އިލްޔާސް ހުސައިން އިބްރާހީމް. (ލިޔުނީ : 2008 މާޗް ގައި)
ފަހެ ދަންނާށެވެ! ދިވެހި ރާއްޖޭގެ ސިޔާސީ މުފައްކިރުންގެ ވިސްނުން މިދުވަސްވަރުގައި ހުއްޓިފައިވަނީ، އެއް އަމާޒަކަށެވެ. އެއް ޓާގެޓަކަށެވެ. ގާނޫނު އަސާސީގައި ލިޔުމަށް ނިންމާފައިވާ އިންތިގާލީ މަރްހަލާ، ނުވަތަ “އިންތިގާލީ ބާބު” އަސާސީގައި ލިޔެވިގެންދާނެ ގޮތަކާމެދުގައެވެ. 2008 ފެބްރުއަރީ 14 ވި ބުރާސްފަތި ދުވަހުއޮތް ބޮޑުމަޖިލީހުގެ 253 ވަނަ ޖަލްސާގައި ނެގުނު ވޯޓަކީ، ރާއްޖޭގެ ސިޔާސީ މަސްރަހަށް ވިސްނާކޮންމެ ދިވެހި ދަރިއަކު މުތޯލިއާކުރުން ލާޒިމުނަތީޖާ އެކެވެ. ދުވަހު ނޫސްތަކުން، ޚާއްސަކޮށް މިނިވަން ނޫހުން މިމައުލޫމާތުތައް ފުރިހަމަކޮށް ލިބޭނެކަމުގެ އުންމީދު ކުރަމެވެ. ހަމައިން ނެއްޓޭފަހަރު އަޔަސް، ގިނަފަހަރު އެނޫހަކީ، ރަނގަޅު އެއްޗެކެވެ. ގާނޫނު އަސާސީގެ “ރައީސުލް ޖުމްހޫރިއްޔާގެ ބާބު” ގެ 10 ވަނަ މާއްދާގެ (ދ) ބޭރުގައުމު ތަކަށާއި ބައިނަލް އަގްވާމީ ޖަމާއަތްތަކަށް، ސަފީރުން އައްޔަންކުރުމުގެ ބާރު، ރައީސުލް ޖުމްހޫރިއްޔާއަށް ޚާއްސަކޮށްފައި ބޭއްވުމުގެ މަގްސަދުގައި އެމާއްދާ ޑްރާފްޓް ކުރެވިފައި އޮތްގޮތްވަނީ ފެއިލްކޮށް ލާފައެވެ. މިއީ މިހާރުމިއޮތް ސަރުކާރު ރައީސް މައުމޫނުގެ އުމުރަށް ދެމެހެއްޓުމަށް ބޮޑުމަޖިލީހުގައި ސިޔާސީ އޮއިވަރު އޮތްގޮތެވެ. މިއަހަރުގެ ފަހުކޮޅުގައި އޮންނަރިޔާސީ އިންތިޚާބުގައި ބަދަލެއް ނާންނާނެކަމުގެ ޔަގީންކަން އެބޭފުޅުންގެ ހިތްތަކުގައި ވަޅުޖަހާފައި އޮތްވަރު މިއިނގެނީއެވެ. ބޭރުގައުމުތަކަށް ސަފީރުން އައްޔަން ކުރުމަކީ، ވަރަށް ބޮޑުގައުމީ މައްސަލައެކެވެ. މުޅި ރައްޔިތުންނާގުޅި، ލާމެހިފައިވާ، ރައްޔިތުންގެ މަސްލަހަތާ ސީދާކޮށް ގުޅިފައި އޮންނަ، ޢަމުދުން ދައުލަތަށް ޚާއްސަ ކުރެވިފައި އޮންނަން ޖެހޭނެ ވަރަށް މުހިންމު ކަމެކެވެ. ހަމައެކަނި ސަރުކާރާހަމައިން، ހުއްދަދެވޭ ވަރަށްވުރެ މާފުޅާކޮށް އޮންނަންޖެހޭ ކަމެކެވެ. މުޅި ރައްޔިތުންގެ މަސްލަހަތާގުޅި، ދައުލަތުގެ ފެންވަރުގައި އޮތްކަމެއްގައި ހަހައެކަނި ރައީސުލް ޖުމްހޫރިއްޔާއަށް ފެނިވަޑައި ގަންނަވާ މީހަކު އެކިގައުމުތަކަށް ފޮނުވުމުގެބާރު އެމަނިކުފާނަށް ދޫކޮށްލުމުން ވާނެގޮތަކީ، ތިމާގެމީހުންނާއި ދަންނަގާތް މީހުންނާއި ކުޑައިރާއި ޒުވާންދުވަސްވަރު އެކުގައި ހޮސްޓަލް ތަކުގައި މަޖާކޮށް، ކިޔަވަންއުޅުނު ރަހްމަތް ތެރިންނަށް، މިފަދަ މަގާމުތައް ދިނުމުގެދޮރު ހުޅުވާލެވުނީއެވެ. ފަހެ، މިއީ ރައްޔިތުންގެ މަސްލަހަތު ހިމެނޭ، އަދި ދައުލަތާ ގުޅުފައިވާ ކަމަކަށްވާތީ، މިކަންތައް އަސާސީގައި ލިޔެވި، ހަމަޖެހިގެންދާން ޖެހޭނީ، ރައްޔިތުންގެ މަންދޫބުންގެ މަޝްވަރާއާއެކު، ގަދަޔަށް ޒުވާބުދިނުމަށް ފަހު، ފާސްކޮށް ހަމަޖައްސަވާ ގޮތަށެވެ. ރައްޔިތުންގެ މަޖިލީހުގެ މަޝްވަރާ މިކަމުގައި އޮންނަންޖެހޭ ގޮތަށެވެ. އެހެންނޫނީ ވެގެންދާނެގޮތް ބޭރުގައިހުރި ރާއްޖޭގެ ސަފާރާތަކުން މިހާރުވެސް އެހެރީ ފެންނާށެވެ. ގިނަވާނީ ކޮންމެވެސް ގޮތަކުން މިހާރުގެ ޚާރިޖީވަޒީރު، ޑޮކްޓަރ އަހްމަދު ޝަހީދާ ގުޅިފައިވާ ބޭފުޅުން، އެކިފެންވަރުގެ މަގާމުތަކުގައި ތިއްބަވާތަނެވެ.
ފަހެ، ދަންނާށެވެ! ބޮޑުމަޖިލީހުގެ 253 ވަނަ ޖަލްސާގައި، މިމާއްދާ ޑީއާރުޕީން، ތިންވަނަބުރަށް ފެއިލްކޮށް ލުމަށްފަހު، ރައްޔިތުންނަށް އެދަށްކައިދިނީ، އިންތިގާލީބާބަށް، އަދި ގާނޫނު އަސާސީގެބައެއް ބަސްތައްމާނަ ކުރުމުގެ ބާބަށް ވެސް ހަދާލާނީ، ހަމަމިގޮތް ކަމުގައެވެ. ފަހެ، މިކަންތައް މިހެންއޮތްއިރު، ފަރުދާގެ އަނެއް ފަރާތުގައި ރައްޔިތުން އެދި އަޑުއުފުލާއި ގޮވަމުންގެންދާ އިސްލާހީ ހަރަކާތާ ދެކޮޅަށް، ހިންގަމުން ގެންދާ އުދުވާނުތަކަށް ފިކުރު ހިންގާލުން މުހިންމެވެ. ލާޒިމުކަމެކެވެ. މެންބަރުންގެ ފިކުރާއި ޒަމީރައި ކުޅެލުމުގެ ބޭނުމުގައި ހިންގަމުންގެންދާ ކަންތައްތައް ކަމުގައިވާ، މަގާމުތައް މަތިކުރުމާއި މުސާރަތައް ބޮޑުކުރުމާއި ނަގުދު ފައިސާގެ އެހީތައްދީ، ލޯނުތައްދަނީ ދެމުންނެވެ. ވަކިބަޔަކަށް ބަހަމުންނެވެ. ބޮޑުމަޖިލީހުން މިފެންނަނީ، އެކުލަވަރުގެ އަލާމާތްތަކެވެ. މިއީސީދާ ދިވެހި ރައްޔިތުންގެ ވިންދައި ކުޅެލުމެވެ. އަދި އިދިކޮޅު ހަރަކާތް ފިނިކުރުމަށް ގަދައަޅާ ކުރަމުން ގެންދާ މަސައްކަތެވެ.
ފަހެ، ރައްޔިތުންނާ ދެކޮޅު މިފަދަ އުދުވާންތައް، ބާރުސްޕީޑްގައި ރޭވެމުން ތަންފީޒުވަމުން ކުރިޔަށް ދާއިރު، ސިޔާސީ އާއުދަރެހަށް، މަތިކޮށްފައިވާ އެންމެބޮޑު ވިލާގަނޑަކީ، ވަރަށްފުންކޮށް ވިސްނައި އެކިގޮތްގޮތަށް ސިޔާސީ މުފައްކިރުން ފިކުރު ހިންގަންޖެހޭ، ވައިބާރުކޮޅި ގަނޑެކެވެ. އެވިލާގަނޑަކީ، ވަރަށް އަވަހަށް މިއަންނަ އެޕްރީލް ހިސާބުގައި ބޭއްވުމަށް ރާވަމުންގެންދާ ޑީއާރުޕީގެ އެންމެ ބޮޑުބައްދަލު ވުމެވެ. އާންމު އެއްވުމެވެ. އެޕާޓީގެބޮޑެތި ނިންމުންތައް ނިންމާ ކޮންގްރެސެވެ. ރައީސް މައުމޫނު އަރިހުގައި ރަނިންގްމޭޓެއްގެ ގޮތުގައި ހުރިހާ ހިނދެއްގައި ދުވާނެބޭފުޅަކު ހަމަޖެއްސުމެވެ.
ފަހެ ދަންނާށެވެ! ވިސްނުމަށްއޮތް މުހިންމު ސިޔާސީ ޕޮއިންޓަކީ މިއެވެ. އަޅުގަނޑުގެ ވިސްނުމަށް މިއަދާހަމައަށް ވިސްނެނީ، މިކަންނިމިގެން ދާނީ، އާކުޅިއެއް ދުނިޔެއަށް އުފަންކޮށްފަ ކަމެވެ. ރައީސް މައުމޫނު ނަގާކޮނޑަށްލާއި ސަވާރު ކޮށްގެން ދުވާނެބޭފުޅަކަށް، ޑީއާރުޕީން ނިންމަވާނީ، އެޕާޓީގެ އެއްނައިބު ޒަޢީމު ކަމުގައިވާ މަހާސައުދާގަރު އޮނަރަބްލް ގާސިމް އިބްރާހީމެވެ. ދެންތިއްބެވި އަނެއްދެ ނައިބުޒަޢީމުން، ޑީއާރުޕީގެ އިއްޒަތްތެރި އާންމު މެންބަރުން، މިނިންމެވި ކަރާމާތްތެރި ނިންމެވުމަށް ހިތުގެއަޑިން ތާއީދުކޮށް، މިދެބޭފުޅުންގެ ޒަޢާމަތުގެދަށަށް ޖެހިލައި އިތުރު ހިތްވަރަކާއެކު ފަށައިގަންނާނީއެވެ. އަޅުގަނޑުގެ މިވިސްނުމާ އެއްގޮތަށް މިކަންހިނގައި ފިނަމަ، ފަހަރުގައި އޮނަރަބްލް ތަސްމީނު އަލީގެ ދެވަނަ އިސްތިއުފާ ސިޓީއެއް، ރައީސް މައުމޫނަށް އަނެއްކާވެސް ލިބުމަކީ، ވަރަށްގާތް ކަމެކެވެ. ފަހެ، އޮނަރަބްލް އަހްމަދު ޝިޔާމް މުހަންމަދާއި ތަސްމީނު ތަފާތުވާނެ ތަންކޮޅަކީ މިއެވެ. ދެން ޑީއާރުޕީގެ މިހަރަކާތްތެރި ނިންމުމަށް މަރުހަބާކިޔާ، ޑީއާރުޕީއާ ގުޅޭނެ އިތުރުދެތިން ސިޔާސީޕާޓީއެއް ފެނިގެން ދާނެއެވެ. އޮނަރަބްލް ޔާމީން އަބްދުލް ގައްޔޫމުގެ ޕީއޭ ހަމަގައިމުވެސް ޑީއާރުޕީއާ ގުޅޭނެއެވެ. އަދި ރެޑްވޭވް އަހްމަދު ސަލީމްގެ ޒަޢާމަތުގެ ދަށުގައި ވުޖޫދަށް ގެނައުމަށް މަސައްކަތް ކުރަމުން ގެންދަވާ، ސިޔާސީ ޕާޓީއެއް ކަމުގައިވާ، ދިވެހިރާއްޖެއިން ފަގީރުކަން ނައްތާލުމަށް މަސައްކަތްކުރާ ޕާޓީ އަކީ، ޑީއާރުޕީއާ ސީދާކޮށް ގުޅޭނެ ޕާޓީއެކެވެ. މޮނާޒާ މުހަންމަދު ނައީމްގެ މޯލްޑިވިއަން ނެޝަނަލް ކޮންގްރެސް ޕާޓީއާއި ބޯގަންވިލާ އިބްރާހީމް އިސްމާޢީލް އިބުރާގެ ލިބަރަލް ގްރޫޕުން، ހައްދަވާނެ ގޮތެއް ނޭނގެއެވެ. ފާޅުގައިގޮސް ޑީއާރުޕީއާ ނުގުޅޭނެކަން ސާފުކޮށް އެނގެއެވެ. ރައީސް މައުމޫނު ނިންމަވާ ނިންމެވުމުން ތަސްމީން ފެއިލްވާގޮތް ވެއްޖެނަމަ، ޑީއާރުޕީގައި ހުންނެވުމަކީ ދުރުކަމެކެވެ. ސިޔާސީވަކި ޕާޓީއަކާ ދިމާއަށްވަޑައި ނުގަނެ ކުރިޔަށްއޮތް ތަނުގައި ރައްޔިތުންގެ މަޖިލިސްތެރޭގައި ބާރުހިންގެވޭނެ ގޮތެއްވޭތޯ، މަސައްކަތްތަކެއް ކުރައްވާނެކަމަށް ލަފާކުރެވެއެވެ. ތަސްމީނަކީ ރައްޔިތުންގެ މަޖިލީސްތެރެ ރަނގަޅަށް ދެނެވަޑައި ގަންނަވާ އެމަޖިލީހުގެ ނައިބުކަން ކުރައްވާފައި ހުންނެވި ތަޖްރިބާކާރު ބޭފުޅެކެވެ. އަދި ރައީސް މައުމޫނު ނިންމަވާގޮތަކުން، ގާސިމް ފެއިލް ވެއްޖެނަމަ، ސިޔާސީވަކި ޕާޓީއަކާ ދިމާލަށް ޖެހިދާނެކަމުގެ ކުލަވަރުތައް މިހާރުވެސްވަނީ ހިސާބަކަށް ފެނިފައެވެ. އާދެ! މިއީ އަޅުގަނޑުގެ އަމިއްލަ ސިޔާސީ ވިސްނުމަށް ދިރާސާ ކުރެވޭގޮތެވެ. އެހެނަސް މިކަންތައް ނިންމެވުންއޮތީ، ރައީސް މައުމޫނުގެ ވިސްނުންފުޅުގައި އެކަންޏެވެ. ފަހެ ރައީސް މައުމޫނުގެ ރަނިންގްމޭޓަކަށް ނަންގަވާނެ ސިޔާސީ ޝަޚްޞިއްޔަތެއް ނިންމަވާނީ އެމަނިކުފާނު އަމިއްލަ ފުޅަށެވެ. ދެވަނަ މީހެއްނޫނެވެ. އަޅުގަނޑު މެންނަށް ސިޔާސީ މަސްރަހުން ދިރާސާކޮށް ދެންނެވޭނީ ލަފާކުރެވޭ ގޮތްތަކެކެވެ. ހީވާއެއްޗެކެވެ. އަޅުގަނޑުގެ ދިރާސާއިން ދަންނަވާލަންއޮތީ އޮނަރަބްލް ގާސިމުނޫން ބޭފުޅެއް ރައީސް މައުމޫނު މިފަހަރު ނަންގަވައި ފިނަމަ، އުމުރަށް ވެރިކަމާދުރަށް ޖެހިވަޑައިގެން ބޮޑުފެއިލްވުމަކުން ފެއިލް ވުމަކީ ހަމަވަރަށް ގާތްކަމެކެވެ. ފަހެ، ގާސިމް ރައީސް މައުމޫނާ ދެކޮޅަށް، އިދިކޮޅުޕާޓީތަކާއެކު ނިކުންނަވައި ފިއްޔާ އިދިކޮޅު ހަރަކާތަށް ކާމިޔާބުލިބޭލެއް މާބޮޑުވާނެއެވެ. ތަސްމީނު ރައީސް މައުމޫނާ ދެކޮޅު ހެއްދެވުމަކުން އިދިކޮޅު ޕާޓީތަކަކަށް ކުރާނެފައިދާއެއް ނޯންނާނެއެވެ. އިދިކޮޅު ޕާޓީތަކަށް މޮޅުއިތުރުވާނީ ރައީސް މައުމޫނު، ތަސްމީނު ނަންގަވާފައި، ރައީސް މައުމޫނާ އިދިކޮޅަށް ގާސިމު ނިކުންނަވައި ގެންނެވެ. އަޅުގަނޑު ރައީސް މައުމޫނަށް ދަންނަވާލަން އޮތީ، ކުރީފަހަރު ތަކެކޭއެއް ގޮތަށް، މިފަހަރު ވެސް ކާމިޔާބު ކުރެއްވުމާގާތީ، ގާސިމުގެ ކޮނޑަށް އަރުއްވައިގެން އެނާގެ ހަމްދަރިދީއާއި ރުހުމާއެކު ނުކުންނަވައި ގެންނެވެ. ތަސްމީނު އަތްފުޅުގައި ފެންނަގޮތަށް ނަގުދުފައިސާ ހުއްޓަސް، ރައްޔިތުންގެ ކުލުނާއި ހަމްދަރުދީ އަދިވެސް ގާސިމުގެ އަތުގައި އޮތްލެއް ބޮޑުކަމުގެ ވާހަކައެވެ. އާދެ! ގާސިމު ކިންގްމޭކަރަކަށް ހުންނަވައިފި ނަމަ، އަދިވެސް ރައްޔިތުންގެ ފުލްސަޕޯޓް ހޯދިދާނެއެވެ. އޭނާމަސައްކަތް ކޮށްދޭލީޑަރަކު ކާމިޔާބުވާނެއެވެ. ފަހެ، އޭނާފެއިލްވާނީ، އަމިއްލައަށް ރަސްގެފާނަށް ވާންއުޅޭ ހިސާބުންނެވެ. ދިވެހި ގައުމުގެ ރައީސުލް ޖުމްހޫރިއްޔާއަށް ވުމަށް، ގާސިމް މަސައްކަތް ކުރެއްވުމަކީ ގިނަބަޔަކު ރުހޭކަމެއް ނޫނެވެ.
ފަހެ، ދަންނާށެވެ! ދިވެހި ރައްޔިތުން މިއަދުހަދާން ކުރަންއޮތް މުހިންމު ފިލާވަޅަކީ، ރައީސް މައުމޫނަށް، މިގޮތަށް ދިމާވާކޮންމެ އެކަހެރިވެގެންދާ ދަނޑިވަޅެއްގައި ރައީސް މައުމޫނު އަރުއްވައި ވަޑައިގެން ނެވުމަށް ކޮނޑުފުޅު ދިއްކޮށް ލައްވަވަނީ ބުރުމާ ގާސިމެވެ. ރައީސް މައުމޫނަށް މަދަދުދީ، ވާގިވެރި ވުމަށްޓަކައެވެ. މިފަހަރު އަދިފެނިގެން މިދަނީ، މާކާރިކޮށެވެ. ޚަޒާނާގެ ވެރިކަމާއި ދިވެހިނޫޓުގައި ސޮއިއަޅާ ލެއްވުމުގެ ޗާންސުވެސް ވަނީ، ދެއްވާފައެވެ. ޔާމީނުގެ ސިޔާސީ ބޮޑާހޭކުމަށް ރައީސް މައުމޫނު ބައްލަވާތަނެއް އަދިއެއް ނުފެނެއެވެ. ފަހެ މިކަމަކީ، ގާސިމުގެ ނުރުހުމުގައި ވިޔަސް، އަދި ރުހުމުގައި ވިޔަސް ވެގެންހިނގައި ދާނެގޮތެކެވެ. މިފަހަރު ރައީސް މައުމޫނަށް ރަނގަޅު ޑިސީޝަނެއް ނުނެންގެ ވިއްޖެނަމަ، މުޑުދާރު ގޮތަކަށް ފެއިލްވުން ކާރިއެވެ. ގާސިމަށް ވުރެގިނައިން، ތަސްމީނު އަތުގައި ކެންޕޭނަށް ތަޅާލާނެ ނަގުދުފައިސާ މިވަގުތު ދައްކަލަން ހުރެދާނެއެވެ. ފަހެ، މިކަމަކީ ރައްޔިތުން ގަބޫލުކުރާނެ ކަމެއްނޫނެވެ. ގާސިމު އަތުގައި ގަނޑުކޮށް ދައްކާލާނެ ފައިސާތަކެއް ފެންނަން ނެތަސް، ރައްޔިތުންގެ ކުލުނާއި ހަމްދަރުދީ އޮންނާނެކަން ކަށަވަރެވެ. ދިވެހި ތާރީޚް މިކަންއެބަހެކި ދެއެވެ. ބެޓަރ ޑިމޮކްރަސީގެ ނަމުން މަޝްހޫރުވި، ފަހަރަށް ނަޒަރުކޮށް ލައްވާށެވެ. އަދި އޮނަރަބްލް އިލްޔާސް އިބްރާހީމަށް، 18 ވޯޓު ލިބިލެއްވި ބުރުގައި ޚަތިމުމަތީގައި ކަނާއަތްތިލަ ޖައްސުވައި ﷲ ގަންދީ ހުވާކުރުވާއި ފައިސާބަހައި ގެން، ރައީސް މައުމޫނަށް މަދަދުދީ، ވާގިވެރިވެފައި ވަނީ ވެސް ހަމަ، ބުރުމާ ގާސިމެވެ. އާދެ! އެދުވަސްވަރު ރައްޔިތުންގެ މަޖިލީހުގެ އިއްޒަތްތެރި މެންބަރެއްގެ މައްސަލަ، ސިފައިންގެ އޮފިސަރެއް ކަމުގައިވާ ލޭޑީ އިބްރާހީމް މަނިކު ލައްވާ، ސިފައިންގެއިން ބައްލުވަން ހަމަޖައްސައި އޮނަރަބްލް އައްބާސް އިބްރާހީމްގެ ވޯޓާއި އަދިވެސް ދެތިން ހަތަރު މެންބަރުންގެ ވޯޓުނުލެވޭ ގޮތަށް ހަމަޖައްސައި ކަޓުވާލީ، ކޮންފަދަ އަނިޔާވެރި އުކުޅަކުން ތޯއެވެ؟ މިހުރީ ރައީސް މައުމޫނު ކުޅުއްވާފައި ހުރި ނުލަފާސިޔާސީ ކުޅިވަރުތަކެވެ. އަބަދުވެސް ފަސްޓްލޭޑީ މެޑަމް ނަސްރީނާ އިބްރާހީމަށް މަޖުބޫރު ކުރުވައިގެން ގާސިމު ލައްވާ އެންމެފަހު ވަގުތު، ސިޔާސީކުޅި ގަނޑެއް ކުޅުވާނެއެވެ. މިފަހަރު ގާސިމު ކުޅުއްވަން އޮތް ސިޔާސީ ކުޅިގަނޑަކީ، ރައީސް މައުމޫނު ނަގާއަމިއްލަފުޅު ކޮނޑަށް ލައްވައިގެން ނުކުންނަވައި، އެންމެފުރިހަމަ އެންމެޒަމާނި އަދި އެންމެ ލިބަރަލް ޑިމޮކްރަސީއަކީ، މަގޭކޮނޑުގައި ސަވާރުވެ މިއިންނެވި “ގޯޑް އޮފް ޑިމޮކްރަސީ” އަދި “ފާދަރ އޮފް ޑިމޮކްރަސީ” އަކީ، ރައީސް މައުމޫނޭ ގޮވާއި ރާއްޖެތެރޭގައި ގަންނާނެބާގެ ކެންޕޭން އެޅުވުމެވެ. ފަހެ، މިކަން ކުރެވޭނީ ސީދާ ގާސިމަށެވެ. ގާސިމް އިބްރާހީމް ނޫންބޭފުޅަކަށް މިފަހަރު ރައީސް މައުމޫނަށް ކާމިޔާބުކޮށް ދެވޭނެހެނެއް ހިޔެއްނުވެއެވެ. ތަސްމީނަކަށް އެކަމެއް ނުކޮށްދެވޭނެއެވެ. އާދެ! އަޅުގަނޑުގެ ފަހުބަހަކީ، އަދި އަޅުގަނޑު ދަންނަވަން އޮތީވެސް، ރައީސް މައުމޫނަށް މިފަހަރު، ކާމިޔާބު އޮންނާނީ މިކަމަށް ގާސިމު ނެރެގެން ކަމެވެ. ސަތޭކަޕަސެންޓާ ގާތަށް އަޅުގަނޑުގެ ވިސްނުމަށް ބުރަވެވެނީ މިގޮތަށެވެ. ގާސިމުގެ ރުހުމުގައި ވިޔަސް، ނުރުހުމުގައި ވިޔަސް، އަދި އޮޅުވާލާއިގެން ކަމަށް ވިޔަސް، އަދި ނުގަބޫލުގައި ވިޔަސް، އަދި ނަސްރީނާލައްވައި މަޖުބޫރުކުރުވައި ގެން ވިޔަސް މިއީ މިކަންވެދާނެ ގޮތެކެވެ. ފަހެ، މިކަން މިގޮތަށް ހިނގިއްޔާ ހިނގާނީ، ޑީއާރުޕީގެ އިއްޒަތްތެރި މެންބަރުންގެ ވޯޓުން ނިންމެވި ބޮޑު ކަރާމާތެއްގެ ގޮތުގައެވެ. އެކަމުން، ރައީސް މައުމޫނު ކުރައްވާނެ ކަމެއް ނޯންނާނެއެވެ. ފަހެ، ނިމިގެން ދާނީ، ޑީއާރުޕީގެ ވޯޓުން ނިންމި ފަހުނިންމުމެއްގެ ގޮތުގައެވެ. ޑިއާރުޕީގެ ސިއްރުވޯޓަކުން ނިމުނީމައި ޖެހޭނީ ހުރިހާ މެންބަރުން ގަބޫލުކުރާށެވެ. ޔާމީނާއި ތަސްމީނަށް ޖެހޭނީ ޕާޓީގެ ފަހުބަހަށް ރުހޭށެވެ. 30 އަހަރުގެ ޚުދުމުޚްތާރު ވެރިކަމެއްހިންގެވި ބޭފުޅެއްގެ ވެރިކަމުގެ ސިލްސިލާއަށް އިތުރުފަސް އަހަރުގެބޮޅެއް އިތުރުވެގެން ދިއުމަކީ، އަޅުގަނޑު ހިތުގެއަޑިން ގަބޫލުކުރާނެ ކަމެއްނޫނެވެ. އަޅުގަނޑު ހިތްހަމަޖެހެނީ، ގާސިމުނޫން ބޭފުޅަކު ރައީސް މައުމޫނު އޭނާގެ ރަނިންގމޭޓަކަށް ނެންގެވުމެވެ.
އާދެ! އެމްޑީޕީން ނެރޭނީ، އެޕާޓީގެ އިސްގޮނޑީގެ ވެރިޔާ އޮނަރަބްލް މުހަންމަދު ނަޝީދު “އަންނި” އެވެ. އެއްޕާޓީއަށް ވުރެގިނަ ސިޔާސީޕާޓީން ބައިވެރިވާ، މަލްޓިޕާޓީ އިލެކްޝަނެއް ބޭރުގެ އޮބްޒާވަރުން ތިބެގެން ރީތިކޮށް ނިމިގެން ދާނެއެވެ. ވާހް! ވާހް! ކިހާރީތިތޯއެވެ! ދިވެހީންގެ ގިނަބަޔަކު އަތްތިލަބަޑިޖަހާއި ނަށާނެއެވެ. އީޔޫއާއި ކޮމަންވެލްތުން އަދި ޔޫއެނުން ވެސް، މެސެޖްތައް ފޮނުވާނެއެވެ. ރިޕޯޓުތައް ބަދަލުކުރެ ވޭނެއެވެ. ދުނިޔޭގެ ސުޕަރޕަވަރ ކަމުގައިވާ އެމެރިކާއިން، އޮނަރަބްލް އަބްދުﷲ ޝާހިދުގެ ހީވާގި މަސައްކަތް ޕުޅާއެކު، ސައްތައިން ސައްތަ އިސްލާމީ ގައުމެއްގައި އެންމެ ކުރުމުއްދަތެއްގައި ޒަމާނީ ލިބަރަލް ޑިމޮކްރަސީ ގެނެސްދިން، “ބައްޕަ” ކަމުގެ ލަގަބު ރައީސް މައުމޫނަށް އަރުވާނެއެވެ. މިހާތަނަށް އަދި ރަސްމީކޮށް ނޭރުވިއޮތް ލަގަބަކީ ހަމައެކަނި މިއެވެ. ޑޮކްޓަރ ޝަހީދު ދެފަހަރެއްގެ މަތިން މިކަންވަނީ ގޮވާއި އިއުލާކު ކުރުއްވާފައެވެ. އެހެނަސް އަދި ނުވެއޮތް ކަމެކެވެ. ވާހް! ވަހ! މިއޮއްތީވާ އުފާވެރިކަމެކެވެ. މިއީ މިކަން ފަހަރުގައި ވެދާނެ ގޮތެކެވެ. މިކަންމިހެން ނުވުމަށް ﷲއަށް އަޅުގަނޑު ދުޢާދަންނަވަމެވެ. ނަގާނީ ގާސިމުތޯ ތަސްމީނުތޯ ނިންމުން އޮތީ، ރައީސް މައުމޫނުގެ އަތްޕުޅުގައެވެ. ދިވެހީން މިކަންކަމުގައި ނުވިސްނައި ހަމަތިބޭން ވީތޯއެވެ؟ ނޫނެކެވެ. އެއްގޮތަކަށްވެސް މަޑުން ތިބެގެން ނުވާނެއެވެ. ޑީއާރުޕީ ރޫޅާލުމަށް ޚާއްސަކޮށް ގާސިމު ރައީސް މައުމޫނު ފަހަތުން ނުދާނެހާ ހުރިހާގޮތްތަކެއް ރާވަންވީއެވެ. ފަހެ، ތަކުރާރުކޮށް ދަންނަވަންއޮތީ، ﷲ އަށެވެ! އޭ! ﷲ އެވެ! އަޅަމެންގެ ދިވެހި ޒުވާނުންނަށް އަދި އޭގެތެރެއިން ވެސް ޚާއްސަކޮށް ސިޔާސީ މުފައްކިރުންނަށް ހެޔޮވިސްނުން ދެއްވާށިއެވެ! އާމީން!