އިލްޔާސް ހުސައިން އިބްރާހީމް. (ލިޔުނީ: 2008 ސެޕްޓެމްބަރ 5 ގައި)
ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީބުނާގޮތުން، އިސްލާމް ދީނާއި އިސްލާމީ ޝަރީއަތަކީ، ގާނޫނު އަސާސީން ހަވާލާދެވިގެން އިސްލާމީ ޝަރީއަތުގެބާރު އެއަށް އެންމެ ފުރިހަމައަށް ލިބިދޭ އަސާސީއެކެވެ. އަސާސީ ބުނަނީ، މުސްލިމަކުނޫނީ، ދިވެހިރައްޔިތަކަށް ނުވެވޭނެއެވެ. ދިވެހި ދައުލަތުގެ ދީނަކީ، އިސްލާމްދީނެވެ. އަދި އިސްލާމްދީނަކީ، ދިވެހިރާއްޖޭގެ ގާނޫނުގެ މައިގަނޑު މަސްދަރެވެ. ފަހެ އެބަހުގެ މާނައަކީ، ގާނޫނު އަސާސީއަކީ އިސްލާމީ ޝަރީއަތެވެ. ގައުމުގެ ދުސްތޫރެވެ. މިދޭއްޗަކީ އެކައްޗެއް ކަމެވެ. ވަކިނުކުރެވޭނެ ދޭއްޗެވެ. އެބަހީ، ދިވެހި ރާއްޖޭގައި އިސްލާމް ދީނުގެ އަސްލަކާ ޚިލާފު އެއްވެސް ގާނޫނެއް ނުހެދޭނެއެވެ. އިސްލާމީ ޝަރީއަތުގައި ނުވަތަ ގާނޫނުގައި ކަނޑައެޅިގެން މަނާކޮށްފައިނުވާ ކޮންމެކަމެއް ކުރުމުގެ މިނިވަންކަން ކޮންމެ ރައްޔިތަކަށްމެ ލިބިގެންވެއެވެ. އަދި ގާނޫނަކުން ހުއްދަލިބިގެން މެނުވީ، އެއްވެސް މީހަކުކުރާ އެއްވެސް ކަމަކަށް ހަމައެކަކުވިޔަސް ހުރަސްއަޅައި ހުއްޓުވައިގެން ނުވާނެއެވެ. އާގާނޫނު އަސާސީގެ ތެރެއަށް އިސްލާމް ދީނާއި އިސްލާމީ ޝަރީއަތް ވެއްދިފައިވާ މިންވަރު އެއްގޮތަކަށްވެސް ކުޑައެއްނޫނެވެ. އަދުލް އިންސާފުގެ ބާރަށް ނިޔާކަނޑަ އެޅުމުގައި އަސާސީއާއެކު އިސްލާމީ ޝަރީއަތް ގެންގުޅެން މަޖުބޫރު ވާނެއެވެ. ކާފަރަކަށް މިރާއްޖޭގައި ނިޔާކަނޑައެޅުމުގެ އަދާލަތީ އިޚްތިޔާރެއް އަދި ބާރެއްނޯން ނާނެއެވެ. ފަހެ ދިވެހިރާއްޖޭގެ ޖުމްހޫރިއްޔާގެ އަސާސީއާއި ޝަރީއަތް ތަންފީޒުކުރެވޭނީ ދިވެހި ރައްޔިތުން ނަށެވެ. އަދި ތަންފީޒުކުރަން ތިބޭނީވެސް ދިވެހި ރައްޔިތުންނެވެ. ބިދޭސީން ހޯދާކަށް ނުޖެހެއެވެ. ބޮޑު މަޖިލީހުގައި ތިއްބެވި ގިނަބަޔަކު ދީނާއިދައުލަތް ވަކިކުރުމުގެ ޚިޔާލުގައި ފަރަންޖީންނާއެކު، ބައިއަތު ހިއްޕަވައިގެން ތިއްބެވިޔަސް އެކަމެއް މިފަހަރަކު ނުވިއެވެ. އަދި އަސާސީއާއި އިސްލާމީ ޝަރީއަތް ވަތްކެއް ނުކުރެވުނެވެ. އިސްލާމީ އަގީދާ ދުސްތޫރުން ވަތްކެއް ނުކުރެވުނެވެ. ﷲއަށް ހަމްދުހުއްޓެވެ. ޝުކުރު ވެރިވަމެވެ. ފަހެ، ދިވެހިރާއްޖޭގެ ޖުމްހޫރިއްޔާގެ ދައުލަތަކީ އިސްލާމީ ދައުލަތެކެވެ. ވެރިމީހާގެ ޝަރުތުތަކުގައި މުސްލިމަކު ކަމުގައިވުމާއި ސުންނަތް ޖަމާއަތުގެ މީހަކުކަމުގައިވުން ޝަރުތުކޮށްފައި އޮވެއެވެ. ސެކިއުލާ ޚިޔާލަށް ތަބާވާމީހަކަށް ވެރިކަމުގައި ނުހުރެވޭނެއެވެ. އިސްލާމް ދީނުގައި ހައްދުކަނޑައެޅި ފައިވާކުށެއް ނުވަތަ މަކަރާއިހީލަތް، ޓެކުން، ޚިޔާނާތުގެ ކުށެއް ކުރިކަން ޝަރީއަތަށް ސާބިތުވެފައިވާ މީހެއްކަމުގައި ވެގެންނުވާނެ ކަމަށް ލިޔެފައި އޮވެއެވެ. ފަހެ، ސުންނަތް ޖަމާއަތުގެ މީހަކަށްވުމަކީ، ހަތަރުމަޒުހަބު ގަބޫލުކުރާ މީހަކަށްވުމެވެ. ހަދީސާއި ސުންނަތް ގަބޫލުކުރާ މީހަކަށް ވާންޖެހޭނެއެވެ. ހަމައެކަނި ނަމުން މުސްލިމަކަށް ވެގެނެއް ނުވާނެއެވެ. އޭނާގެ ވާހަކަތަކާއި އޭނާގެ ގަބޫލުކުރުންތައް ސުންނަތައި އެއްގޮތް ވާންޖެހޭނެއެވެ. އެއްވެސް ހާލެއްގައި ދިވެހިރާއްޖޭގެ އަސާސީއަކީ، އެހެންދީންތަކަށް ޖާގަދޭ އަސާސީއެއް ނޫނެވެ. އިންސާނީ ހައްގުތައް މަތިކޮށް އެހައްގުތައް ހިމާޔަތްކުރުމުގެ ބަހަނާގައި ވަރަށްގިނަ ގައުމުތަކުގައި ވަކިދީނަކަށް ތަބާވާންޖެހޭގޮތަށް އަސާސީގައި ލިޔެފައެއް ނޯވެއެވެ. އިންސާނީ ހައްގުތައް ހަމަހަމަކުރުމުގެ ބަހަނާގައި އެއްވެސް ދީނަކަށް ތަބާވުން އަސާސީން މަޖުބޫރު ނުކުރަނީއެވެ. ފަހެ މިގޮތަށް މިކަންތައް ކުރަނީ، ލާދީނީކޮށް ބާއްވައިގެންނޫނީ، އަސާސީ ހައްގުތައް ފުރިހަމަނުވަނީ ކަމަށް ވަކިބަޔަކު ދެކޭތީއެވެ. ބައެއް އެހެން ގައުމުތަކުގައި އިސްލާމްދީނުނޫން އެހެންދީންތަކަށް އަމަލުކުރަން ޖެހޭގޮތަށް އަސާސީގައި ލިޔެވިފައި ހުރެއެވެ. ނޭޕާލުގައި އޮންނަނީ، ހިންދީންގެ ދީނަށެވެ. ވަކިބަޔަކު ދެކޭގޮތުގައި އެއީވެސް އިންސާނީ ހައްގުތަކަށް ހުރިހުރަހެކެވެ. އދ.އާއި ހުޅަގުން ބޭނުންވަނީ އަސާސީގައި އެއްވެސް ދީނެއްގެ ވާހަކަނުލިޔެ ހުޅުވާލާފައި ލާދީނީކޮށް ބޭއްވުމަށެވެ. ދީނީމިނިވަން ކަމަކީ އެއީކަމަށް ދެކެއެވެ. ކޮންމެއަކަސް ރާއްޖޭގެ އަސާސީ މިފަހަރު މިލިޔެވުނީ، އިސްލާމްދީނާއި އިސްލާމީ ޝަރީއަތް ހިމާޔަތް ކުރެވިގެންނެވެ. މިކަންމިހެން ހަމަޖެހިގެން ދިޔައީ ބޮޑުމަޖިލީހުގެ ތަޅުމުގައި އަޅުގަނޑުމެން ކަހަލަމަދުބަޔަކު ކުރިހިއްވަރުން ކަންކަށަވަރެވެ. އެހެންވީތީ އަޅުގަނޑުމެން ހުރިހާރައްޔިތުން ވެސް އުފާކުރަން ޖެހެއެވެ. ސައްތައިން ސައްތަ އިސްލާމީ ގައުމެއްގައި އަސާސީން އިސްލާމްދިނު ހިމާޔަތް ކުރެވުނީމައެވެ. އދ.ގެ ގަރާރުތަކުންނާއި ހުޅަގުން ގޮވާލާއި މަސައްކަތްކުރަނީ، އިންސާނީ ހައްގުތަކުގެ ނަމުގައި ހުޅުވާލެވިފައިވާ ލާދީނީ، ސެކިއުލަރ ގޮތްތައް އަސާސީ މެދުވެރިކޮށް ދަމަހައްޓާށެވެ. އެފަދަ ދަނޑިވަޅެއްގައި އިސްލާމްދީން ގަދައަޅައި ހިފޭއްޓިފައިވާ އަސާސީއެއް ދިވެހި ދައުލަތުގެ ދުސްތޫރެއްގެ ގޮތުގައި އަޅުގަނޑުމެންނަށް، ލިބުނީތީ ﷲއަށް ޝުކުރުވެރިވާން ޖެހޭނެއެވެ.
ފަހެ، ދަންނާށެވެ! ރާއްޖޭގެ ސިޔާސީޕާޓީތައް ވެސް އުފެދެން ޖެހޭނީ މިއަސާސުގެ މައްޗަށެވެ. މިދެންނެވި ބިންގަލުގެ މައްޗަށެވެ. ރާއްޖޭގައި އުފެދިފައިހުރި ހުރިހާސިޔާސީޕާޓީ ތަކަކީ، އަސާސީގެދަށުން ބާރުލިބިގެން ރަޖިސްޓްރީ ކުރެވިފައިވާ ޕާޓީތަކެވެ. ވަރަށްއަވަހަށް ގާނޫނެއްގެ ދަށުން ފުރިހަމަ ގާނޫނީބާރު ލިބިގެންދާނެއެވެ. ދެންއެއަށްފަހު، އެންމެއިސް ވާޖިބަކީ، އިސްލާމްދީނަށާއި އަސާސީއަށް ކިޔަމަންގަނެ ހުރުމަތްތެރިކޮށް ހިތުމެވެ. ރާއްޖޭގައި ބައެއްޕާޓީތައް އިސްލާމްދީނުގެ ނަމަށް ނިސްބަތްކޮށް އުފައްދާފައި އެބަހުއްޓެވެ. އިސްލާމިކް ޑިމޮކްރަޓިކް ޕާޓީއެއް އޮވެއެވެ. ގިސާސްހިފުމަށް ގޮވާލައެވެ. ޚާއްސަކޮށް އަދާލަތުޕާޓީއަކީ، މިބިންގަލުގެ މަތީގައި ބިނާކުރެވިފައިވާ، ވަރަށް މުހިންމުރޯލެއް އަދާކުރަން ޖެހޭބައެކެވެ. ދީނީވަހުދަތާއި އެއްބައި ވަންތަކަން ހިފާއްޓާއި ދީންހިމާޔަތް ކުރުމަށް އަސާސީގަވާއިދުގައި ލިޔެފައި އޮންނަޕާޓީ އެކެވެ. އެހިނދު އިސްލާމްދީން ފުރިހަމަގޮތުގައި އެޕާޓީން ހިމާޔަތްކޮށްދޭން ޖެހޭނެއެވެ. ﷲގެ ޝަރީއަތް ބިމުގައި ގައިމުކޮށްދޭން މަޖުބޫރު ވާނެއެވެ. އެއްވެސް ގޮތަކަށް ދީނީ ކަންފުޅެއްނެތް ފެންނަހާމީހަކާއެކު ބައިއަތުހިފައިގެން ދުނިޔެވީ ކަންތަކަށް މިސްރާބުޖަހައިގެން ނުވާނެއެވެ. ޚާއްސަކޮށް މާއްދިއްޔަތު ދަމަހައްޓައި ދުނިޔެވީ ބޮޑެތި މަހުޖަނުންނާއެކު ބައިއަތުހިފައިގެން ނުވާނެއެވެ. ދީނީގޮތުން އިލްމުވެރި ޝައިޚަކު ގައުމުގެ ރައީސްކަމަށް ނެރުމަކީ އެމީހުންގެ އެންމެއިސް ވާޖިބެވެ. އެއީއެމީހުންގެ މައްޗަށް ލާޒިމުކަމެކެވެ. އަދި ޕާޓީތައް އެކުވެގެން އުފައްދަންޖެހޭ ކޮންމެ މުއައްސަސާއަކަށް ރަނގަޅު އިލްމުވެރި ޝައިޚެއްނެރެ ދައްކަންޖެހޭނެ ބައެކެވެ. އަދާލަތުގައި އެފެންވަރުގެ ޝައިޚުން ނެތީކީނޫނެވެ. އެބަތިއްބެވެ. އަދާލަތަކީ މިމަގްސަދުގައި މަސައްކަތް ކުރަންޖެހޭ ބޮޑުސިންގާދީނީ މަސްއޫލިއްޔަތެއް ކޮނޑުގައި އެޅިފައިވާ މާތްބައެކެވެ. އެހެންޕާޓީތަކައި ވަރަށް ތަފާތުވާން ޖެހޭނެބައެކެވެ. ފަހެ، އަދާލަތުޕާޓީ އުފެދިގެން އައިދުވަސްވަރު ގިނަޝައިޚުން ތަކެއް އަދާލަތައި ބައިވެރިވަމުން ދިޔައެވެ. އަދި އެޕާޓީއަކީ، ރަނގަޅުގޮތުގައި އިޚްލާސްތެރި މަސައްކަތްތަކެއް ﷲއަށްޓަކައި ކުރިޖަމާއަތެކެވެ. ދީނީފޮތްތައް ލިޔުމާއި ދީނީވައުޒު ވިދާޅުވުން ވަރަށް އިޚްލާސްތެރި ކަމާއެކު ކުރިޔަށް ގެންދިޔައެވެ. އެހެންވުމާއެކު، އެމާތް މަގުސަދު ދެމެހެއް ޓުމަށްޓަކައި ރާއްޖޭގައި ތިއްބެވި ވަރަށްގިނަ ޝައިޚުން އަދާލަތުޕާޓީއައި ގުޅިބައިވެރިވިއެވެ. އަދި ރައްޔިތުންގެ ވަރަށްގިނަބަޔަކު ތާއީދުކުރިއެވެ. އަޅުގަނޑަކީ، އެމްޑީޕީ އުފެދިގެން އައިދުވަސްވަރު އިލްމުވެރިން ވަކިން، ވަކިޕާޓީއެއް ނުހަދައި، އެމްޑީޕީއާގުޅިގެން ހުރިހާޝައިޚުން އެކުގައި ކުރިޔަށް ގެންދެވޭތޯ ވަރަށް މަސައްކަތްކުރި މީހެކެވެ. އެހެނަސް ޝައިޚު ހުސައިން ރަޝީދު ބޭނުންފުޅު ވެލެއްވީ ވަކިން ޕާޓީއެއް އުފައްދައިގެން ކުރިޔަށް ދިއުމަށެވެ. ޕާކިސްތާނުގައި ކިޔަވަންތިބި ދުވަސްވަރުވެސް އެކަންވީ ހަމައެހެންނެވެ. އަޅުގަނޑާއި ދެތިންކުދިން އިސްވެތިބެގެން ޖާމިއާސަލަފިއްޔާ ޕާކިސްތާނުގައި ތިބޭހުރިހާ ދިވެހިކިޔަވާ ކުދިންވެގެން ޖަމްއިއްޔާއެއް ރަޖިސްޓްރީ ކުރެވިފައި އޮއްވާ، ޝައިޚު ޙުސައިން ރަޝީދު މަސައްކަތް ކުރެއްވީ ޕާކިސްތާނުގައި ވަކިޖަމްއިއްޔާއެއް ހަތަރުފަސް ކުއްޖަކުވެގެން ރަޖިސްޓްރީކޮށްގެން ކުރިޔަށް ގެންދާށެވެ. ކަންކުރެއްވީވެސް ހަމައެހެންނެވެ. ފަހުން މިޖައްއިއްޔާގެ މަގްސަދަކަށް ވެފައިއޮތީ ފައިސާއެއްކޮށް މާއްދިއްޔަތަށް މަސައްކަތްތަކެއް ހިންގުމެވެ. މެދުއިރުމަތީގެ އެމްބެސީތަކުން ޕާކިސްތާނުގައި ކިޔަވާކުދިންނަށް އެހީވުމުގެ ނަމުގައި ފައިސާހޯދައި އަމިއްލަ ބޭނުންކުރިއެވެ. އައްސައްޔިދު އަބުލްއައުލާ މައުދޫދީ (އެމާތް މަރުހޫމަށް، ﷲރުއްސުންލައްވާށި! އާމީން!) އައިދިމާއަށް ހަޑިހުތުރުކޮށް އެއްޗެހި ގޮވާފައި ފޮތްޗާޕްކޮށް ނެރެހަދައިގެން ފައިސާހޯދިއެވެ. މުޅިންވެސް ހިންގީ މިކަހަލަ ކަޅުމަސައްކަތެވެ. ކުރެއްވީ އަނދިރިކަންތަކެވެ.
ފަހެ، ދަންނާށެވެ! ސިޔާސީޕާޓީއެއް ކަމުގައިވާ އަދާލަތުޕާޓީ، މިހާރުވަނީ އެމީހުން އުފެދުނު މަގްސަދައި ޚިލާފަށް މާއްދިއްޔަތައި ދިމާއަށް ލެނބިފައެވެ. ރާއްޖޭގައިހުރި އެންމެމަޝްހޫރު ވިޔަފާރިވެރިޔާ އޮނަރަބްލް ގާސިމް އިބްރާހީމްގެ ފަހަތަށްޖެހި ބައިއަތުހިފާފައެވެ. ބޭނުމަކީ ހަމައެކަނި މާއްދިއްޔަތެވެ. ޝައްކެއްނެތެވެ. ދެވަނަ ދޭއްޗެއްނޫނެވެ. ޣާޔަތަކީ، ހަމައެކަނި ގާސިމުގެ ފަހަތުގައިތިބެ ރާއްޖެތެރޭގެ ރަށްތަކުގައި ހިނގާލާއި ރަށްތަކުގެ އަހުލުވެރިންނަށް ފަޚުރުވެރިކަން ދައްކާލުމެވެ. އެޝުހުރަތު ހާސިލުކުރުމެވެ. ގާސިމުގެ ކުރިމަތީގައި އަންހެން ވެރިންލައްވާ ފައިސާދީގެން ނައްޓުވާއިރު މިބޭފުޅުން ތިއްބަވަނީ ބައްލަވާށެވެ. ފަހެ، އެންދެރި ކޭންޕަކީ، ކާމިނީކޭންޕާ ޚިލާފަށް މިފަދަ ސިޔާސީކަންތައް މާދުރާލައި ރާވައިގެން ހިންގާބައެކެވެ. ރައީސް ނާސިރު އިރުންފެށިގެން އެންދެރިމާގޭ އޮނަރަބްލް އިލްޔާސް އިބްރާހީމް ހުންނެވީ ރާއްޖޭގެ ސިޔާސީ މަތިފަޑީގައެވެ. ދިވެހިރާއްޖޭގައި ރައީސްމައުމޫނުގެ ވެރިކަމުގެ ކުރީކޮޅުގައި ފެށުނުއިސްލާހީ ހަރަކާތްފެށި، އެމްޑީޕީވުޖޫދަށް އަންނަންފެށި ހިސާބުން އެކަމުގެ ތެރެއަށް މާދުރާލައި ގާސިމުވެއްދީ އެންދެރި ކޭންޕުގެ ބުއްދިއާއި ވިސްނުމުގެ ދަށުންނެވެ. 1994 ވަނަ އަހަރުތެރޭގައި ސިޔާސީޕާޓީއެއް އުފައްދަންކުރި މަސައްކަތުން މިރާއްޖޭގައި ސިޔާސީޕާޓީއެއް ވުދޫދަށް އައުމަކީ ހިނގާނެކަމެއްކަން ރައީސް މައުމޫނަށް ކަށަވަރުވުމާ ގުޅިގެން، 2001 ވަނަ އަހަރު ސިޔާސީޕާޓޯއެއް އެމްޑީޕީގެ ނަމުގައި އުފެއްދުމަށް ކުރެވުނު މަސައްކަތުގެ ތެރެއަށް ގާސިމުވެއްދީ އެންދެރި ކޭންޕުގެ ދުރުވިސްނުމުގެ ދަށުންނެވެ. މިއުސޫލުން އަދާލަތުޕާޓީއާއެކު ގާސިމުގެ ގުޅުންތައްވަނީ ޖުމްހޫރީޕާޓީ އުފެދުމުގެ މާކުރިން ފެށިފައެވެ. މިއަދު މިފެންނަނީ އެނަތީޖާއެވެ. ފަހެ، ދަންނާށެވެ! އަދާލަތުޕާޓީން ﷲގެ މަގުގައި ޚިދުމަތްކޮށްދޭން ބޭނުންނަމަ، ކުރިންވެސް ތިއްބެވިގޮތަށް ތިއްބަވައިގެން ދީނީގޮތުން އިލްމުވެރި ޝައިޚުން އިސްކޮށްގެން ގައުމަށް އިޚްލާސްތެރި ކަމާއެކު ޚިދުމަތްކޮށް ދެވުނީހެވެ. ގާސިމުކަހަލަ ދެއްކުންތެރި މީހަކަށް ބައިއަތުހިފާކަށް ނުޖެހުނީހެވެ. އަތޮޅުތަކުގެ ރަށްތަކުގައި ތިއްބެވި އަދާލަތުގެ ސަޕޯޓަރުންނަށް މިކަމާމެދު ވަރަށް އިޚްލާސްތެރިކޮށް ވިސްނެވުމަށް އަޅުގަނޑު ގޮވާލަމެވެ. ފަހެ، އަޖައިބުވާންޖެހެނީ އަދާލަތުން ހޮވާލެވުނު ހަވާރީބޭކަލުންގެ ބާރަބޭކަލުން ހިމެނޭކޮމެޓީއަށް ގާސިމުވަރުގެ ދީނަށް ލޯބިޖެހިފައިހުރި މީހަކުނޫނީ ނުފެނުނީމައެވެ. ހަވާރީބޭކަލުން އެބެއްލެވި ހަމަތަކެއްގެ މޮޅުކަމުންނެވެ. ހަމަޓަސްލާފައި ލާދީނީކަންކަމާ، އެންމެދުރުގައި ހުންނެވި މީހަކީ ގާސިމުކަމުގައި ވެއްޖެއެވެ. މާކުސްތަކެއް ދީގެން ހޮވިވާހަކައެއް ދެކެވެއެވެ. ގާސިމާ ގުޅެން މަޖްވީ އެހެންވެގެން ކަމަށް އިއުލާނު ކުރެވުނެވެ. ފަހެ، އަޖައިބެއް ފަދައެވެ! ބަނގުރަލާއި އޫރުމަހާނުލައި ފަތުރުވެރިކަން ހިންގިދާނެކަމަށް ދައުވާކޮށް، ގޮވާލަމުންދިޔަ މީހުން ބައިއަތުހިފީ އެމަސައްކަތުން މުޅިދިރިއުޅުމާއި މުޅިއާއިލާގެ ދިރިއުޅުން އާރާސްތުކުރާ މީހަކު ގައުމުގެ ވެރިކަމަށް ނަގަހައްޓާށެވެ. އަދި ގަދައަޅައި އެމަސައްކަތް ރާއްޖެތެރޭގައި ދިރުވާށެވެ. މުޅިރާއްޖެއަށް ފަތުރާށެވެ. ރައްޔިތުންގެ ހައްގުމުދަލުން އޭނާ މުއްސަނދިވެފައި ވާގޮތް ހަދާންނެތިއްޖެއެވެ. ސިޔާސި މިމަސައްކަތަކީ އެންދެރި ކޭންޕުދިރުވަން ވެގެން އޭނާ، ގަދައަޅައިކުރި މަސައްކަތެއްކަން ހަދާންނެތިއްޖެއެވެ. އޭނާއަށް ދިވެހިޚަޒާނާގެ ބަނޑޭރިކަން ކުޑަދުވަސް ކޮޅަކަށްދީ، ދިވެހިނޫޓުގައި އޭނާގެ ސޮއިޖެއްސުވީ، ކޮންފަދަ އެއްބަސްވުން ތަކެއްގެ ދަށުންކަން މުޅިންހަދާން ނެތިއްޖެއެވެ. ދިވެހި ޚަޒާނާއައި ހަވާލުވެގެންއެވީ ކުޑަދުވަސްކޮޅުގައި އަމިއްލައަށާއި އަމިއްލައާއިލާއަށް މިލްކުކުރި ރައްޔިތުންގެ ހައްގުމުދާތައް މަތިން މުޅިންހަދާން ނެތިއްޖެއެވެ. ފަހެ، ހުޅުމާލެއިން ނެގިބިންތައް ކޮބައިތޯއެވެ؟ ރާއްޖެތެރެއިން ނެގިބިންތައް ކޮބައިތޯއެވެ؟ އެތައް އެތައް ފަރާތްތަކެއް މެދުވެރިކޮށް، އަމިއްލަ މަސްލަހަތައް އެމްޓީޑީސީން (ރައްޔިތުންގެ ފަތުރުވެރި ކުންފުނި) ނެގި ހިއްސާތައް ކޮބައިތޯއެވެ. އެސްޓީއޯ (ރައްޔިތުންގެ ވިޔަފާރި ކުންފުނި) އިން، ނާޖާއިޒުކޮށް ލިބިގަތް އެހީތަކާއި ފައިދާތައް ކޮބައިތޯއެވެ؟ އިއްދާގައިއިން އަންހެނަކާއެކު ހިންގިނުލަފާ ބަދުއަޚްލާގީ ކަންތައް ކޮބައިތޯއެވެ؟ އަދާލަތު ޕާޓީން މިކަންތައްތައް ހަދާންނައްތާލީ، މާއްދިއްޔަތުގެ އަވާގައި ޖެހިގެންނެވެ. ގާސިމުގެ ފައިސާވެރިކަމުގެ ދަހިވެތި ކަމުގައެވެ. ވެއްޖެ އިއުތިރާފަކީ އަނބުރާރުޖޫއަ ވެވޭނެއެއްޗެއް ނޫނެވެ. ފަހެ، އަދާލަތުގެ ދަންނަބޭކަލުންނޭވެ! އަޖައިބުވެ އަންތަރީސް ވެއްޖެއެވެ! އަދާލަތުގެ އިލްމުވެރިން ކޮސްގޮވާހިސާބަށް ވާސިލުވީމައެވެ. ގާސިމު ހަތަރުއަނބިން ގެންގުޅުމަކީ، ދިވެހިދައުލަތް ހަމަހަމަކަންމަތީ ހިންގިދާނެ ކަމުގެ ހުއްޖަތަކަށް ހަދާއި އެވާހަކަތައް ގޮވީމައެވެ. ދިވެހިންގެ ލޮބުވެތި ފަޚުރުވެރި ދިވެހި ދައުލަތް ގަސިމުގެ ގޮތެއްފޮތެއްނޭގޭ އަނބިންނައި އެއްހަމައަށް އަދާލަތުން ވައްޓާލުމުންނެވެ. އަދިފަހުން މިވާހަކަތައް ފޮރުވުމަށް މަސައްކަތް ކުރިކަންވެސް ވަނީ ސާބިތުވެފައެވެ. ފަޅާއަރާފައެވެ. ފަހެ، އޭގެމާނައަކީ، އަދާލަތުގެ ބައެއް ހެޔޮވިސްނޭ ދަންނަބޭކަލުން އެކަމާ ނުރުހުން ފާޅުކުރުމެވެ. ފަހެ އަދާލަތު މިއަދުމިވަނީ، ވިޔަފާރިވެރިން ކޮޅެއްގެ މުށުތެރެއަށްވަދެ ސިޔާސީކަންކަމަށް ދީނުގެ އުސޫލުތައް ބަދަލުކޮށް، ވިއްކާބަޔަކަށް ވެފައެވެ. މިވެރިންނަށް ދައުލަތުގެ ވެރިކަމަށް އާދެވުނަސް ވާނީމިވަރުކަން ކަށަވަރެވެ. ފަހެ، އަދާލަތުގެ ކޮސްގޮވުމުގެ ތެރޭގައި ގާނޫނުހަދާ މަޖިލިސްކަމުގައިވާ ދައުލަތުގެ ބޮޑުއެއްބާރު ކުށްވެރިކޮށް އަޑުއުފުލައިފިއެވެ. އެމަޖިލީހުގެ ބައެއް މެންބަރުންނަކީ، އަމިއްލައެދުން ބޮޑުބައެއްކަމަށް ބުނެފިއެވެ. ގޮވާނަގައިފިއެވެ. ހަގީގަތުގައި މިގޮވެނީ ކޮސްކަމެއް ނޭގެއެވެ. ގާސިމު ކުންފުނި ހިންގާއުސޫލުން ގައުމު ހިންގޭނެކަމަށް ދެކި، ކޮސްގޮވުމަކީ މޮޔަވިސްނުމެކެވެ. ގާސިމު އަމިއްލައަށް މިހާރުވެސް އެތައް މިނިސްޓްރީތަކެއް ހިންގާކަމަށްބުނެ އާންމުކޮށް ރައްޔިތުންގެ ތެރޭގައި ކޮސްގޮވައިފިއެވެ. ވިޔަފާރި ހިންގުމަކީ ގައުމު ހިންގުމަށްވެވޭ ޓްރޭނިންގެކޭބުނެ މަރުކޮސް ގޮވައިފިއެވެ. އަދާލަތުގެ ދަންނަބޭކަލުންގެ ވިސްނުމާހެދި އަޖައިބު ވެއްޖެއެވެ! ފަހެ، މިކަންކަމަށް ތާއީދުކުރުމުން ނުސީދާކޮށް ތާއީދުއެކުރެވެނީ ދީނާދައުލަތްވަކި ކުރުމަށެވެ. ޢިލްމާނީ، ސެކިއުލާ ގޮތްގަނޑަށެވެ. އޭރުން ދީނުން ދައުލަތްބޭރު ކުރެވުނީއެވެ. ދީނީ ވުޒާރާއެއް ގާސިމުގެ ސަރުކާރުން ލިބުނީމާ ހުރިހާކަމެއް ހައްލުވެ ނިމުނީތޯއެވެ! ގާސިމުގެ އެންމެ ފުރަތަމަ ކަމަކަށް 2008 އޯގަސްޓް 22 ވީހުކުރު ދުވަހުގެރޭ ޖުމްހޫރީޕާޓީގެ ކޮންގުރެސްގައި އިސްނަންގަވާއި އިއުލާނުކުރެއްވީ، އޭނާގެ ސަރުކާރުގައި އަދާލަތަށް މިނިސްޓްރީއެއް އުފައްދައިދޭނެ ވާހަކައެވެ. ފަހެ ގާސިމުގެ ރިޒޯޓެއްގައި އެއްބަސްވެވުނު ކަމަކީމީބާވައެވެ. ފަހެ މިއީ ވަޒީރުކަމުގެ ގޮނޑިއަކަށް ފާޅުގައި ދީންވިއްކާލުމެވެ. ގާސިމަކީ އެންދެރިމާގޭގެ އުފެއްދުމެއްކަން އަދާލަތަށް ނުވިސްނުނެވެ. ގާސިމަކީ ހުއްދަލިބިގެން ރައީސް މައުމޫނަށް އެއްޗެހި ކިޔާފައި މެޑަމް ނަސްރީނާއަށް، އެންދެރިމާގެއަށް ވެރިކަން ހޯދައިދޭން އަޒުމް ކަނޑައަޅައިގެން ހުރިމީހެއްކަން އަދާލަތަށް ނުވިސްނުނެވެ. އައިޑީޕީގެ ވެރިޔާ އަލްފާޟިލް ދޮންޖޭމު އުމަރުނަސީރަށްވުރެ ވިސްނުންޅަކަމަށް ފެނެއެވެ. ސޭކުކަންބޮޑެވެ. ފަހެ ވިސްނާށެވެ! ޚުދުގާސިމުގެ ބަހުން މާރީތިކޮށް އެކަންސާބިތުވޭ ނޫންތޯއެވެ! އެއްގޮތަކަށްވެސް ރައީސް މައުމޫނަށް ކުޑަނަމަވެސް އެއްޗެއް ވިދާޅުވެފައެއް ނެތެވެ. ރައީސް މައުމޫނު މުޅިން ސާފެވެ. ތާހިރެވެ. ހުރިގޮތަށް ހުންނެވި އާއުސްމިންތަކެކެވެ. އާއުދަރެހެކެވެ. ފަހެ ގާސިމުގެ ގާތުގައި ގޯސްވެގެންމިއުޅެނީ ވެރިކަންކުރާ ނިޒާމެވެ. ވެރިމީހާއެއްނޫނެވެ. އަޅުގަނޑުމެންގެ ދުޝްމަނަކީ، އަޅުގަނޑުމެންގެ މައްޗަށް ވެރިކަން ކުރަމުންއައި ނިޒާމްކަމަށާއި އަޅުގަނޑުމެންގެ ހައްގުތައް ނިގުޅައިގަތް ނިޒާމު، އަޅުގަނޑުމެންގެ ރައްޔިތުންގެ ތެރޭގައި ތަފާތުތައް ގައިމުކުރި ނިޒާމު، އަޅުގަނޑުމެންގެ ތެރޭގައި ފިތުނަފަސާދަ އުފައްދާއި އަޅުގަނޑުމެންގެ ރައްޔިތުން މަސްތުގެވަބާގައި ޖެއްސިނިޒާމު، ބޯހިޔާވަހިކަމުން ރައްޔިތުން މަހްރޫމްކުރުވި ނިޒާމު، ބޭސްފަރުވާ ހޯދަން އާދޭސްކުރަން ޖެހުނުނިޒާމު ކަމުގައި ގާސިމު ހަރުއަޑުން ވެރިކަމަށް ނުކުންނެވި ދުވަހު ވިދާޅުވިއެވެ. ފަހެ، އެވިދާޅުވާ ނިޒާމުތަންފީޒުކޮށް ދަމަހައްޓަނީ ކާކުތޯއެވެ. މީހެއްނޫންތޯއެވެ. އެއީއަމިއްލައަކަށް ތަންފީޒުވެ ދެމެހެއްޓޭނެ އެއްޗެއްނޫނެވެ. ނިޒާމު ތަންފީޒުކޮށް ދަމަހައްޓާމީހާ ގޯސްނުކޮށް ނިޒާމަށް އެއްޗެހިކިޔުމަކީ، ކޮސްގޮވުމެވެ. ހުސްއަނގަތެޅުމެވެ. މިޒާތުގެ ކޮސްގޮވުމާއި ހުސްއަނގަތެޅުން ގަބޫލުކުރާނީ މާއްދިއްޔަތަށް ހެއްލިފައިވާ ޕާޓީތަކުންނެވެ. އޭ! ﷲ އެވެ! އަޅަމެންނަށް ހެޔޮވިސްނުން ދެއްވާށިއެވެ! ދީނީޝައިޚުންގެ އަގީދާވަރުގަދަ ކުރައްވާށިއެވެ! އާމީން!