އިލްޔާސް ހުސައިން އިބްރާހީމް. (ލިޔުނީ: ފެބްރުއަރީ 2008 ގައި)
އޭ! ލޮބުވެތި ރައްޔިތުންނޭވެ! ދަންނާށެވެ! ދުވަހުން ދުވަހަށް ދިވެހި ސިޔާސީ ޖައްވަށް އަންނަމުންދާ ކުރިއެރުމާއި ބަދަލާމެދު، ވިސްނައި ފިކުރުކުރުމަކީ، މިދުވަސްވަރު ކޮންމެދިވެހި ސިޔާސީ މުފައްކިރަކަށް މުހިންމު ވާޖިބެކެވެ. ގައުމަށް ހެޔޮއެދޭނަމަ، ކުރަން ޖެހޭނެ ކަމެކެވެ. ވާޖިބެކެވެ. ލާޒިމުކަމެކެވެ. ފުރަތަމަ ދިވެހިރާއްޖެއެވެ. އެންމެ ކުރީގައި އަބަދުވެސް އޮންނަންޖެހޭނީ އަދި އިސްކުރެވެންވާނީ، މަގޭ ލޮބުވެތި ދިވެހި ރާއްޖެއެވެ. މަގޭ ލޮބުވެތި ދިވެހިވަތަނެވެ. ފަހެ، ތިންވަނަ ދުނިޔޭގެ، އެތެރެވަރީގެ ގައުމުތަކުގައި މާދަމާވެގެން ހިނގައިދާނެ ގޮތެއް، ލަފާކޮށް ނިންމާކަށް އެކަކަށްވެސް ނޭގޭނެއެވެ. ސިޔާސީ ނިންމުންތައް ކުރިޔަށް ކަނޑައަޅާ ނިންމާކަށް އެއްގޮތަކަށް ވެސް ނޭގެއެވެ. އެއީ އެއްވެސް އިންސާނަކަށް އަދި މިހާތަނަށް، ކުރެވިފައި އޮތްކަމެއް ނޫނެވެ. މިފަދަ ގައުމުތަކުގެ ސިޔާސީ މަސްރަހު ކުރިޔާލައި ދިރާސާ ކުރަންނޭގޭތީއެވެ. އަދި ކުރެވޭ ދިރާސާތަކާއި ވަމުންދާގޮތާއި ހަގީގަތާ ދިމާނުވާތީއެވެ. ރައީސް މައުމޫނު ދިވެހި ރައްޔިތުންގެ ޚަޒާނާއިން، ރައްޔިތުންގެ ހުއްދައެއްނެތި، އެތައްމިލިޔަން ރުފިޔާއެއް އިނގިރޭސި ކުންފުންޏެއް ކަމުގައިވާ، ހިލްއެންޑް ނޯލްޓަނަށް ވަނީ، ބޭކާރުގޮތުގައި އަމިއްލަބޭނުމެއް ފުއްދުމަށްޓަކައި ޚަރަދުކޮށް ފައެވެ. ހަމަ ވީކަމެއް ހަރާމުން ހަރާމެވެ. ސުވާލެއްކޮށްލި ފަރާތެއް ނެތެވެ. އޭރުގެ ޚާރިޖީވަޒީރު، ޑޮކްޓަރ އަހްމަދު ޝަހީދައި މިކަމުގައި ސުވާލުކުރެވެން ޖެހޭނެއެވެ. ފަހެ މާދަމާއަށްޓަކައި ކުރެއްވި އެއްވެސް ދިރާސާއަކާއި ހޯއްދެވި، އެއްވެސް ކަމެއް ދިމައެއް ނުވިއެވެ. ވެގެންދިޔައީ ދައުލަތުންކުރި ބޭކާރުޚަރަދަކަށެވެ. ދިޔައީ ފުށްވަޅުންނެވެ. ފަނުފުލުންނެވެ. ފައިދާނެގީ އެކަމާއިސްވެ އުޅުނު، ނިއުމޯލްޑިވްސް އޭކިޔުނު ބައިގަނޑެކެވެ. ޚާއްސަކޮށް ޑޮކްޓަރ ޝަހީދާއި ޑޮކްޓަރ ހަސަން ސައީދެވެ. އަދި ޑޮކްޓަރ މުހަންމަދު ޖަމީލް އަހްމަދެވެ. ދުނިޔޭގެ ބައެއްބޮޑެތި ޔަހޫދީންގެ ގުޅުމާއެކު އޯޕަން ސޮސައިޓީއެއް އުފެއްދެވިއެވެ. އެމެރިކާގައި ވަރަށްބޮޑު ޔަހޫދީ މުއްސަންޖެއްގެ ބެލުމުގެ ދަށުގައި އޯޕަން ސޮސައިޓީއެއް އުފައްދާފައި އޮވެއެވެ. މުސްލިމް ގައުމުތަކުގައި އެތަންތާނގެ ރައްޔިތުން ދީނާދުރުކުރުމަށް، އެކިބާވަތުގެ އެހީތައްދީގެން މަސައްކަތްކޮށް، ހަރަކާތް ތެރިވަމުން ދެއެވެ. ފަހެ، ރައީސް މައުމޫނަށް ހުރިހާދިމާ އަކުންވެސް ލިބެމުން މިދަނީ، ލަނޑެވެ. ބައިނަލްއަގްވާމީ މުޖްތަމަޢަށް ބަދަލެއްގެ ގޮތުގައި ދަށްކާލުމަށް ޓަކައި، ނެރެ ކާރިކުރެއްވި ހުރިހާ ބޭފުޅުން ވެސް ދިނީކެއްސެވެ.
އާދެ! ދައުރު ވަމުންދާ ކޮންމެ ސައުވީސް ގަޑިއިރަކީ، ރާއްޖޭގެ ސިޔާސީ މަސްރަހަށް ވަރަށް ތަފާތުބޮޑެތި ބަދަލުތައް އަންނަމުންދާ މިނެޓްތަކެކެވެ. ހިނދުކޮޅު ތަކެކެވެ. ޚުދުމުޚްތާރު، ބަގުޑިބެއްދުމެއް ގައި ދެމިހުންނަ ވެރިޔަކީ، އޭނާގެފުރިހަމަ ބާރާއެކު އެކަމުގައި މޮޔަވެ، ވަޖިދުވާނެ މީހެކެވެ. ހިޔަންޏަށް މުޑިނަގާނެ މީހެކެވެ. އެއީ އެކަންއޮންނާނެ ގޮތެވެ. އަދި އެންމެފަހު ނޭވާޔާހަމައަށް ދާންދެން، ވެރިކަމުގައި ދެމިހުރުމަށް ހުރިހާ މަސައްކަތެއް ކުރާނެމީހެކެވެ. މިއީ ޝައްކެއްއޮތް ކަމެއްނޫނެވެ. ރައީސް މައުމޫނުގެ ހުރިހާ އަމަލުތަކަކުން ވެސް މިކަންސާބިތުވެ، ހެއްކާއެކު ފެންނަމުންދެއެވެ. ޢަރަބި ދުނިޔެއިން ރައީސް ޔާސިރު އަރަފާތަށް ބައްލަވާށެވެ. އިސްލާމީ ގައުމުތަކުން، މުޅި އުމުރަށް ވެރިކަން ނުދެންމުނަސް، ސުހާޓޯއާއި މަހާތީރުމެން ކުރެއްވި ހިތްވަރަށް ބައްލަވާށެވެ. އަދި ޕަރުވޭޒް މުޝައްރަފުމެން ކުރައްވަމުން އެގެންދަވާ ވަރުގަދަ ހިތްވަރަށް ބައްލަވާށެވެ. ހޫގޯޗާވޭޒާއި ފެޑަރަލް ކާސްޓްރޯގެ މަސައްކަތަށް ބައްލަވާށެވެ. މަޝްހޫރު މުގާބޭއަށް ބައްލަވާށެވެ. ދިރިދިރި ފެންނަން މިހުރި ފިލާވަޅުތަކަކީ، އެތެރެވަރީގެ މިކުޑަކުޑަ ދިވެހި ރާއްޖެއިންވެސް ފެންނަމުންދާ މަންޒަރު ތަކެވެ. ދިރާސާ ހައްދަވާށެވެ. ފަހެ، މިކަމަށް ސިޔާސީ ގޮތުން ފިކުރުހިންގަވާ ލައްވާށެވެ. އޭރުން އަޅުގަނޑު މިދަށްކާ ވާހަކަތައް، ވިސްނިވަޑައި ގަންނަވާނެއެވެ.
ފަހެ، ދަންނާށެވެ! ދިވެހި ރައްޔިތުންތިބީ، ރައީސް މައުމޫނުގެ ވެރިކަމާ ވަރަށްބޮޑަށް ނުރުހިފައެވެ. ނަފްރަތުކަން އުފެދިފައެވެ. އެންމެބޮޑު ސަބަބަކީ، ވެރިކަމުގައި މާގިނަދުވަސް ވުމެވެ. މީސްތަކުން ހިތުގެއަޑިން ނަފްރަތު ކުރާލެއް ކުޑައެއްނޫނެވެ. މަޑުންތިއްބަސް ވަރަށް ބޮޑެވެ. އެހެނަސް އެކަން އަމަލުން ފާޅުކުރުމުގެ ހިތްވަރު އަދި ނެތީއެވެ. މާއްދީގޮތުން ލިބެމުންދާ ފައިދާތަކެއްގެ ސަބަބުން ދެއަތަށް ކިރިލަކިރިލާ ތިބެން ޖެހިފައިވާ ބަޔަކު އެބަތިއްބެވެ. ދިރިހުރުމަށް، އާންމުދަނީ ލިބޭނޭއެހެން ގޮތްތަކެއް ފެނިފައި ނެތުމުން މަޖްބޫރުވާ ބަޔަކުވެސް އެބަ ތިއްބެވެ. ފަހެ، ރައްޔިތުންނަށް މިވީ ތިރީސް އަހަރުދުވަހު ދަސްކޮށްދީ، ކަށީގައި ހިއްޕުވާފައިވަނީ، ގަނޑުވަރާއި ބޮޑުންގެގާތަށް ހިނގާއި ސަލާންޖަހާށެވެ. އާދޭސް ދަންނަވާށެވެ. އަމިއްލަ ހައްގުތަކެއް ވާކަން، ދަސްކޮށްދީފައެއް ނެތެވެ. މިއީ މިސްރުން ރައީސް މައުމޫނު ދަސްކުރައްވާ ފައިވާ ފިރްޢައުނީ ދަރުސެކެވެ. ފިލާވަޅެކެވެ. ފަހެ، މިއީ ދުރާލައިގެން ވަރަށްކުރީއްސުރެ ވިސްނާއި ހޭއަރާތިބެގެން، ވެރިކަމުގެ ފަރާތުން ސިއްރުގޮތެއްގައި ރާވައިގެން ކޮށްފައިވާ ކަމެކެވެ. ޑޮކްޓަރ ޒާހިރު ހުސައިނާއި އަލްއުސްތާޒު ފަތްހުއްﷲ ޖަމީލުގެ އެހީތެރިކަމުގައި ކޮށްފައިވާ ބޮޑު ޖަރީމާއެކެވެ. ތިންލައްކައިގެ ރައްޔިތަކަށް ދައްކާފައިވާ ގިލަންހުރި އަހުވައެކެވެ. ސީދާ ބޮޑުވެގެންވާ އަނިޔާއެކެވެ. ބޮޑުވެގެންވާ ފާފައެކެވެ. މުޅިގައުމުގެ އިގްތިސާދު، ޚާއްސަކޮށް ރައީސް މައުމޫނު ދެއްވާފައިވާ ނަމުންނަމަ، ރަންބިސްއަޅާ ކުކުޅުގެ ފައިދާތައް އޭނާދޫކޮށް ލައްވާފައިވަނީ، މަދު ވިޔަފާރި ވެރީންތަކެއްގެ އަތްދަށަށެވެ. ފަހެ، އެމީހުންގެ އަތުން ވިޔަފާރީގެ ޓެކްސްއެއް ނެގުމަކީ، ސަރުކާރުދެމި އޮތުމުގައި ވަރަށްބޮޑެތި ގެއްލުންތައް ދަށްކާނެކަމެކެވެ. ސަރުކާރަށް ހުރަސްތަކެއް އެޅިދާނެ ކަމެކެވެ. ސީދާ ރައީސް މައުމޫނަށް ހުރަސްތަކެއް ކުރިމަތިވާނެ އަމަލެކެވެ. ފަހެ، މިއީ ރައްޔިތުން ޒާތަކަށް ޓެރަރައިޒްކޮށް ބިރުދެއްކުމެކެވެ. ރައްޔިތުނެގެ މައްޗަށް ޓެރަރިޒަމްގެ އަތެއް ހިއްލާލުމެވެ. ރާއްޖެ އެތެރެވާ ޓުއަރިސްޓުންގެ އަތުން، ގާނޫނީގޮތުން ސަރުކާރަށް ލިބެންޖެހޭ ބެޑްޓެކްސް، އެކިއެކި އުކުޅުތައް ބޭނުންކޮށްގެން ނުދަށްކާ މަދުކޮށްލައެވެ. ބެޑްޓެކުހާނުލާ، ގިނަބަޔަކު ރިޒޯޓްތަކުގައި އޮޅުވާލައިގެން ބައިތިއްބައެވެ. ސަފާރީޔޮޓް ތަކާއި ދޯނިފަހަރަށް އެތެރެވާ މީހުންގެ އަތުންލިބެންޖެހޭ ޓެކްސް އޮންނަނީ ސުމެއްގައެވެ. އެއްގޮތަކަށް ވެސް ނުނެގެއެވެ. ދައުލަތަށް އެފައިސާއެއް ނުވަދެއެވެ. ގެންޓްހައުސް ތަކުނާއި ސިޓީހޮޓާތަކުން ވަންނަންޖެހޭ ބެޑްޓެކްސް ވެސް ނުލިބެއެވެ. ސަރުކާރުން އެފަދަ ޓެކްސްތައް ނެގޭނެ ވަސީލަތްތައް ހަމަޖައްސާއި ގައިމު ނުކުރަނީ، އެތަންނާގެ ވެރިންނާއި އޯނަރުން ރުއްސާށެވެ. އެރުހުމުގެ އެހީގައި، ވެރިކަމުގައި ގިނަދުވަހު ދެމި ހުންނާށެވެ. ފަހެ ރައީސް މައުމޫނު ވަނީ، މިކަންތައް ބަލަހައްޓާއި މޮނިޓަރ ކުރެއްވުން ގަސްދުގައި ނުކުރައްވާ ފައެވެ. އަޅާނުލާ ދޫކޮށް ލައްވާފައެވެ.
އާދެ! ރަންބިސްއަޅާ ކުކުޅު ރާއްޖެއިން ފެނުނީ، 1972 ވަނަ އަހަރުގައެވެ. ކުރީގެ ރައީސް ނާސިރު އަރިހުގައި ގެންގުޅުއްވި، މާދޮން، ރީތިފިރިހެން ކުއްޖެއްގެ ސަބަބުން، ރައީސް މައުމޫނަށް ރާއްޖޭގެ ވެރިކަން، ނަސީބު ކުރެއްވުމާ ގުޅިގެން، ރާއްޖޭގެ ވިޔަފާރިވެރިން، ފަސާދަކޮށް އެވެރީން ރުއްސުވުމަށް، ދިވެހި ރައްޔިތުންގެ ރަންބިސް އަޅާކުކުޅު، ގާނޫނާއި ގަވާއިދުތަކަށް ބެއްލެވުމެއްނެތި ރައްޔިތުންނަށް އޮޅުވާ ލައްވައިގެން އަމިއްލަފުޅަށް ބޮޑެތިފައިދާ ނެގޭގޮތަށް ކަމާބެހޭ، ގާނޫނުތަކަށް ބޮޑެތި ބަދަލުތައް ގެނެސް، އިންވެސްޓްކުރާ މީހުންނަށް ރައްޔިތުންގެ އެންމެހައްގު މުދާތައް ކަމުގައިވާ، ފަޅުރަށްތައް ދިގުމުއްދަތަށް ހަދިޔާކޮށް ބަހާލަދެއްވީއެވެ. ފަހެ، މިއީ ވަރަށް ހިޔަޅު ވިސްނުމެކެވެ. އަދިވެސް އިތުރަށް، ރައީސް މައުމޫނު ގަސްދު ކުރައްވަނީ، 35 އަހަރަށްވުރެ ދިގުމުއްދަތަކަށް، އާދެ! 99 އަހަރަށް ރައްޔިތުންގެ ހައްގުމުދާތައް އެމީސްމީހުންނަށް ފައިދާވާގޮތަށް މިލްކުކޮށްދޭށެވެ. ފަޅުރަށްތަކާއި ފަޅުތަކާއި ގިރިތައް މިބީދައިން ބަހާލާށޭވެ. ކުރިމަގުގައި އަންނަންއޮތް ދިވެހި ޖީލަށް ބައްލަވާ ލެއްވުމެއް ނެތެވެ. ފަހެ، ދަންނާށެވެ! މިފަހަރު މިދަށްކާ ހުވަފެނަކީ، ދުނިޔޭގެ ބެސްޓް ޕްރެކްޓިސް އަކީ، މިގޮތަށް ކަންކުރުންކަން ދަށްކައިދީ ހާމަކޮށްދެނީއެވެ. ވިސްނައި ދެނީއެވެ. މިނަމުގައި ޓުއަރިޒަމްގެ ގާނޫނަށް ބަދަލުތައް ގެންނަވަނީއެވެ. ރައްޔިތުންގެ މަޖިލީހަށް އިސްލާހުތަކެއް ހުށަހަޅައި ގެންނެވެ.
އާދެ! ފަތުރުވެރިކަމުގެ ގާނޫނަށް މިގެންނަވާ އިސްލާހަކީ، ރައްޔިތުންގެ ތެރެއިން މަދުމީސްކޮޅަކަށް، އަދި ޚާއްސަކޮށް ވަކިބަޔަކަށް ރިޒޯޓްތައް ތާއަބަދަށް މިލްކުކޮށް ދިނުމަށް ކުރައްވާ މަސައްކަތެކެވެ. ރައްޔިތުންނަށް އޮޅުވާލައްވަވާއި އަނދުން އަޅުއްވަވަނީ، ދުނިޔޭގެ ބެސްޓް ޕްރެކްޓޮސްގެ ނަމުގައެވެ. ތަރައްގީވެ ކުރިއަރާފައިވާ ގައުމުތައް ހިނގާމަގުން ހިނގުމުގެ ނަމުގައެވެ. ފަހެ، މިކަހަލަ އެކި އޮޅުވާލުން ތަކުގެ ތެރެއިން ހާސިލް ކުރައްވަނީ ހަމައެއްކަމެކެވެ. ވެރިކަން ވަރުގަދަކޮށް މަހުޖަނުންގެ އެހީގައި ވެރިކަން ދެމެހެއްޓުމެވެ. ވެރިކަމުގައި އިތުރަށް ބަގުޑިބެއްދުމެވެ. ގުރުއަތުލުމޭ ކިޔަސް ދޫކުރެވޭ ރަށްތައް ފަހުވަގުތުގައި ގަނެލަނީ، މިދަންނަވާ މަދުމަހުޖަނުން ތަކެވެ. ފަތުރުވެރިކަމުގެ ހުރިހާ ވިޔަފާރިއެއް ޖަމާވަނީ، މަދުމީސް ކޮޅެއްގެ އާއިލާތަކަށް ބައިއެޅޭގޮތަށެވެ. މުޅިރައްޔަތް ޝާމިލްވާގޮތަށް، ބައިއެޅެމުންދާ އުސޫލަށް، މިފަދަ ވިޔަފާރިތައް ހަމަޖައްސައެއް ނުދެއެވެ. ފަހެ، މިއީ ކުރިއަރާފައިވާ ޒަމާނީ ހަމަތަކާ އެއްގޮތަށް، ރައްޔިތުން ފޭރުމެވެ. އަޅުވެތި ކުރުމެވެ. ފަހެ، ދަންނާށެވެ! އެންމެންގެ ބިންތައް މަދުބައެއްގެ އަތްދަށުލާއި ވެރިކޮށްލައިގެން ރައްޔިތުންގެ ލެއިފޮދު ރާއްޖޭންބޭރުގައި ހުންނަބޭންކުތަކަށް ޕަންޕުކޮށް ލަނީއެވެ. އެފްރިކާގެ ޒިންބާބުވޭގައި ދޮންމީހުން އެރަށަށް އަރައި، ހުރިހާބިންތަށް ވެރިކޮށްގެން އުޅޭއުޅުމާ، މިއުސޫލާ އެއްވެސް ތަފާތެއްނެތެވެ.
އާދެ! ވިޔަފާރި ވެރިންގެ މުގުލުގައި ހުންނެވި، ފަގީރުންގެ ބައްޕާފުޅުކަމަށް ދައުވާކުރައްވާ މަޝްހޫރު ފިޔަފާރި ވެރިޔާގެ ޚިޔާލަކީ، ކުރިމަގުގައި ރައީސް މައުމޫނު ހިމާޔަތްކޮށްދީ، ވެރިކަން އޭނާގެ އަތްދޮށަށް ފުރޮޅާލުމެވެ. އަދި މިހެން ނުވެއްޖެނަމަ، ދުވަސް ދުއްވާލާފައި ނަމަވެސް ދިވެހި ދައުލަތަށް ގަދަކަމުން ވެރިވެގަތުމެވެ. އޭނާ އިސްކޮށް ހުރެގެން، އޭނާގެ ރޭވުމުގެދަށުން، ވިޔަފާރިވެރިންގެ އެކިއެކިރޭވުންތައް ކުރިޔަށް ދާނެކަން ކަށަވަރެވެ. ސިޔާސީ ޕާޓީތަކަށް، ވަރުގަދަކޮށް އެބަނު ފޫޒު ހިންގައެވެ. އެމްޑީޕީއަށް ވަރަށްކުރީއްސުރެ ވަނީ އޭނާގެ ވައިރަސް ވައްދާފައެވެ. ޖަރާސީމުތައް ފޮނުވާފައެވެ. އައިޑީޕީވަނީ، ފާޑަކަށް ގަނެލައި ކޮންޓްރޯލްކޮށް ފައެވެ. އަދި އިތުރުޕާޓީއެއް އަމިއްލައަށް، އެފެއްދުމުގެ ބިރުވެސް ދައްކައެވެ. ސިޔާސީޕާޓީއެއް ކޮޅަށް ޖެހުމަކީ، ރައްޔިތުންނަށް މެޓާކޮޅެއް ބަހާލުންހާ ފަސޭހަކަމެއް ކަމުގައި، އެކުވެރިން ލައްވާ ހާމަކޮށް ރައްޔިތުންނަށް މިފަދަ މަލާމާތްތައް ރައްދުކުރެއެވެ. މާރުކޭޓުގައި މުދަލުގެ އަގު މަތިކުރުމަކީ ވެސް އެފަދަ ވިޔަފާރިވެރީންގެ ރޭވުމެއްގެ ދަށުން މަޝްވަރާކުރެވިގެން، ޕްލޫންކުރެވިގެން ކުރެވޭކަންކަމެވެ. ފަހެ، މިއީ ރައްޔިތުން ވިސްނާން ވެއްޖެ ކަމެކެވެ. ސަރުކާރު ނިކަމެތިކޮށްލާއި އިނދަ ޖައްސާލުމަށް ފަހު، އެމީހުންގެ ވިޔަފާރީގެރޯލް މުޅިގައުމުގައި އިސްކުރަނީއެވެ. ހުރިހާ ދިމާލަކުން ބިންތައް ނަގައިފިއެވެ. ވެރިކޮށް ލައިފިއެވެ. ސ.ގަމާއި ސ.ހިތަދޫންނެވެ. ލ.ގަމުންނެވެ. ހދ. ހަނިމާދޫންނެވެ. ހުޅުމާލޭންނެވެ. ތިލަފުށިންނެވެ. އަދިވެސް އެތައް ފަޅުރަށްތަކެއް ވަނީ، ވިޔަފާރި ވެރިންގެ މަދުބައެއްގެ އަތްމަތީގައެވެ. މަގްސަދަކީ، ކޮންމެގޮތެއް ހަދާފައި ނަމަވެސް ރާއްޖޭގެ ވެރިކަން ކޮންޓްރޯލްކޮށް ދަމައިގަތުމެވެ. ނުވަތަ ވެރިކަން އަތްދަށުލުމެވެ. ވެރިޔަކަށް ހުންނަމީހާ ދަށުލާފައި ބެހެއްޓުމެވެ. މަހުޖަނެއްގެ މިރޭވުންގަނޑަކީ، ރައީސް މައުމޫނު ވަރަށް ރަނގަޅަށް ދިރާސާކޮށް ދުވަހުންދުވަހަށް މުރާޖަޢާކުރައްވަން ހުރި، ވަރަށް ބޭނުންތެރި ކަންތަކެވެ. ފަރުވާކުޑަކޮށް ގެންނުވާނެ ކަންތަކެވެ. ފަހެ، މިއީ ރައީސް މައުމޫނު ވިސްނަވަން އޮތް، ސިޔާސީ ފަޅިއެއްކަން ކަށަވަރެވެ. ސިޔާސީގޮތުން މިކަންކަނަށް ނުވިސްނަވައި ފަރުވާކުޑަ ކޮށް، ފަހަތަށް ޖެހިވަޑައި ގެންފިނަމަ ގެއްލުން ދަށްކާނެކަން ކަށަވަރެވެ.
އާދެ! ދެންއޮތީ، ރައްޔިތުން ވިސްނަންއޮތް ސިޔާސީފަޅިއެވެ. ސިޔާސީގޮތުން ރައީސް މައުމޫން، އަޅުއްވަމުން މިގެންދަވާ ފިޔަވަޅުތައް ވަރަށް ރަނގަޅަށް ދިރާސާކުރަން އެބަޖެހެއެވެ. ސިޔާސީގޮތުން ހުރިހާކަންކަނަކަށް ވިސްނަން ޖެހޭނެއެވެ. ސިޔާސީގޮތުން މިފަދަނާޒުކު ދަނޑިވަޅެއްގައި، ރައްޔިތުންގެ މަޖިލީހަށާއި ރައްޔިތުންގެ ޚާއްސަ މަޖިލިސް ކަމުގައިވާ ބޮޑުމަޖިލީހުގެ އޭނާގެ ގޮނޑިތަކަށް ގެންނަވާ ބަދަލުތަކަކީ، ސިޔާސީ މުފައްކިރުން، ވިސްނަންޖެހޭ ވަރަށް މުހިންމު ކަމެކެވެ. މިއިންކޮންމެ ފިޔަވަޅެއްގެ ހަފަރާތަށް ރަނގަޅަށް ބަލަންޖެހޭނެއެވެ. ފިކުރު ކުރަންޖެހޭނެއެވެ. ވިސްނުން މަޖްބޫރެވެ. އަދި ފެންނަމުންމިދާ ނަތީޖާއަކީ، އުމުރަށް ވެރިކަމުގައި ބަގުޑިބެއްދުމުގެ އަލާމާތްތަކެވެ. އެންމެފަހު، ނޭވާއަށް ދާންދެނެވެ. ސިޔާސީގޮތުން ތަސައްރަފްފުދޭ، ހަރު ރަނގަޅު މީހުންނަށް ރައީސުލް ޖުމްހޫރިއްޔާގެ ގޮނޑިތަކެއް، މިހާރަކުނުދެއެވެ. ބޭނުންފުޅިއްޔާ ރަނގަޅު އެކަށީގެންވާ ޢިލްމީ އަދި ގާބިލް ބޭފުޅުން ވާނެކަން ކަށަވަރެވެ. ގައުމުގެ މުސްތަގްބަލަށް މާބޮޑު އަޅާލެއްވުމެއް ނުބަހައްޓަވައި ބުނިހާގޮތެއް މަޖިލީހުގައި ހަދާލަންކެރޭ ފާޑުގެ ޖަޒްބާތީ ޒުވާނުން، އޭނާގެ ގޮނޑިތަކަށް ގެންނަނީ މިބޭނުމުގައެވެ. އެންމެފަހުން ބޮޑުމަޖިލީހަށް މިގެންނެވި ބަދަލަށް ބައްލަވާށެވެ. ދިވެހި ޖުމްހޫރިއްޔާގެ ގާނޫނު އަސާސީއާ ޚިލާފަށް އެއްވެސް އިންތިޚާބަކާނުލައި ވެރިކަން ކުރާޕާޓީއަށް ގަދަބާރުން ވެގަނެގެން އުޅޭ، ޑީއާރުޕީގެ ޒުވާނުން ގޮފީގެ ނައިބުރައީސް އަލްފާޟިލް އަހްމަދު މަޚްލޫފް، (27 އަހަރު) އަކީ، މިކަމުގެ ފުރިހަމަ މިސާލެކެވެ. ސަރުކާރު ހިންގުމުގައި، 30 އަހަރުގެ ތަޖްރިބާކާރު ބޭފުޅަކު، ގާނޫނުއަސާސީ ހަދާ މަޖިލީހަށް އެންމެ 27 އަހަރުގެ ޅަދުޅައިގެ، ހަޅޭލަވަންކެރޭ ޖެހިލުމެއްނެތި ހިތަށްއަރާހާއެއްޗެއް ޖަޒްބާތާއެކު ބުނެލަންކެރޭ، ޒުވާންކުއްޖަކު ހަމަޖައްސަވާނީ، ކޮންމެވެސް އަމިއްލަފުޅު އެދުމެއްގައިކަން ކަށަވަރެވެ.
އާދެ! މަޚްލޫފަކީ، އޭނާއަށް މިމަގާމު ދިނުމުގެ ތިންދުވަސް ކުރިން، ކަލާފާނު ސްކޫލްގައި އޮތް، ރާއްޖޭގެ ވެރިކަމަށް އެއްވެސް އިންތިޚާބަކާނުލާ ވެރިވެގަނެގެން އުޅޭ، ޑީއާރުޕީގެ 27 ވަނަ އާންމުޖަލްސާގައި، މިއަހަރު ޖެހުއަރީމަހު، 8 ވަނަ ދުވަހު، ހއ.ހޯރަފުށީގައި ރައީސް މައުމޫނު ޝަހީދުކޮށްލުމަށް ދެވުނު ހަމަލާއަކީ، އިދިކޮޅުޕާޓީ އެމްޑީޕީން، އިސްވެރާވައިގެން ދިން ހަމަލާއެއްކަމުގައި ބުނެ، އިއުލާނުކުރި ޒުވާނާއެވެ. އެހިނދު، ކުރިމަތީގައި އަތްތިލަބަޑި ޖަހަންތިއްބެވީ، ރައީސް މައުމޫނާއި އޭނާގެޕާޓީ، ޑީއާރުޕީގެ އެންމެ އިސް މެންބަރުން ނެވެ. ޒުވާންޖަޒްބާތީ ޚިޔާލުތަކެއްގެ، ސިޔާސީގޮތުން ތަސައްރަފް ނުފުދޭ ހަގުކުދިން ގާނޫނު އަސާސީހަދާ މަޖިލީހަށް ވެއްދުމަކީ، ފަހުޒަމާނުގެ އަލާމާތްތަކުގެ ތެރެއިން ފާޅުކަންބޮޑު އަލާމާތަކަށްނޫނީ، ނެވެއެއްނުދާނެ އެވެ. ފަހެ، މިއީ ބޮޑުމަޖިލީހުން ރައްޔިތުނެގެ ބާރު، ކަނޑުވާލުމަށް ގަސްދުގައި ރައީސް މައުމޫނު އެޅުއްވި ވަރުގަދަ ފިޔަވަޅެއްކަން ޔަގީނެވެ. މިފަދަ އަމަލުތަކުން ފާޅުވެ އިނގޭއެއްޗަކީ، އަދިވެސް އާރާއިބާރުއޮތީ ރައީސް މައުމޫނު އަތްޕުޅުގައި ކަމެވެ. ރައްޔިތުންނަށް ދަށްކަވަން ބޭނުންފުޅުވަނީ ވެސްއެކަމެވެ. އެމަންޒަރުތަކެވެ. ފަހެ، ހިތްޕުޅަށް އަރާގޮތަށް އެބާރުގެ ބޭނުން ހިއްޕަވަމުން ގެންދަވާކަމެވެ. އިދިކޮޅުޕާޓީ އެމްޑީޕީގެ އިސްގޮނޑީގެ ވެރިޔާވަނީ އޭނާގެ މުށުތެރޭގައި ގަދަބާރުން ފިއްތާލާފައެވެ. ޗަރުކޭސް ކުޅުވަން މަގުމައްޗަށް ދޫކޮށްފައި އަދި ބަހައްޓަނީއެވެ. ބޭނުންވެއްޖެ ނަމަ، މުގާބޭ ޒުންބާބުވޭގެ ރައްޔިތުންނަށް ހަދާލާހެން ހަދާލުމަށް ހިތުގައި އޮންނާނެއެވެ. އޭ! ﷲ އެވެ! އަޅަމެންނަށް މިނޫންދުވަހެއް އަވަހަށް ދަށްކަވާށިއެވެ! އާމީން!