިބްރާހީމާއި އޮނަރަބްލް ސަމަރުބުލޫ އިބްރާހީމް މަނިކަށްވެސް ބާރުހުރި ދެމިނިސްޓްރީއެއް ހަވާލުކުރެ ވުނެވެ.
ދެންފަހެ އަޒުހަރުޓީމުގެ ސަރުކާރު އުފެދުނު ހިސާބުން ވެރިކަމުގެ ހުރިހާބާރުތަކެއް ބެހިގެން ދިޔައީ އެންދެރިކޭންޕަށާއި ކާމިނީކޭންޕަށް ހިއްސާވާގޮތަށެވެ. ރައްޔިތުންތިބީ ކުދިކުދިޖަމާއަތް ތަކަށް ބައިބަޔަށް ބަހާލާފައި ސަލާންޖަހާ އާދޭސް ކޮށްގެން އަމިއްލަ ހާއްޖަތްތައް ފުއްދުމުގެ އުސޫލަކަށް ފައްތާފައެވެ. ބައްޓަންކޮށްފައެވެ. އިޖްތިމާއީ އެއްވެސްކަހަލަ ރައްކާތެރި ކަމެއްނެތި ދަތިކަމާއި ބިކަހާލުގައެވެ. އާދެ! އެންދެރިމާގޭ ބޭފުޅުންގެ ވިސްނުން ތޫނުކަމުން އެކޭންޕުދިޔައީ ހީނުކުރާވަރަށް ބާރަށް ކުރިޔަށެވެ. ކާމިނީކޭންޕުގެ ވިސްނުން ހުރިވަރުން އެމީހުންނަށް ކުރެވުނުކަމަކީ ސަރުކާރުގެ އެހީގައި ދަރީންނަށް ޒަމާނާގުޅޭ ރަނގަޅުފެންވަރަށް މަތީތައުލީމު ދިނުމެވެ. ޒާހިރުހުސައިނާއި ފަތުހުﷲ މެން ތިއްބެވީ އެމީހުންގެ އަމިއްލަ ލައްޒަތާއި މަޖަލުގައި ގެނބިފައެވެ. އިލްޔާސާއި ހަމީދު ކުޅުއްވަމުން ގެންދެވި ކުޅިވަރަކަށް މިމީހުން ނުބައްލަވައެވެ. ތިއްބެވީ އިހުމާލުކަން މަތީގައެވެ. އަޒުހަރުޓީމުން، މިދެކޭންޕަށް ފާރަލާންފަށާއި ސަމާލުކަމަށް ގެނެވުނީ، އެންދެރިކޭންޕުން ވެރިކަމާ ތޮޅުމަށް ނިންމި ހިސާބުންނެވެ. ހުޝިޔާރުކަމަށް ގެނެވުނުވަރަކީ، އެދުވަސްވަރު ވަގުތީގޮތުން ދައުލަތުގެ ބަންޑާރަނައިބުގެ އޮފީސް ޒާހިރުހުސައިނައި ހިންގުން ހަވާލުކުރައްވައި އަޒުހަރުޓީމުން ދިފާއަށް ކުޅެންފެށީއެވެ. މިރޮނގުން ހަރަކާތްތެރިވާން މަޖުބޫރުވިއެވެ. އަޒުހަރުޓީމުގެ ސަމާލުކަމަށް އަންނަނީ މިދެންނެވި ކޭންޕުތަކުގެ ކަންތައްތައް ހައްދުފަހަނައަޅާދާ ހިނދުގައެވެ. ފަހެ މިއަރާރުން ގަނޑުވެސް ނިމިދިޔައީ ވަރަށްރީތިކޮށް ސިޔާސީ ކުޅިގަނޑެއްގެ ގޮތުގައެވެ. މިހާރު މިފެންނަ ސިޔާސީ މަސްރަހުން ރިޔާސީ އިންތިޚާބީރޭހުގައި މިފެންނަ ކުޅިވަރުތައްވެސް ފާޅުވެ އޮޅުންފިލާނީ މިކުޅިވަރުތައް ނިމުމުންނެވެ.
ފަހެ ދަންނާށެވެ! މިވެރިކަމުގެ ކަންތައް މިހާހިސާބަށް ދިޔައިރު ކާމިނީކޭންޕުގެ ބައެއްބޭފުޅުން ކިޔަވާވިދާޅުވެގެން މާލެވަޑައިގެން، އެކޭންޕުގެ ހުންގާނުގައި ހިއްޕަވައިފިއެވެ. އޮނަރަބްލް ޔާމީންއަބްދުލް ގައްޔޫމް ލީޑުނަންގަވައިފިއެވެ. ފާޅުގައި އެންދެރިކޭންޕާ ފިނިހަނގުރާމަ ކުރައްވަން ފައްޓަވައިފިއެވެ. އަދި އެންދެރި ކޭންޕުގެބާރުތައް އޮނަރަބްލް ގާސިމު އިބްރާހީމާ ދިމާއަށް ފިރުކިގެން ހިގައްޖެއެވެ. ހިނދުކޮޅަކަށް އިލްޔާސް ގައުމުންބޭރު ކޮށްލަންޖެހުނެވެ. ގާސިމުގެ ކަންތަކުގައި އިލްޔާސަށްވުރެ ބޮޑަށް ބަސްވިދާޅުވަނީ މެޑަމްނަސްރީނާ އިބްރާހީމެވެ. ފަހެ، މިއީ އިލްޔާސްގެ ދުރުވިސްނުމެވެ. ދެވަނަދޭއްޗެއް ނޫނެވެ. ރައީސްމައުމޫނުގެ ޗާލާކީއަށް ވިސްނާށެވެ! ރާއްޖޭގެ ބައިތުލްމާލުން ރައްޔިތުންގެ ހުއްދައެއްނެތި ގިނައަދަދެއްގެ ފައިސާތަކެއް ޚަރަދުކޮށްގެން، ޚުދުމުޚްތާރު، ޖައްބާރު ވެރިކަމެއްގެ މޫނުމަތި ރީތިކުރުމަށް މަސައްކަތްކޮށްދިން ހިލް އެންޑުނޯލްޓަން ކިޔާ ބިދޭސީ ތަޖުރިބާކާރު ކުންފުންޏެއްގެ އެހީ ވަރަށްރީއްޗަށް ރައީސްމައުމޫނު ހޯއްދެވިއެވެ. ރައްޔިތުންގެ މަޖިލީހުގެ ހުއްދައެއް ނެތިއެވެ. މިކުންފުނިން ކުޅެމުން ގެންދިޔަރޯލަކީ، ރައީސްމައުމޫނުގެ ސިއްރު އެޖެންޑާތައް ފަރުމާކޮށް ކުރަހައި ދިނުމެވެ. ހަދާން ބަހައްޓަންވީ މިހާރުވެސް މިކުންފުންޏާއެކު ނިއޫމޯލްޑިވްސް މީހުންނައި ފުރިހަމަ ގުޅުންއޮންނަކަމެވެ. ޖެނީވާގައިހުންނަ ދިވެހި މިޝަންގައި ޑޮކްޓަރ އަހްމަދުޝަހީދުގެ ފޮރިންމިނިސްޓަރ ކަމުގެ ދުވަސްވަރު ބަހައްޓާފައި ހުރިމީހަކީވެސް އެފެންވަރުގެ ގާތްގުޅުމެއް އޮންނަ ބިދޭސީއެކެވެ. ސަރުކާރުގައި ތިބެގެން ނިއޫމޯލްޑިވްސް މީހުންވަނީ ނާޖާއިޒު މިފަދަފައިދާތައް ނަގާފައެވެ. ރައްޔިތުންނަށް އަނިޔާކޮށްފައެވެ. ރައްޔިތުންގެ މުދާފޭރިގެންފައެވެ. އެމްޑީޕީގެ މައިހަރުގެ ރޫލާލައި ގަދަކަމުން ނަގާފައެވެ. އެމެރިކާގައި އިސްލާމްދީނާ ދެކޮޅަށް އެންމެވަރުގަދަކޮށް ހަރަކާތްތެރިވާ ނިއޫމޯލްޑިވްސް ޖަމާއަތާ މިމީހުންނާ ގުޅުންއޮވެއެވެ. މިފަދަބިދޭސީ ލާދީނީމީހުންވަނީ މިމީހުންލައްވާ ރާއްޖޭގެ ގާނޫނުލްއުގޫބާތު ލާދީނީ ކުރުވާފައެވެ. އަލަށް ތައްޔާރުވާ ގާނޫނުލްއުގޫބާތުގެ މޭސްތިރިއަކީ ނިއޫމޯލްޑިވްސްގެ އެއްބާނީ ޑޮކްޓަރ ހަސަންސައީދެވެ. މިޖަމާއަތްތަކުގެ ބޭނުމަކީ، ސައްތައިން ސައްތަ އިސްލަމީ ގައުމުތައް ސެކިއުލަރކޮށް ލާދީނީ ކުރުމެވެ. ގަނޫނުއަސާސީން ދީނާއި އަގީދާބޭރު ކުރުމެވެ.
ފަހެ ދަންނާށެވެ! އެންދެރި ކޭންޕުން ގާސިމުލައްވާ ކުޅުވާރޯލަކީ ވެސް ސިއްރުއެޖެންޑާ އެއްގެ މުހިންމު ބައެކެވެ. ކާމިނީކޭންޕުގެ ޔާމީނުލައްވާ ކުޅުވި ސިއްރުއެޖެންޑާވަނީ ދާންވީގޮތަށް ކުރިޔަށް ނުދިއުމުގެ ސަބަބުން ސިއްކަޖަހައި ނިންމާލައްވާފައެވެ. ޑީއާރުޕީއާއި އިއްތިފާގުވެ އަތާއަތްޖޯޑު ކޮށްފިއެވެ. ސަންގުނޫސް ވަރަށް އަވަހަށް ހުއްޓޭނެއެވެ. ކޮއިމަލާ ސައިޓުވެސް ރިޔާސީއިންތިޚާބުގެ ފޯރިގަނޑާއެކު ނިމުމަކަށް ގެންނާނެއެވެ. ފަހެ، ހިލް އެންޑް ނޯލްޓަންގެ ލަފަޔަކީ، މިރިޔާސީ އިންތިޚާބު ދެވަނަބުރަކަށް ގެންދިއުމަށެވެ. ނިއޫމޯލްޑިވްސްގެ ތިންބެއިންގެ ޒިންމާއަކީ، އެޓާގެޓަށް މިކަންތައް ވާސިލުކޮށް ދިނުމެވެ. ވަގުތު ޖެހޭވަރަކުން ނިއޫމޯލްޑިވްސް އާގުޅޭމޫނުތައް އިތުރަށް ފެންނާނެއެވެ. ސަރުކާރުގެ ބައެއްމީހުންގެ އެހީތެރިކަންވެސް ފެނިގެންދާނެއެވެ. ކުރިންދައުލަތަށް ޚިދުމަތްކޮށްދީފައި ތިއްބެވި ބައެއްޝަރަފު ވެރިންނާއި ވިޔާފާރިވެރިންގެ ތެރެއިން ބަޔަކައި މިފަދަ މީސްމީހުން މިއޫމޯލްޑިވްސް އަތަށް ޖެހޭނެނެވެ. ފަހެ، ދެވަނަބުރަކަށް މިއިންތިޚާބު ގެންދެވިއްޖެނަމަ، ރައީސް މައުމޫނުގެ ސިއްރު އެޖެންޑާގެ ހަގީގަތްފާޅުވެ ރައްޔިތުންނަށް ހާމަވެ ފެނިގެންދާނެއެވެ. ފަހެ ދަންނާށެވެ! މިއިންތިޚާބުގެ ހަގީގީވާދަވެރިންނަށް ވެގެންދާނީ ޑީއާރުޕީ އިއްތިހާދާއި އެމްޑީޕީއިއްތިހާދެވެ. މިހާރުވެސް އެކުލަވަރު އެބަފެނޭނޫންތޯއެވެ! 2008 ސެޕްޓެމްބަރ 27 ގައި އޮންނަ ރަނިންމޭޓުންގެ ޑިބޭޓުގައި ބައިވެރިވަނީ އެންމެހަތަރު ބޭފުޅުންނެވެ. ފަހެ، މިހަތަރު ބޭފުޅުންނަށް ފުންކޮށް ވިސްނާލުމުން މިވާހަކައިގެ ކުލަވަރު ފެންނާއެވެ.
ފަހެ، ދަންނާށެވެ! މިފަހަރަކީ، ރައްޔިތުންގެ ފަހަރަށް ހައްދަވާށެވެ. މިމުހިންމު ފުރުސަތު އަތުން ބީވެގެން ދިޔަނުދެއްވާށެވެ. އަޒުހަރުޓީމުގެ ވެރިކަން ލުހެލާނިންމާލަން ޖެހޭނީ މުލާއެކުގައެވެ. މަތިންފަތްކޮޅު ކޮށާލައިގެން ކަމަކުނުދާނެއެވެ. ނުފުދޭނެއެވެ. ހުރިހާސިއްރު އެޖެންޑާތަކެއްގެ ދަށުން ފޮރުވިގެން ތިބިބާރުތައް މުލުންލުހެލައި ރައީސް މައުމޫނުގެ ވެރިކަމުގެ ބާރުމުޅިން ނައްތާލަން ޖެހޭނެއެވެ. މިފަދަ ސާފުގޮތަކަށް ރައްޔިތުންގެ ވެރިކަން ރައްޔިތުންގެ އަތްމައްޗަށް ފިރުކާލެވޭނީ އެމްޑީޕީ އިއްތިހާދަށް ފުރަތަމަ ބުރުގައި ކާމިޔާބު ލިބިގެންނެވެ. އެކަމާއުޅޭށެވެ. ހިއްވަރާއެކު މަސައްކަތްކުރާށެވެ. އެއްގޮތަކަށްވެސް ފަހަތަށް ނުޖެހޭށެވެ. ރޯދަމަސް ނިމުމާއެކު އާފޯރިޔަކާއި ޖަޒްބާތާއެކު ކެރިގެން ވަރަށްފާޅުގައި ކެންޕޭނަށް ނުކުންނާށެވެ. ކެންޕޭނު ޖަގަހަތައް ސައުވީސްގަޑިއިރު ފުރިހަމަ ހަރަކާތުގައި ބަހައްޓާށެވެ. ބޮޑުބެރު ޖަހާށެވެ. އުފާފާޅުކުރާށެވެ. އަންހެނުންގެ ބައިވެރިވުން އިތުރުކުރާށެވެ. ޒުވާނުންގެ ބައިވެރިވުން އިތުރުކުރާށެވެ. ބިރުކަނޑާލާށެވެ. ފާޅުގައި ކެރިގެން ނުކުންނަންވީ ވަގުތު އަތުވެއްޖެއެވެ. އެމްޑީޕީ އިއްތިހާދާއެކު އެންމެން ނުކުންނާށެވެ. ކާމިޔާބުކުރާށޭވެ. އޭރުން ﷲ، ހައްގަށް ނަސްރު ދެއްވާނެކަން ކަށަވަރެވެ. ރައްޔިތުންގެ ބާރުބާރަކަށްވާނީ ހައްގުގޮތުގައި ދެމިތިބީމައެވެ. އިޚްލާސްތެރިކަމާއެކު ފާޅުގައި ނުކުތީމައެވެ. ބިރުގަންނަވީ ﷲ އަށެވެ. ފަހެ، ހައްގަށް ނަސްރުލިބިގެން ދިއުމުގެ މިސާލަކަށް އެމްޑީޕީއިއްތިހާދު ހައްދަވާށެވެ. އޭރުން އޮތީނަސްރެވެ. ކާމިޔާބެވެ. އުފަލެވެ. ފަތަހައެވެ. ނަސްރެވެ. ފަސާދަމުޅިން ބާތިލުވީއެވެ. ނުބައިގޮތްތައް މުޅިން ނައްތާލެވުނީއެވެ. ﷲ އަޅަމެން އެންމެންނަށް ހައްގުމަގަށް ނަސްރުދިނުމުގައި ތައުފީގުދެއްވާށިއެވެ! މަގުފަހިކޮށް ދެއްވާށިއެވެ! ދިވެހިގައުމަށް ބަދަލުގެނެސް ދެއްވާށިއެވެ! އާމީން!