އިލްޔާސް ހުސައިން އިބްރާހީމް. (ލިޔުނީ: 2008 މާޗް ގައި.)
ރާއްޖޭގެ ސިޔާސީ މުފައްކިރުންގެ ވިސްނުން މިދުވަސްކޮޅު ހުއްޓިފައިވަނީ، އެއްއަމާޒަކަށެވެ. އެއް ޓާގެޓަކަށެވެ. އަސާސީ ގައި ލިޔުމަށް ނިންމާފައިވާ އިންތިގާލީ މަރުހަލާ، ނުވަތަ އިންތިގާލީ ބާބު އަސާސީގައި ލިޔެވިގެން ދާނެ ގޮތަކާމެދު ގައެވެ. 14 ފެބްރުއަރީ 2008މ، (ބުރާސްފަތި) ދުވަހުއޮތް ބޮޑުމަޖިލީހުގެ 253 ވަނަ ޖަލްސާގައި ނެގުނު ވޯޓަކީ، ރާއްޖޭގެ ސިޔާސީ މަސްރަހަށް ވިސްނާ ކޮންމެ ދަރިޔަކު މުޠޯލިޢާ ކުރުން ލާޒިމު ނަތީޖާ އެކެވެ. މިއީ ވަރަށް ގިނަ ބަޔަކު ޑިއާރުޕީ ކޮޅަށް ވޯޓު ދެއްވި ނަތީޖާ އެކެވެ. ނިއުމޯލްޑިވްސް އާއި ޕީއޭ ބޭފުޅުން ޑީއާރުޕީ ފަޅިޔަށް ޖެހުނު ފަހަރެކެވެ. ހަގީގަތަކީ، މި އެންމެންނަކީ ވެސް ޑީއާރުޕީގެ ޒައީމު، ރައީސް މައުމޫނުގެ ވެރިކަމަށް ރުހޭ މީހުންކަމެވެ. ދުވަހުނޫސް ތަކުން، ޚާއްސަކޮށް މިނިވަން ނޫހުން މިމައުލޫމާތުތައް ފުރިހަމަކޮށް ލިބޭނެ ކަމުގެ އުންމީދު ކުރަމެވެ. ބައެއް ފަހަރު އެނޫހަކީ ރަނގަޅު އެއްޗެކެވެ. އާއަސާސީ ގައި ހިމެނޭ “ރައީސުލް ޖުމްހޫރިއްޔާގެ ބާބު” ގެ 10 ވަނަ މާއްދާގެ (ދ)، ބޭރު ގައުމު ތަކަށާއި ބައިނަލް އަގުވާމީ ޖަމާއަތްތަކަށް، ސަފީރުން އައްޔަން ކުރުމުގެ ބާރު، ރައީސުލް ޖުމްހޫރިއްޔާއަށް ޚާއްސަ ކޮށްފައި ބޭއްވުމުގެ މަގްސަދުގައި އެމާއްދާ ޑްރާފްޓް ކުރެވިފައި އޮތްގޮތް ވަނީ ފެއިލްކޮށް ލާފައެވެ. މިއީ މިހާރު މިއޮތްސަރުކާރު އުމުރަށް ދެމެހެއްޓުމަށް ބޮޑުމަޖިލީހުގައި ސިޔާސީ އޮއިވަރު އޮތްގޮތެވެ. ސަފީރުން އައްޔަން ކުރުމަކީ، ވަރަށް ބޮޑު ގައުމީ މައްސަލައެކެވެ. މުޅި ރައްޔިތުންނާގުޅި، ލާމެހި ފައިވާ ރައްޔިތުންގެ މަސްލަހަތާ ސީދާގުޅި ފައިވާ، އަމުދުން ދައުލަތަށް ޚާއްސަ ކުރެވިފައި އޮންނަން ޖެހޭނެ މުހިންމު ކަމެކެވެ. ހަމަ އެކަނި ސަރުކާރާ ހަމައިން، ހުއްދަ ދެވޭވަރަށް ވުރެ މާފުޅާކޮށް އޮންނަންޖެހޭ ކަމެކެވެ. މުޅި ރައްޔިތުންގެ މަސްލަހަތާ ގުޅި، ދައުލަތުގެ ފެންވަރުގައި އޮތްކަމެއްގައި ހަމައެކަނި ރައީސުލް ޖުމްހޫރިއްޔާ އަށް ފެނިވަޑައި ގަންނަވާ މީހަކު އެކި ގައުމު ތަކަށް ފޮނުވުމުގެ ބާރު، ސިދާ އެމަނިކުފާނަށް، ދޫކޮށްލުމުން ވާނެ ގޮތަކީ، ތިމާގެ މީހުންނާއި ދަންނަ ގާތްމީހުންނާއި ކުޑައިރާއި ޒުވާން ދުވަސްވަރު އެކުގައި މަޖާކޮށް، ކުޅިވަރު ކުޅެންށާއި އެކުގައި ކިޔަވަން އުޅުނު ރަހްމަތްތެރިން ނަށް، މިފަދަ މަގާމުތައް ދިނުމުގެ ދޮރު ހުޅުވާލެވުނީ އެވެ. ފަހެ، މިއީ ރައްޔިތުންގެ މަސްލަހަތު ހިމެނޭ ދައުލަތާ ގުޅިފައިވާ ކަމަކަށް ވާތީ، މިކަންތައް އަސާސީގައި ލިޔެވި، ހަމަޖެހިގެން ދާންޖެހޭނީ، ރައްޔިތުންގެ މަންދޫބުންގެ މަޝްވަރާއާ އެކުގައި ހަމަޖައްސާ ގޮތަށެވެ. ރައްޔިތުންގެ މަޖިލީހުގެ މަޝްވަރާ މިކަމުގައި އޮންނަންޖެހޭ ގޮތަށެވެ.
ފަހެ، 253 ވަނަ ޖަލްސާގައި، މި މާއްދާ ޑީއާރުޕީން، ތިންވަނަ ބުރަށް ފެއިލްކޮށްލުމަށް ފަހު، ރައްޔިތުންނަށް އެދަށްކައިދިނީ، އިންތިގާލީ ބާބަށް އަދި އަސާސީގެ ބައެއް ބަސްތައް މާނަކުރުމުގެ ބާބަށް ވެސް ހަދާލާނީ ހަމަ މިގޮތް ކަމުގައެވެ. ފަހެ، މިކަންތައް މިހެން އޮތްއިރު، ރައްޔިތުން އެދި، ގަބޫލުކޮށް ގެންތިބެ އަޑުއުފުލާ އިސްލާހުތަކާ ދެކޮޅަށް، ފަރުދާގެ އަނެއްފަރާތުގައި ފިލާ ތިބެގެން، ހިންގަމުން އެގެންދާ އުދުވާން ތަކަށް ފިކުރު ހިންގާލުން މުހިންމެވެ. ލާޒިމެވެ. މެމްބަރުންގެ ފިކުރާއި ޒަމީރާ ކުޅެލުމުގެ ބޭނުމުގައި ހިންގަމުން އެގެންދާ، މަގާމުތައް މަތިކުރުމާއި މުސާރަތައް ބޮޑުކުރުމާއި ނަގުދު ފައިސާގެ އެހީތައްދީ، ލޯނުތައް ދަނީ ދެމުންނެވެ. ވަކި ބަޔަކަށް ބަހަމުންނެވެ. ބޮޑުމަޖިލީހުން މިފެންނަނީ، އެކުލަވަރުގެ އަލާމާތް ތަކެވެ. މިއީ ސީދާ ދިވެހި ރައްޔިތުންގެ ވިންދާ ކުޅެލުމެވެ. އަދި، އިދިކޮޅު ހަރަކާތް ފިނި ކުރުމެވެ. ރޫޅާލުމެވެ.
ފަހެ، ރައްޔިތުންނާ ދެކޮޅު މިފަދަ އުދުވާންތައް، ބާރު ސްޕީޑުގައި ރޭވެމުން ތަންފީޒުވަމުން ކުރިޔަށްދާ އިރު، ސިޔާސީ އުދަރެހަށް މަތިކޮށް ފައިވާ އެންމެ ބޮޑު ވިލާގަނޑަކީ، ވަރަށް ފުންކޮށް ވިސްނައި އެކިގޮތް ގޮތަށް ސިޔާސީ މުފައްކިރުން ފިކުރު ހިންގަން ޖެހޭ، ވަރަށް ވައިބާރު ކޮޅި ގަނޑެ ކެވެ. އެވިލާ ގަނޑަކީ ވަރަށް އަވަހަށް، މިއަންނަ އެޕްރީލް ހިސާބުގައި ބޭއްވުމަށް ރޭވެމުންދާ ޑީއާރުޕީގެ ބޮޑު ބައްދަލު ވުމެވެ. އެޕާޓީގެ ބޮޑު ނިންމުން ނިންމާ ކޮންގުރެސެވެ. ރައީސް މައުމޫނު އަރިހުގައި ނައިބެއްގެ ގޮތުގާ ހުރިހާ ވަގުތެއްގައި ދުވާނެ ބޭފުޅަކު، ހަމަޖެއްސުމެވެ.
ފަހެ ދަންނާށެވެ! ވިސްނުމަށް އޮތް ޕޮއިންޓަކީ، މިއެވެ. އަޅުގަނޑުގެ ވިސްނުމަށް މިއަދާ ހަމައަށް ވިސްނެނީ، މިކަން ނިމިގެން ދާނީ، އާ ކުޅިއެއް ދިވެހި ސިޔާސި މަސްރަހަށް، އުފަންކޮށްފަ ކަމެވެ. ރައީސް މައުމޫނު، ކޮނޑަށް އަރުވާ، ސަވާރު ކޮށްގެން ދުވާނެ ބޭފުޅަކަށް، ޑީއާރުޕީން ނިންމަވާނީ، އެޕާޓީގެ އެއް ނައިބު ޒައީމު ކަމުގައިވާ މަހާ ސައުދާގަރު އޮނަރަބްލް ގާސިމް އިބްރާހީމެވެ. ދެން ތިއްބެވި އަނެއް ދެޒައީމުން، ޑީއާރުޕީގެ އިއްޒަތްތެރި މެމްބަރުން މިނިންމެވި ކަރާމާތްތެރި ނިންމެވުމަށް، “ހިތުގެ އަޑިން” ތާއީދުކޮށް، މިދެބޭފުޅުންގެ ޒައާމަތުގެ ދަށަށް ޖެހިލައި އިތުރު ހިތްވަރަކާ އެކު ފަށައި ގަންނާނީއެވެ. ފަހަރުގައި އޮނަރަބަލް ތަސްމީނު އަލީގެ ދެވަނަ އިސްތިއުފާ ސިޓީއެއް، ރައީސް މައުމޫނަށް ލިބުމަކީ ވެސް ގާތްކަމެކެވެ. އޮރަބްލް އަހްމަދު ޝިޔާމާއި ތަސްމީނު ތަފާތު ވާނެ ތަންކޮޅަކީ މިއެވެ. ދެން ޑީއާރުޕީގެ މި ކަރާމާތްތެރި ނިންމުމަށް މަރުހަބާ ކިޔާ، ޑިއާރުޕީއާ ގުޅޭނެ ދެތިން ސިޔާސީ ޕާޓީއެއް ފެނިގެން ދާނެއެވެ. އޮނަރަބަލް ޔާމީނުގެ ޕީއޭއާއި އޮނަރަބްލް މުހަންމަދު ނައީމުގެ މޯލްޑިވިއަން ނެޝަނަލް ކޮންގުރެސް ޕާޓީ ހިމެނިގެން ދާނީ، މީގެ ތެރޭގައެވެ. ފަހަރުގައި ނިއުމޯލްޑިވްސްގެ ހިތް، ބަދަލުވެދާނެ އެވެ. ޑޮކްޓަރ ޝަހީދަކީ، މިހާރުވެސް ޑީއާރުޕީގެ ބޭފުޅެކެވެ. އަލްއުސްތާޒު ޖަމީލަކީ ވެސް އެޕާޓީގެ ބޭފުޅެކެވެ. ގޮށް މިރުސް ކާންދީގެން ރުޅިއަރުވާލާފައި ހުރީ، ހަމައެކަނި ޑޮކްޓަރ ހަސަން ސަޢީދެވެ. ދެން މީގެ އިތުރުން ނިއުމޯލްޑިވްސް އަށް ހަމްދަރުދީވާ، އޮނަރަބްލް އައިޝަތު މުހަންމަދު ދީދީ އާއި އޮނަރަބްލް ހިލްމީ އާއި އޮނަރަބްލް މަޢުރޫފާއި އޮނަރަބްލް ވަހީދުއްދީން މެންފަދަ، އެންމެން ވެސް ތިއްބެވީ ޑީއާރުޕީގަ އެވެ. މިއަލަމާތްތައް ދަށްކާ ގޮތުން ނިއުމޯލްޑިވްސް ވެސް ގުޅޭނީ އެޕާޓީއާ އެވެ.
ފަހެ، ރައްޔިތުން މިއަދު ހަދާން ކުރަން އޮތް މުހިންމު ފިލާވަޅަކީ، ރައީސް މައުމޫނަށް މިގޮތަށް ދިމާވާ ކޮންމެ އެކަހެރި ވެގެންދާ ދަނޑިވަޅެއް ގައި، އަރުއްވައި ސަވާރުވެ ވަޑައި ގެންނެވުމަށް ކޮނޑު ދިއްކޮށް ލައްވަނީ، ބުރުމާ ގާސިމެވެ. ރައީސް މައުމޫނަށް ވާގިވެރި ވުމަށް ޓަކައެވެ. މެޑަމް ނަސްރީނާ އިބްރާހީމަށް ވެވޭ ހަމްދަރުދީ އަކުން އުރުތިއަރައި ގަންނަ، އިހުސާސް ތަކެއްގެ ބޮޑުކަމުން ނެވެ. މިއީ ގާސިމުގެ ނުރުހުމުގައި ވިޔަސް، އަދި ރުހުމުގައި ވިޔަސް، މިކަން ވެގެން ހިނގައިދާނެ ގޮތެކެވެ. ތާރީޚު އެބަ ހެކިދެ އެވެ. ބެޓަރ ޑިމޮކްރަސީގެ ނަމުން މަޝްހޫރުވި، ފަހަރަށް ނަޒަރު ކޮށްލައްވާށެވެ. ރައީސް މައުމޫނު ހިތްޕެވުމަށް، އެފަހަރު ދިއްކޮށްލެއްވީ، އެއް އިނގިއްޔެވެ. އަދި އޮނަރަބްލް އިލްޔާސަށް، 18 ވޯޓު ލިބުނު ބުރުގައި ޚަތިމުމަތީގާ އަތްތިލަ ޖައްސުވައި ހުވާކުރުވާއި ފައިސާ ބަހައިގެން ރައީސް މައުމޫނަށް ވާގިވެރި ވެފައިވަނީ ވެސް ހަމަ، ބުރުމާ ގާސިމެވެ. ރައިސް މައުމޫނަށް މަދަދު ދެއްވުމަށް އެފަހަރު ބެއްސެވީ ނަގުދު ފައިސާއެވެ. އާދެ! ހައެއްކަ އިއްޒަތްތެރި މެމްބަރެއްގެ މައްސަލަ، މިހާރު ކުނިޖެހިފައިވާ، އަލްފާޟިލް ލޭޑީ އިބްރާހީމް މަނިކު ލައްވާ ސިފައިންގެއިން ބައްލުވަން ހަމަޖައްސެވި އެވެ. އަދި، އޮނަރަބްލް އައްބާސް އިބްރާހީމްގެ ވޯޓު ކަޓުވާލީ ކޮންފަދަ އަނިޔާވެރި، އުކުޅަކުން ތޯއެވެ. މިހުރީ، އެމަނިކުފާނު ކުޅުއްވާފައި ހުރި ސިޔާސީ ކުޅިވަރު ތަކެވެ. ރައްޔިތުންގެ ހައްގުތައް ކޮބައިތޯއެވެ؟ ފަހެ، މިފަހަރު ރައީސް މައުމޫނު ކޮނޑަށް ލައްވައިގެން އެންމެ ފުރިހަމަ، ބެސްޓް ޑިމޮކްރަސީގެ ނަމުގައި ތެދުވެ، ނުކުންނަވާނީ، މަގޭކޮނޑުގައި މިއިންނެވީ “ގޯޑް އޮފް ޑިމޮކްރަސީ” އޭ، މިއިންނެވީ “ޑިމޮކްރަސީގެ ބައްޕަ ކަލާނގެ” އޭ، ބުނެ ގޮވާނަގަމުން، ހަމަ ގާސިމުކަމުގައި އަޅުގަނޑަށް ފެނެއެވެ. އޭނާގެ ރުހުމުގައި ނުވަތަ އޭނާގެ ނުރުހުމުގައި ވިޔަސް އޮޅުވާލުމެއްގެ ތެރޭގައި މަޖުބޫރު ކުރުވައިގެން ކަމުގައި ވިޔަސް، މިއީ މިކަން ވެދާނެ ގޮތެކެވެ. ފަހެ، ދަންނާށެވެ! މިކަން ހިނގާނީ، ޑީއާރުޕީގެ އިއްޒަތްތެރި މެމްބަރުންގެ ވޯޓުން ނިންމެވި ބޮޑު ކަރާމާތެއްގެ ގޮތުގަ އެވެ. އެއަކު، ރައީސް މައުމޫނު ކުރައްވާނެ ކަމެއް ނޯންނާނެއެވެ. ނިމިގެންދާނީ، ޕާޓީގެ ފަހު ނިންމުމުގެ ގޮތުގައެވެ. އެމްޑީޕީން ނެރޭނީ ފެށުނީސް ސުރެވެސް އަދި އަބަދުވެސް، އެޕާޓީގެ ގޮނޑީގެ ވެރިޔާ އަލްފާޟިލް މުހަންމަދު ނަޝީދު “އަންނި” އެވެ. ފަހެ، ނުވެ ނުނިމި ހުރިކަންތައްތައް ރައީސް މައުމޫނުގެ ގަރާރުތަކަކުން ހަމަޖެހިގެން ދާނެއެވެ. މަލްޓިޕާޓީ އިލެކްޝަނެއް ރީތިކޮށް ނިމިގެން ދާނެއެވެ. ވާހް ވާހް! ކިހާރީތިތޯ އެވެ. ދިވެހީންގެ ގިނަ ބަޔަކު އަތްތިލަބަޑި ޖަހާ، ބޮޑުބެރަށް ނަށާނެ އެވެ. އީޔޫ އާއި ކޮމަންވެލްތުން އަދި ޔޫއެން އިން ވެސް، މެސެޖްތައް ރައީސް މައުމޫނަށް ފޮނުވާނެ އެވެ. އަތޮޅު ތަކުންވެސް ތަހިނިޔާގެ މެސެޖްތައް އޮހެމުންދާނެ އެވެ. ކިހާރީތިތޯ އެވެ!!! ދުނިޔޭގެ ބޮޑުބާރު ކަމުގައިވާ އެމެރިކާއިން، ޚާރިޖީ ފޭތަންބަރު ކަލޯ، އޮނަރަބަލް އަބްދު ﷲ ޝަހީދުގެ ހީވާގި ހިންގުންތެރި މަސައްކަތްޕުޅާ އެކު، ސައްތައިން ސައްތަ އިސްލާމީ ގައުމެއްގައި އެންމެ ކުރު މުއްދަތެއްގައި ޒަމާނީ ލިބަރަލް ޑިމޮކްރަސީ ގެނެސް ދިން، “ޑިމޮކްރަސީގެ ބައްޕަކަލާނގެ” ކަމުގެ ލަގަބު ރައީސް މައުމޫނަށް، އަރުވާނެ އެވެ. ވާހ! މިއޮއްތީ ވާ އުފާވެރި ފަޒާއެކެވެ. ޖައްވެކެވެ. ދިވެހީން މިކަންކަމާ، ނުވިސްނައި ހަމަ ތިބެންވީތޯ އެވެ؟ ނޫނެކެވެ. ތިބެގެނެއް ނުވާނެ އެވެ. ﷲ އަޅުގަނޑުމެންގެ ޒުވާނުންނަށް އަދި ސިޔާސީ މުފައްކިރުންނަށް ހެޔޮ ވިސްނުން ދެއްވާށިއެވެ. އާމީން!